Marhẹ E Ru Mẹrẹn Igho Rẹ A Ha Wian Owian Ame?

Ukoko ame e fomu iduduru i Baibol rhẹ ẹbe buebun re tiobọ nẹ harẹn ihworho kẹgbukpe kẹgbukpe, a vwa kwosa rhọ ye-e. Ame a bọn, jeghwai hẹrote Kingdom Hall rhẹ eghọn ukoko. Ame a je hobọtua erẹ a ga uvuẹn i Bethel rhẹ imishọnari buebun. Ame a je ha userhumu harẹn imizu ame ọke ukpokpogho. Omaran na, wu na sabu roro, ‘Marhẹ eru sabu mẹrẹn igho re ru enana?’

Ame e vwa kwa itaiti-i, bru igho harẹn ihworho-o, yanghene kpare ọsete-e. Dedevwo, igho rẹ a hobọtua owian aghwoghwo na o bunrun, ame e vwa rẹ igho-o. Ẹgbukpe uzusiorin rọ vrẹn ne, i Watchtower ọreva re fomurun ọrhọ ta taghene ame vwo imwuẹro taghene Jehova yẹ ọrọ hobọtua ame. Fọkiẹ ọrana, ‘o vwo ọke owuorowu rẹ ame ena rẹ userhumu miẹ ituakpọ-o’—ame a je ghini rẹ dẹ-ẹ!—Matthew 10:8.

Ame a wian owian ọrẹ ame nyoma itetoro ro nẹ ẹhẹn rhe. Ihworho buebun ri vwo ọdaremẹro kpahen owian aghwoghwo ame, ne toro igho rhọ ye. Ọrẹ omamerhomẹ, Iseri Jehova harẹn omobọ aye, e ji tiobọ nẹ ọke, omẹgbanhon, igho, rhẹ ekwakwa erọrọ rẹ aye i vwori na sabu ru ọhọre Osolobrugwẹ uvuẹn akpọ na ephian. (1 Chronicles 29:9) Uvuẹn Kingdom Hall rhẹ emẹvwa ame, ekpeti itetoro e ha uvuẹn ekete sansan harẹn ihworho re guọlọ toro. Ọgbọ buebun igho a mẹrẹn nẹ itetoro na rhe, i nẹ obọ ihworho ri vwe vwo bun, jerẹ ọmase uku i Jesu ọ tẹmro kpahen taghene o fi ibiẹ ikibẹ eva rhẹ uvuẹn ekpeti itetoro rọ ha uvuẹn oghwa ẹga na. (Luke 21:1-4) Omaran na, kohworho kohworho ọnọ sabu ‘fi emru rhẹ okokọ’ rẹ ono toro ‘jerẹ oborẹ obrorhiẹn ye uvuẹn ọmudu ọnẹyen’ ọke ephian.—1 Corinthians 16:2; 2 Corinthians 9:7.

Ame i vwo imwuẹro taghene i Jehova ọnọ rhọ hobọ te ọmudu ihworho re guọlọ ‘ha ekwakwa eghoghanren rẹ aye i vwori e bru ọghọ rhọ ye oma’ nyoma obọ ẹhatua owian Uvie na, neneyo ọhọre ọnẹyen o rugba.—Proverbs 3:9.

• Marhẹ ukoko ọrẹ ame ọ vẹnẹ ẹga erọrọ?

• Me yẹ a ha itetoro ro nẹ ẹhẹn rhe na ruẹ?