Me Yẹ Bethel?

Odẹ ituẹ Hebrew e se Bethel o mevirhọ ‘Oghwa ọrẹ Osolobrugwẹ.’ (Genesis 28:17, 19) Ọnana odẹ rọ ghwai fo harẹn eghwa sansan Iseri Jehova i bọn rhẹ ekete akpọ na okeri te, avwaye yẹ ọkpọvi rhẹ obọ ẹhatua owian aghwoghwo na o nẹ sa. Ugboma Usuon na ọ ga uvuẹn esiri ukoko na obẹ New York State, U.S.A., nẹ avwaye rhe, yẹ ọ hẹrote owian ọrẹ eghon ukoko na uvuẹn ẹkwotọre buebun. Jerẹ otu, erẹ a ga uvuẹn ekete enana, erhe rẹ aye rhẹ ekrun Bethel. Jerẹ ekrun, aye e nyerẹn kugbe, riẹ emaren kugbe, jeghwai yono i Baibol na kugbe.—Psalm 133:1.

Erẹ a wian uvuẹn Bethel i vwo ẹhẹn oma-ẹhaze. Uvuẹn i Bethel ephian wu na mẹrẹn Ilelikristi ehworhare rhẹ emẹse ri homakpanhotọre rẹ aye inẹ ru ọhọre ọrẹ Osolobrugwẹ jeghwai wian owian Uvie na ọke-vuọnvuọn. (Matthew 6:33) A vwa kwosa harẹn aye-e, jọrẹn aye ephian i vwo ekete aye e rhirhiẹ rhẹ emaren rẹ aye a ji ria, a je yẹ aye ibiẹ igho nẹ aye sabu hẹrote oma aye. Ihworho ephian uvuẹn i Bethel i vwo owian aghalẹ harẹn aye, ezẹko a wian uvuẹn ọfisi, ukoli, yanghene ekete rẹ a riẹ emaren. Erọrọ a wian ekete e fomu ẹbe, ezẹko a hẹrote oghwa, ezẹko a fọrhọn ewẹn, yanghene ekwakwa erọrọ.

Bethel ekete a wian ọke ephian, rọ hobọtua owian aghwoghwo Uvie na. Ọdamẹ ọrẹ i Bethel ephian yẹ ọnọ ha urhomẹmro i Baibol phia harẹn ihworho buebun. Broshọ ọnana ghwai udje yi owu. Ugboma Usuon na ye hẹrote ẹya ye, nẹ ọ ha ikọmputa dje yi vwe umẹ erhianrhian buebun ekete akpọ na okeri te. Nẹ a ha imashini eduado e fomu aye phia uvuẹn i Bethel sansan, jeghwai kpare aye riẹ ikoko ri vrẹn 115,000. Uvwre ọke owian ọnana ephian, ekrun i Bethel a jeghwai hobọtua owian ọ mai ghanrẹn kparobọ, ọrana yẹ owian aghwoghwo iyẹnrẹn esiri Uvie na.—Mark 13:10.

• Ayọmọ yẹ a ga uvuẹn i Bethel, ne marhẹ a sabu hẹrote aye?

• Owian okpakpa ọgo yẹ irueru uvuẹn Bethel ephian a hobọtua?