Ono Vwo Ẹrhọmọnuhwu!

1-3. Me yo mwu ihworho ephian rhẹ ekanron, marhẹ yi Jehova ono ru simi ọwan ephian nẹ abọ ye?

GBE roro taghene e fi ruọ rhẹ ekanron ne wu rhirhiẹ avwaye bẹmẹdẹ fọkiẹ ọdandan wu vwe ru. O vwo uphẹn wu ne nẹ ekanron na-a. We vwo ifiẹrorhọ owuorowu-u, we ji vwo oborẹ wu ne ru kpahen erhirhiẹ na-a. Ọrẹn, ọke we roro taghene we vwo ifiẹrorhọ owuorowu-u, ne wu mẹrẹnvwrurhe taghene o vwo ohworho ro vwo omẹgbanhon ro no ti owẹwẹ nẹ avwaye, o ji vive taghene ọnọ yọ userhumu! Marhẹ oma ono ruo?

² Ọwan ephian i ha ekanron uvuẹn abọ uhwu. O vwo oborẹ ana sabu ru ra na vabọ ye-e. Ọrẹn, Jehova o vwo omẹgbanhon ro no simi ọwan nẹ abọ uhwu. Jehova ọ jeghwai vive taghene ọye ono “ti uhwu ro rhiẹ ọvwreghrẹn rọ kẹta na nie.”—1 Corinthians 15:⁠26.

³ Gbe roro omefuon re wu na mẹrẹn, re wu ne je brudu kpahen uhwu ghwomaran! Jehova ono ti uhwu nie bẹmẹdẹ. Habaye, ọnọ ji rhọmọ eri hwuru nẹ uhwu. Roro oborẹ ọrana ono mevirhọ ha wẹn. O vive taghene “eri hwuru” ina rharhumu nyerẹn. (Isaiah 26:19) Ọnana yi Baibol na o se ẹrhọmọnuhwu.

OHWORHO RE VWO ẸGUỌLỌ KPAHEN ORHO HWU

4. (a) Me yọ nọ sabu yẹ ọwan urhebro owuọwan uvuẹn ekrun ọwan yanghene ugbehian rọ kpẹnkpẹnren orho hwu? (b) Ayọmo yẹ igbehian i Jesu ezẹko?

⁴ Owuọwan uvuẹn ekrun ọwan yanghene ugbehian rọ kpẹnkpẹnren orho hwu, ọ miamoma omamọ. A vwa sabu ru emru owuorowu kpahiẹ-ẹn. O vwo oborẹ ene ru nẹ ohworho na ọ sabu rharhumu nyerẹ-ẹn. Ọrẹn, Baibol na ọ yẹrẹ ọwan obọdẹn urhebro. (Se 2 Corinthians 1:​3, 4.) Jene roro kpahen udje owu ro djerie phia taghene i Jehova ọrhẹ i Jesu i vwo omwemẹ aye ina rhọmọ ihworho re vwo ẹguọlọ kpahen nẹ uhwu. Ọke i Jesu ọ ha otọrakpọ na, ọ kọn bru Lazarus ọrhẹ imizie emẹse, Martha ọrhẹ Mary. Aye ephian igbehian i Jesu. Baibol na nọ tare: “Jesu o vwo ẹguọlọ kpahen Martha ọrhẹ omizie ọmase kugbe Lazarus.” Ẹdẹ owu, Lazarus no hwuru.—John 11:​3-5.

5, 6. (a) Me yi Jesu o ruru ọke igbehian ọrhẹ ekrun i Lazarus e mwuomarhọ? (b) Mesoriẹ orhiẹ emru urhebro re rhe oborẹ uhwu ọ miamo i Jesu oma te?

⁵ Jesu nọ yọ ha urhebro rẹn Martha ọrhẹ Mary. Ọke i Martha o rhon taghene i Jesu ọ sa, nọ zẹ ya vwa ye otafe amwa na. Oma ọ merhen riẹn rọ mẹrẹn i Jesu, ọrẹn nọ ta rẹn i Jesu: “Orhianẹ wu ha aran, manẹ omizu mẹ o vwo hwu-u.” Martha no roro taghene i Jesu ọ kiki rhe te-e. Ọrana ọ vrẹn, Jesu nọ mẹrẹn Mary rọ viẹ. Rọ mẹriẹn taghene aye i mwuomarhọ, nọ da riẹ omamọ, nọ viẹre. (John 11:​21, 33, 35) Jesu ọ mẹrẹn omiamiamo rọ havwiẹ, ohworho re vwo ẹguọlọ kpahen orho hwu.

⁶ Emru urhebro ra mẹriẹn taghene i Jesu o rhe omiamiamo ra mẹrẹn ohworho orho hwu. Jesu ọ jeghwai họhọ ọsẹ ye. (John 14:⁠9) Jehova o vwo omẹgbanhon ro no ti uhwu nie bẹmẹdẹ, ọrana yẹ oborẹ ono ru phẹrẹkpẹ.

“LAZARUS, VẸNRẸN RHE!”

7, 8. Mesoriẹ i Martha ọ vwọ guọlọ ne ghonrien atita na nẹ usin i Lazarus, ọrẹn me yi Jesu o ruru?

⁷ Ọke i Jesu o te usin i Lazarus, nọ mẹrẹnvwrurhe taghene a ha atita ọduado e gbe unu usin na. Jesu nọ tare: “Are i ghonrien atita na nẹ avwaye.” Ọrẹn, Martha ọ guọlọ nẹ ihworho i ruie-e. Orinmi i Lazarus ọ ha uvuẹn usin na te ẹdọke ẹne ne. (John 11:39) Martha o rhe oborẹ i Jesu ọ guọlọ ruẹ rẹn omizie-e.

⁸ Jesu nọ ta rẹn Lazarus: “Vẹnrẹn rhe!” Oborẹ i Martha ọrhẹ Mary i mẹrẹnren no gbe rẹ aye unu. “Ọhworhare ro hwuru na nọ vẹnrẹn rhe, rhẹ ewẹn ra fare aghwẹ ọrhẹ abọ ye.” (John 11:​43, 44) A rhọmọ i Lazarus nẹ uhwu ne! Lazarus ọ rharhumu kwomakugbe ekrun ọrhẹ igbehian ye ne. Aye ina sabu mọriẹn, hobọte yi, jeghwai tẹmro riẹn. Ọrana ghini emru igbevwunu! Jesu ọ rhọmọ i Lazarus nẹ uhwu.

“IBIẸ ỌGBỌTỌ, MI TA WẸN, ‘VẸNRẸN’”

9, 10. (a) Ọrọmo yọ yẹ i Jesu omẹgbanhon rọ nọ rhọmọ ihworho nẹ uhwu? (b) Mesoriẹ iyẹnrẹn ẹrhọmọnuhwu na a ghanren rẹn ọwan omamọ?

⁹ Omẹgbanhon ọnẹyen yi Jesu ọ rhọmọ ihworho nẹ uhwu? Ẹjo. Jesu ọ ki rhọmọ Lazarus, ọ nẹrhomo vwe i Jehova, Jehova nọ yẹriẹ omẹgbanhon rọ nọ rhọmọ i Lazarus nẹ uhwu. (Se John 11:​41, 42.) Orhiẹ i Lazarus ọvo ya rhọmọnuhwu-u. Baibol na ọ ji ta kpahen ibiẹ ọgbọtọ rọ ha ẹgbukpe 12, ro kpomurun gbangbanhon. Jairus ro rhiẹ ọsẹ ọmọ na o brudu, nọ rẹ i Jesu taghene o simi ọmọyen. Ọgbọto na ọvo yo vwiẹre. Ọke rọ tẹmro rẹn i Jesu, ehworhare ezẹko ni ta riẹn: “Ọmọ ọgbọtọ na o hwu ne! Mesoriẹ we kpokpo Oyono na?” Ọrẹn, Jesu nọ ta rẹn i Jairus: “Wu vwa zofẹ-ẹn, vwo esegburhomẹmro, ene simi ọmọ na.” No lele i Jarius riẹ oghwa ye. Ọke aye a joma te oghwa na ne, Jesu no rhon jeghwai mẹrẹn ihworho ra viẹ. Jesu nọ ta rẹn aye: “Are i vwa viẹ-ẹ, nime o hwu-u, ọrẹn ọ merhẹn.” Ọsẹ ọgbọtọ na ọrhẹ izie ina sabu rhe roro oborẹ ẹmro i Jesu na o mevirhọ. Jesu nọ ta rẹn ihworho ephian nẹ aye ruotafe, nọ ha ọsẹ ọgbọtọ na ọrhẹ izie ruẹ obuvun ra kpare ọmọ na rhọ. Jesu nọ mọrọn obọ ọmọ na, nọ ta riẹn: “Ibiẹ ọgbọtọ, mi ta wẹn, ‘Vẹnrẹn!’” Gbe roro oborẹ oma ọnọ merhen ọsẹ ọrhẹ izu ọmọ na te, ọke aye a mẹrẹn ọmọ ọgbọtọ na rọ nya! Jesu ọ rhọmọ ọmọ aye nẹ uhwu ne. (Mark 5:​22-24, 35-42; Luke 8:​49-56) Nẹ ẹdẹ ọrana rhe, aye i rha mẹrẹn ọmọ na, aye ni na karorhọ oborẹ i Jehova o ru rẹn aye nyoma i Jesu.a

¹⁰ Ihworho i Jesu ọ rhọmọnuhwu, i ji rharhumu hwu. Ọrẹn, oborẹ e se mẹrẹn kpahen ihworho enana ọ ghanranren omamọ nime ọ yẹ ọwan obọdẹn ifiẹrorhọ. Jehova ọ guọlọ rhọmọ ihworho nẹ uhwu, ọye ono vi ru omaran.

OBORẸ E YONORIN NẸ IYẸNRẸN ẸRHỌMỌNUHWU NA

11. Me yẹ Ecclesiastes 9:5 o yonirin ọwan kpahen i Lazarus?

¹¹ Baibol na ọ tare taghene “eri hwuru, e rhe emru owuorowu ghwomara-an.” Omaran ọ ghwai phia rẹn Lazarus. (Ecclesiastes 9:⁠5) Jerẹ oborẹ i Jesu ọ tare, nọ họhọre taghene i Lazarus ọ merhẹn. (John 11:11) Ọke Lazarus ọ ha uvuẹn usin na, o “rhe emru owuorowu ghwomara-an.”

12. Marhẹ ye ru rhe taghene ẹrhọmọnuhwu ọrẹ Lazarus ọ ghini phia?

¹² Ọke i Jesu ọ rhọmọ i Lazarus nẹ uhwu, ihworho buebun i mẹrenriẹn. Evwreghrẹn i Jesu i tobọ rhe kpahen igbevwunu ọnana. Lazarus o nyerẹnren, ọnana no djephia taghene ẹrhọmọnuhwu na, ọ ghini phia. (John 11:47) Habaye, ihworho buebun i jeghwai kọn bru i Lazarus nya, fọkiẹ ọrana, aye ni me kwerhọ taghene Osolobrugwẹ yo ghini dje i Jesu rhe. Evwreghrẹn i Jesu e vwo omamerhomẹ kpahen ọrana-a, aye na gbẹn izede rẹ aye ine kpe i Jesu ọrhẹ Lazarus.—John 11:53; 12:​9-11.

13. Mesoriẹ ono mwu ọwan ẹro taghene i Jehova ọnọ rhọmọ ihworho nẹ uhwu?

¹³ Jesu ọ tare taghene “ọsoso ihworho re ha uvuẹn usin okarorhọ” ina rhọmọnuhwu. (John 5:28) Ọnana no mevirhọ taghene ihworho ephian ri Jehova ọ karorhọ ina rharhumu nyerẹn. Nọyẹ, Jehova ọnọ karorhọ ekwakwa ephian ri sekpahen ohworho na, nọ ki sabu rhọmiẹ. Ọnọ ghini sabu karorhọ aye ephian? O vwo iduduru ikereti buebun ri ha oberun na. Baibol na ọ tare taghene i Jehova o rhe odẹ aye owuowu. (Se Isaiah 40:26.) Ra mẹriẹn taghene i Jehova ọ karorhọ odẹ ikereti owuowu na, no rhiẹ emru imwẹro taghene ọnọ lọhọ riẹn nọ karorhọ kemru kemru ro sekpahen ihworho rọ nọ rhọmọnuhwu. Itiọrurhomẹmro, Jehova yọ ma kemru kemru, omarana, e rheri taghene ọye o vwo omẹgbanhon rọ nọ rhọmọ ihworho nẹ uhwu.

14, 15. Me yẹ ẹmro i Job o yonirin ọwan kpahen ẹrhọmọnuhwu?

¹⁴ Job rọ fuevwan ga i Jehova, o vwo ekwerhọ kpahen ẹrhọmọnuhwu na. Job ọrhọ nọ: “Onyakpọ orho hwu, ọnọ sabu rharhumu nyerẹn?” Nọ ta rẹn i Jehova: “Wu ne se, mi na kpahenrhọ wẹn. Ne wu ne vwo ọdamẹ okokodo kpahen owian obọ ọnọ.” Itiọrurhomẹmro, Job o rheri taghene i Jehova ọ hẹrhẹ ọke rọ nọ rhọmọ ihworho nẹ uhwu.—Job 14:​13-15.

¹⁵ Marhẹ oma o ruo, we rhe kpahen ifiẹrorhọ ọrẹ ẹrhọmọnuhwu na? Wu na sabu rhe roro, ‘Nẹ ekrun ọrhẹ igbehian mẹ ri hwu ne vwo, ana ji rhọmọ aye nẹ uhwu?’ Emru urhebro re rhe taghene i Jehova ọ ghini guọlọ nẹ ihworho ri hwuru i rharhumu nyerẹn. Jene yono kpahen oborẹ i Baibol na ọ ta kpahen ekete aye ine nyerẹn ọrhẹ ihworho ra na rhọmọnuhwu.

AYE “INE RHỌN UVWELE YI, NẸ AYE INE VẸNRẸN RHE”

16. Aruo akpọ ọgo yẹ era rhọmọnuhwu ine nyerẹn?

¹⁶ Ọke ahwanren, ihworho ra rhọmọnuhwu i kwomakugbe ekrun ọrhẹ igbehian aye uvuẹn otọrakpọ na. Ọnana ọnọ ji phia obaro na, ọrẹn, ono rhomu rhọ. Mesoriẹ? Nime, ihworho ra na rhọmọnuhwu na ine vwo uphẹn rẹ aye ine nyerẹn bẹmẹde, aye i rhe ji hwuẹ-ẹ. Aye ni ne nyerẹn uvuẹn akpọ rọ vẹnẹ ọrẹ ọwan e nyerẹn inyenana. Orho vwo uvweri, ozighi, ọrhẹ emiamo ghwomara-an.

17. Ayọmo ya na rhọmọnuhwu?

¹⁷ Ayọmo ya na rhọmọnuhwu? Jesu ọ tare taghene “ọsoso ihworho re ha uvuẹn usin okarorhọ ine rhọn uvwele yi, nẹ aye ine vẹnrẹn rhe.” (John 5:​28, 29) Revelation 20:​13, nọ tare: “Urhiẹ ọduado na no tiobọnu eri hwu rhẹ uvuien, uhwu ọrhẹ Usin na ni tiobọnu eri ha uvuẹn aye.” Itiọrurhomẹmro, iduduru ihworho buebun ina rharhumu nyerẹn. Ọnyikọ Paul ọ ji ta taghene ono vwo ẹrhọmọnuhwu “evwata ọrhẹ eri vwe rhiẹ evwata.” (Se Acts 24:15.) Me yẹ ọnana o mevirhọ?

18. Ayọmo yẹ “evwata” ra na rhọmọnuhwu na?

¹⁸ Usuẹn ihworho ri rhiẹ “evwata na” yẹ idibo i Jehova ri nyerẹnren i Jesu ọ ki rhiẹ otọrakpọ na. Ihworho jerẹ Noah, Abraham, Sarah, Ruth, ọrhẹ Esther ina rhọmọnuhwu, nẹ aye ine nyerẹn uvuẹn otọrakpọ na. Wu na sabu se kpahen ihworho enana uvuẹn Hebrews urhomu-ẹmro 11. Idibo Osolobrugwẹ ri hwuru ọke ọwan na vwo? Aye i ji ha usuẹn “evwata na,” omarana, ana rhọmọ aye.

19. Ayọmo yẹ “eri vwe rhiẹ evwata”? Uphẹn ọgo yi Jehova ọnọ yẹ aye?

¹⁹ Usuẹn “eri vwe rhiẹ evwata” yẹ iduduru ihworho buebun ri vwe vwo uphẹn rẹ aye ine yono kpahen i Jehova. Dedevwo aye i hwu ne, aye a ji sẹrẹ i Jehova ẹro-o. Ọye ọnọ rhọmọ aye nẹ uhwu, aye ni ne vwo uphẹn rẹ aye ine yono kpahiẹn jeghwai ga ye.

20. Mesoriẹ ana ja rhọmọ ihworho ephian?

²⁰ Ọnana no mevirhọ taghene kohworho kohworho ro hwuru ya na rhọmọnuhwu? Ẹjo. Jesu ọ tare taghene ihworho ezẹko i vwa samọ rhọmọnuhwu-u. (Luke 12:⁠5) Ọrọmo yo no brorhiẹn sẹ ana rhọmọ ohworho yanghene a rhọmiẹ-ẹ? Jehova yo no brorhiẹn rọ koba, ọrẹn ọ jeghwai ha omẹgbanhon na rẹn i Jesu “no rhiẹ oguẹnzọn ihworho re nyerẹn ọrhẹ eri hwuru.” (Acts 10:42) Kohworho kohworho re brorhiẹn kpe taghene ọvwọkon ro vwo vwo omwemẹ rọ nọ ghwẹriẹ, a vwa samọ rhọmiẹ nẹ uhwu-u.—Se Iyẹnrẹn Ra Habaye 19.

ẸRHỌMỌNUHWU RIẸ ODJUWU

21, 22. (a) Me yo mevirhọ ra na rhọmọ ohworho riẹ odjuwu? (b) Ọrọmo ye kiki rhọmọ riẹ odjuwu?

²¹ Baibol na ọ tare taghene ihworho ezẹko ine nyerẹn obẹ odjuwu. Arha rhọmọ ohworho riẹ odjuwu, a vwa rhọmiẹ rhẹ ugboma onyakpọ-ọ. A rhọmiẹ rhiẹ ohworho ẹhẹn riẹ odjuwu.

²² Jesu yẹ ohworho ukaro ra rhọmọnuhwu uvuẹn izede ọnana. (John 3:13) Ẹdọke esa ọke e kpe i Jesu hin, Jehova nọ rhọme riẹn nẹ uhwu. (Psalm 16:10; Acts 13:​34, 35) A rhọmọ i Jesu rhẹ ugboma onyakpọ-ọ. Ọnyikọ Peter ọ dabu dje yi fiotọre taghene e kpe i Jesu, “ọrẹ ugboma, ọrẹn, a rhọmeriẹn ọrẹ ẹhẹn.” (1 Peter 3:18) Jesu no mo rhiẹ ọmakashe ro vwo omẹgbanhon ọke ra rhọmiẹ! (1 Corinthians 15:​3-6) Ọrẹn, Baibol na ọ tare taghene ọ vwọ samọ rhiẹ ọye ọvo-o.

23, 24. Ayọmo yẹ “ibiẹ igegede” ri Jesu ọ tẹmro kpahen na, aye awan emwa?

²³ Jesu o ki hwu, ọ ta rẹn idibo yi ri sẹrorẹ atamwu kpahiẹn: “Mie ye mwuegbe ekete harẹn are.” (John 14:⁠2) Ọnana o mevirhọ taghene ana rhọmọ idibo yi ezẹko riẹ odjuwu. Awan emwa? Jesu ọ tare taghene aye e bu-un, “ibiẹ igegede.” (Luke 12:32) Ọnyikọ John o se uchunu aye ọke rọ mẹrẹn Jesu “ro mevi oberun Ugbenu i Zion [obẹ odjuwu], awan 144,000 i mevi kẹriẹ.”—Revelation 14:⁠1.

²⁴ Ọke ọgo ya na rhọmọ Ilele Kristi awan 144,000 na? Baibol na ọ ta rẹn ọwan taghene ọnana ọnọ phia ọke i Jesu ọ tuẹn usun rhọ obẹ odjuwu. (1 Corinthians 15:23) Ọwan e nyerẹn uvuẹn ọke ọrana ne, a rhọmọ buebun usuẹn 144,000 na riẹ odjuwu ne. Eri hẹrhẹre usuẹn aye uvuẹn ọke ọwan na i rhe hwu, ana rhọmọ aye riẹ odjuwu ogege. Ọrẹn, ọke rọ sa na a samọ rhọmọ otu buebun rhiẹ i Paradais uvuẹn otọrakpọ na.

25. Me ye ne yono kpahen uvuẹn urhomu-ẹmro rọ ha kpahen ọnana?

²⁵ Phẹrẹkpẹ, Jehova ọ samọ simi ituakpọ nẹ abọ uhwu, uhwu nọ samọ nie bẹmẹdẹ! (Se Isaiah 25:⁠8.) Ọrẹn, me yẹ ihworho ri ne riẹ odjuwu ine ru oboran? Baibol na o djerie fiotọre taghene aye ine lele i Jesu sun uvuẹn Uvie na. Ọwan ine yono riobaro rhọ kpahen Uvie ọrana uvuẹn urhomu-ẹmro rọ ha kpahen ọnana.