Nekpẹn Userhumu Osolobrugwẹ nẹ Orọnmuọ ọ Sabu Vwo Omamerhomẹ

Jehovaa Osolobrugwẹ yo ruẹ irueruo orọnmo ọrukaro. Baibol na ọ ta rẹn ọwan taghene ọ ma ọmase ọrukaro, “nọ hariẹ vwe ọhworhare na.” Oma ọ merhen Adam omamọ ọnana no mwurien ta: “Ọnana usuaso ọrhẹ uhwen mẹ.” (Genesis 2:22, 23) Jehova ọ ji guọlọ nẹ oma ọ merhen eri rọnmọ ne.

Wu rha rọnmọ obọ, wu ne rhe roro taghene okpetu owuorowu o rhirhiẹ orọnmo na-a. Ọrẹn, o fori ne wu rhe taghene esa ọrhẹ ane ri tobọ vwo ẹguọlọ okokodo kpahen omomaye, ine ji vwo ẹghwọ ọkezẹko. (1 Corinthians 7:28) Wu rha ha iruemru-urhi Baibol ri ha uvuẹn ibroshọ ọnana ruiruo, omamerhomẹ ono rhirhiẹ ye uvuẹn orọnmo ọrhẹ ekrun ọnọ.—Psalm 19:8-11.

1 RHIABỌ DEDE OWIAN RI JEHOVA Ọ YẸRUỌ

OBORẸ I BAIBOL NA Ọ TARE: Esa na yẹ urhomu harẹn ekrun na.—Ephesians 5:23.

Orhianẹ wẹwẹ esa, Jehova o fiẹrorhọ taghene wu na dabu hẹrote anuọ. (1 Peter 3:7) Ọ mariẹn nọ ha userhumu wẹn, ọ ji guọlọ ne wu brọghọ rhọye oma, ji dje ẹguọlọ phia riẹn. (Genesis 2:18) Wu ne vi vwo ẹguọlọ kpahen anuọ te erhirhiẹ wu na ha edamẹ yen karo rẹn enọ.—Ephesians 5:25-29.

Wu rhe rhiẹ ane, Jehova o fiẹrorhọ taghene wu na họghọ okokodo rẹn esa, ji ha userhumu riẹn wian owian ro terie. (1 Corinthians 11:3; Ephesians 5:33) Hobọtua orhienbro yi, ne wu ha ọsoso ọmuduo nyalelie. (Colossians 3:18) Wu rhe ruẹ ọnana, wu ne vwo erhumu omamọ uvuẹn ukẹro i esa ọrhẹ Jehova.—1 Peter 3:1-6.

OBORẸ WU NA SABU RU:

• Nọ ohworho wa rọnmọ oborẹ wu ne ruo neneyo wu sabu rhiẹ omamọ esa yanghene ane. Dabu kerhọ ne wu ruẹ oborẹ wu na sabu ru ephian

• Vwo erhionrin. Ọnọ ha ibiọke bọmọke are awanva ina ki sabu lẹrhẹ oma merhen omomare

2 DABU DAMERHỌ IRORO OHWORHO WA RỌNMỌ

Oborẹ i Baibol na ọ tare: O fori ne wu damerhọ ọdamẹ ohworho wa rọnmọ. (Philippians 2:3, 4) Ni ohworho wa rọnmọ taghene ọ ghanranren, karorhọ taghene Jehova ọ guọlọre nẹ idibo yi i “lele ihworho ephian ru dẹndẹn.” (2 Timothy 2:24) “Ẹmro re vwe roro te ọ họhọ odan ọlọkọ ra ha dumu ohworho, ọrẹn ẹmro ọvwẹghwanren ọ ha usimi phia.” Omarana, dabu ni ẹmro wa ta so. (Proverbs 12:18) Ẹhẹn ọfuanfon i Jehova, ọnọ ha userhumu wẹn tẹmro esiri ro dje ẹguọlọ phia.—Galatians 5:22, 23; Colossians 4:6.

OBORẸ WU NA SABU RU:

• Nẹrhomo ne wu vwo ẹhẹn ọfọfọ ọrhẹ ẹhẹn ro serhọ bọmọke wu ne ki lele ohworho wa rọnmọ ta kpahen eghwẹmro eghoghanren

• Dabu roro kpahen oborẹ wu na ta ọrhẹ oborẹ wu na ta ye lele

3 ARE AWANVA I VWO IRORO OWU

OBORẸ I BAIBOL NA Ọ TARE:Wu rha rọnmọ ne, wẹwẹ ọrhẹ ohworho wa rọnmọ ne rhiẹ “ugboma owu.” (Matthew 19:5) Ọrẹn are awanva jẹ ihworho sansan, omarana, iroro are ọnọ sabu vẹnẹ ọkezẹko. O fori nẹ are awanva i damoma neneyo iroro are o serhọ owu. (Philippians 2:2) Are i damoma vwo ekwerhọ owu orhianẹ are a guọlọ brorhiẹn. Baibol na ọ tare: “Ihworho buebun i rha djiroro kugbe, no vwo efikparobọ.” (Proverbs 20:18)Jenẹ iruemru-urhi Baibol sun are orhianẹ are a guọlọ brorhiẹn eghwaghwa.—Proverbs 8:32, 33.

OBORẸ WU NA SABU RU:

• Ta rẹn ohworho wa rọnmọ kpahen iroro ọnọ, ukperẹ ono rhiẹ iyẹnrẹn kpekpa wu rhonrin

• Kiki ta rẹn ohworho wa rọnmọ bọmọke wu ne ki brorhiẹn ezẹko