OGHỌN 2
Are i Dje Uruemru Atamwu Phia Rẹn Omomare
“Oborẹ Osolobrugwẹ ọ tan kugbe ne, e vwe jenẹ ohworho owuorowu hẹriẹ ye-e.”—Mark 10:9
Jehova o fiẹrorhọ taghene ana rha “sẹrorẹ atamwu.” (Micah 6:8) Ọnana ọ ghanranren omamọ, nime uruemru atamwu ọrhọ ha orọnmo-o, ẹruẹhaso ọ sabu rhirhiẹ ye-e. Ọ ghanranren nẹ eri rọnmọ ne i hẹroso omomaye, neneyo ẹguọlọ ọ sabu rhirhiẹ ye.
Inyenana, uruemru atamwu ọ ha uvuẹn orọnmo buebu-un. Ne wu sabu sẹrorẹ orọnmo ọnọ, wu na vi damoma rhe ruẹ ekwakwa eva.
1 HA UKẸRO ỌGHOGHANREN NI ORỌNMO ỌNỌ
OBORẸ I BAIBOL NA Ọ TARE: “Dabu gbẹro rhẹ ekwakwa ri mai ghanren.” (Philippians 1:10) Orọnmo ọnọ ọ ha usuẹn ekwakwa ri mai ghanren uvuẹn akpenyerẹn ọnọ. O fori ne wu ha ukẹro ọghoghanren nie.
Jehova ọ guọlọre ne wu vwo ẹguọlọ kpahen ohworho wu rọnmọren ọvo, ji “riamerhen akpenyerẹn” kugbe. (Ecclesiastes 9:9) Ọ dabu dje yi fiotọre taghene wu vwa sẹrerhumuji ohworho wu rọnmọre-en, ukpomaran are awanva i damoma lẹrhẹ oma merhen omomare. (1 Corinthians 10:24) Jenẹ o mwu ohworho wu rọnmọren ẹro taghene wu guọleriẹ, wu ji vwo ọdaremẹro kpahiẹn.
OBORẸ WU NA SABU RU:
Are awanva i dabu ghwọghọ ọke kugbe, wu vwe ti nẹ uchunu ọke we lele ohworho wu rọnmọren ghwọghọ kugbe-e
Wu vwe roro kpahen “oma ọnọ” ọvo-o, ukpomaran rhe roro kpahen “are awanva”
2 SẸRORẸ ỌMUDU ỌNỌ
OBORẸ I BAIBOL NA Ọ TARE: “Kohworho kohworho ro ni ọmase rhẹ ẹhẹn ro no lelie merhẹn, o lelirie ghwọwe uvuẹn ọmudu ọnẹyen ne.” (Matthew 5:28) Ohworho orho roro iroro ọfanrhiẹn ọke ephian, nọyẹ ọravwọ ọ fuevwan kpahen ohworho rọ rọnmọ-ọ
Jehova ọ tare taghene o fori ne wu “sẹrorẹ ọmudu ọnọ.” (Proverbs 4:23; Jeremiah 17:9) Ne wu sabu ruẹ ọnana, ọ fori ne wu vwo ukẹro ro serhọ. (Matthew 5:29, 30) Hẹrokele udje i Job ro lele ukẹro ọnẹyen riẹ ọphọ, taghene ọ ha ukẹro rọ sọre ni ọmase ọrọrọ-ọ. (Job 31:1) Kẹnoma rẹn uruemru re ni ifoto yanghene ughe ihworho ri banfirhọ. Brorhiẹn wu na kẹnoma rẹn uruemru obẹlẹme re djephia rẹn ohworho ro vwo rhiẹ esa yanghene anuọ.
OBORẸ WU NA SABU RU:
Jenẹ awọrọ i mẹriẹnvwrurhe taghene ohworho wu rọnmọren ọvo yi wu vwo ẹguọlọ kpahen
Damerhọ iroro ohworho wa rọnmọ, ne wu fiobarhọ onyerẹnkugbe ephian rọ nọ sabu suẹ ẹkuọn vwe ohworho wu rọnmọren