Oborẹ Ana Kwaphiẹ Ẹmro Rhọ Lele

Ebẹnbẹn sansan a homaphia uvuẹn ọtonrhọ orọnmo. Ebẹnbẹn na ina sabu homaphia fọkiẹ oborẹ are e roro emru lele, oborẹ are i guọlọre uvuẹn akpenyerẹn are, ọrhẹ erhirhiẹ erọrọ. Yanghene ebẹnbẹn ina sabu homaphia fọkiẹ ekwakwa erọrọ re vwe fiẹrorhọ ri phiare.

Ọnọ sabu phẹrẹ ra na zẹ jẹ ebẹnbẹn erana vwo, ọrẹn Baibol na ọ ha urhebro rẹn ọwan na damoma kwaphiẹ aye rhọ. (Matthew 5:23, 24) Wu na sabu kwaphiẹ ebẹnbẹn enọ rhọ wu rha nyalele iruemru-urhi ri ha uvuẹn i Baibol na.

1 TA KPAHEN EBẸNBẸN NA KUGBE

OBORẸ I BAIBOL NA Ọ TARE: “O vwo . . . ọke ra na tẹmro.” (Ecclesiastes 3:1, 7) Damoma nẹ are i ghwọghọ ọke ta kpahen ebẹnbẹn na kugbe. Damoma ta rẹn ohworho wa rọnmọ oborẹ we roro, ọrhẹ ukẹro wa ha ni ẹmro ezẹko. Rha “ta urhomẹmro” rẹn ohworho wa rọnmọ. (Ephesians 4:25) Erhirhiẹ na ọrhọ tobọ gbanhon omamọ, damoma kwaphiẹ ye rhọ nọ jọ rhọ suẹ owọnren. Ẹkpahenrhọ bọrọbọrọ, ọnọ sabu lẹrhẹ erhirhiẹ obiobiomu zien.—Proverbs 15:4; 26:20.

Ẹghwọ ọrhọ tobọ homaphia, rhe dje uruemru ghwologhwolo phia, ji rhe dje ẹguọlọ ọrhẹ ọghọ phia rẹn ohworho wa rọnmọ. (Colossians 4:6) Damoma kwaphiẹ ẹghwọ na rhọ phẹphẹrẹ, are i vwa dobọ ẹmro ẹta ji-i.—Ephesians 4:26.

OBORẸ WU NA SABU RU:

• Are i kwaphiẹ ọke rhotọre nẹ are i ta kpahen erhirhiẹ na

• Orho te ọke wu na kerhọ, wu vwe bru ẹmro zẹ unu ohworho rọ tẹmro-o. Uphẹn ono rhie firhọ wẹn wu na tẹmro

2 KERHỌ JEGHWAI VWẸRUỌ ỌREVA

OBORẸ I BAIBOL NA Ọ TARE: “Are i dje ẹguọlọ okokodo rẹn owuowọnwan. Are i kobaro ọghọ e djephia rẹn owuowọnwan.” (Romans 12:10) Oborẹ wa kerhọ lele ọ ghanranren omamọ. Damoma vwẹruọ oborẹ ọreva ọ ta, ne wu dje uruemru re “roro . . . ọrhẹ omeriotọre” phia. (1 Peter 3:8; James 1:19) Wu vwa gemai ru taghene wa kerhọ-ọ. Wu rhe vwo uphẹn na, sẹrerhumuji oborẹ we ruẹ ne wu dabu kpomavi rẹn ohworho wa rọnmọ, yanghene nọ yen sẹ are ina sabu ta kpahiẹn kọgbọrọ. Wu rhe nie taghene ohworho wa rọnmọ ugbehian ukperẹ ono rhiẹ ọvwreghrẹn ọnọ, wu “kiki tuekwẹre-e.”—Ecclesiastes 7:9.

OBORẸ WU NA SABU RU:

• Rha ha ọsoso ẹhẹn ọnọ kerhọ, ọrhọ tobọ rhianẹ oborẹ we rhon ọ vwọ merhuọn oma-a

• Damoma djokarhọ oborẹ o mwu ohworho wa rọnmọ ta oborẹ ọ tare. Djokarhọ uvwele ra tẹmro na wẹn, ọrhẹ oborẹ oma o ruẹ ọrọ tẹmro na

3 KPARE IDJAGHWẸ

OBORẸ I BAIBOL NA Ọ TARE: “Erere ọ havwiẹ uvuẹn kowian kowian ọgbogbanhon ephian, ọrẹn ẹmro kpekpa o lele fi ọkanronmẹ.” (Proverbs 14:23) Ne vwo ekwerhọ kpahen emru, ọrana ọvo o te-e. O fori ne wu kpare idjaghwẹ kpahen oborẹ are i brorhiẹn yen na. Ọkezẹko, ọnana ọ guọlọ owian ọrhẹ omẹdamu, ọrẹn wu vioja fọkiẹ oborẹ ono nerhumie rhe-e. (Proverbs 10:4) Are i rha wian kugbe, are ine “vwo omamọ osa” fọkiẹ owian ọgbogbanhon are.—Ecclesiastes 4:9.

OBORẸ WU NA SABU RU:

• Are i brorhiẹn oborẹ are ine ruo rọ nọ kwaphiẹ ẹmro are rhọ

• Nẹ ọke ya ruọke, are i ni oborẹ are i ru rhomu te ne