Marhẹ Iniruo Okinhariẹ A Yẹ Ọwan Userhumu Lele?

Obọ ọrẹ a ha i Greek ya uvuẹn i Baibol ọ ha unu te Barnabas ọrhẹ ọnyikọ Paul. Ehworhare enana e gare jerẹ iniruo okinhariẹ, aye e kin ikoko Ilelikristi erẹ ukukaro na. Mesoriẹ? Fọkiẹ ọdamẹ okokodo rẹ aye i vwori kpahen imizu Ilelikristi erẹ aye. Paul ọtare taghene ọye ọ guọlọ ‘rharhumu kọn bru imizu na’ nẹ ọ mẹrẹn oborẹ aye e havwọ. O mwegbe ọnọ nya iroko buebun nẹ ọ sabu bọn aye gbanhon. (Acts 15:36) Ọrana yi jẹ ọdamẹ iniruo okinhariẹ ame inyenana.

Aye a ha urhebro harẹn ọwan. Oniruo okinhariẹ owuowu o kin ukoko ri te 20 yanghene ghwẹ omaran, aye e kin ukoko owuowu ọgbọ eva ẹgbukpe, ọkprughwre owuowu. Ame ena sabu mẹrẹn erere buebun nẹ oborẹ imizu enana i rhiẹromẹrẹn ne, ọrhẹ oborẹ ane aye i rhiẹromẹrẹn ne, orho rhianẹ aye e rọnmọ ne. Aye a damoma nẹ aye rhe ihworho ephian uvuẹn ukoko na, aye jeghwai vwo oruru rẹ aye ine lele ọwan riẹ owian aghwoghwo na, ọrhẹ ọke re lele ihworho yono i Baibol. Iniruo okinhariẹ enana rhẹ ekpako na a kọn bru imizu ukoko na te oghwa. Nẹ aye bọn ọwan gbanhon, aye a je ha ẹmro urhebro phia uvuẹn iyono rhẹ emẹvwa.—Acts 15:35.

Aye e dje ọdamẹ kpahen ihworho ephian. Iniruo okinhariẹ na i vwo ọdamẹ okokodo kpahen erhirhiẹ ọrẹ ẹhẹn ikoko na. Aye rhẹ ekpako rhẹ idibo owian a vwoma nẹ aye tẹmro kpahen ẹnyariobaro ukoko na, je yẹ aye urhebro kpahen oborẹ aye ena dabu wian owian ọrẹ aye lele. Aye a ha userhumu harẹn ekobaro vwo efikparobọ uvuẹn owian aghwoghwo ọrẹ aye. Ọrẹ omamerhomẹ, aye a je damoma rhe era rhiẹ uyono obọ, ọrhẹ oborẹ aye a nya riẹ obaro lele uvuẹn urhomẹmro na. Imizu enana owuowu a homakpanhotọre e ‘lele ọwan wian fọkiẹ orhorhomu ọrẹ [ọwan].’ (2 Corinthians 8:23) Ofori taghene ame hẹrokele esegburhomẹmro rhẹ omẹhakpanhotọre aye harẹn Osolobrugwẹ.—Hebrews 13:7.

• Mesoriẹ iniruo okinhariẹ e kin ikoko?

• Marhẹ wu ne ru sabu mẹrẹn erere nẹ ẹrhiọ aye?