UYONO 30
Eri wu Vwo Ẹguọlọ Kpahen Ina Sabu Rharhumu Nyerẹn!
Uhwu ọ lẹrhẹ ihworho viẹ omamọ jeghwai mwuomarhọ. Ọnana yọ soriẹ i Baibol na o se uhwu ọvwreghrẹn. (1 Corinthians 15:26) Wu yonorin uvuẹn Uyono ọrẹ 27, taghene i Jehova ono fiẹ ọvwreghrẹn ọnana kparobọ. Ọrẹn, me yọ nọ phia rẹn ihworho ri hwu ne? Uvuẹn uyono ọnana, wu ne yono riarorhọ kpahen igbevwunu i Jehova ọrọrọ, nọyẹ, ọrẹ ọnọ rhọmọ ihworho buebun ri hwuru, neneyo aye i riamerhen akpenyerẹn bẹmẹdẹ. Ọye ọnọ rhọmọ aye nuhwu! Ọrẹn, ọrana ọnọ sabu phia? Ọnọ rhọmọ aye riẹ odjuwu gbinẹ otọrakpọ na?
1. Me yi Jehova ọ guọlọ ru rẹn eri vwo ẹguọlọ kpahen ri hwuru?
Jehova ọ hẹrhẹ ọke rọ nọ rhọmọ eri hwuru rhiẹ akpọ. Job ro rhiẹ ọhworhare rọ fuevwan, o vwo imwẹro na taghene Osolobrugwẹ ọ vwọ samọ sẹrerhumuje vwo orho hwu-u. Nọ ta rẹn Osolobrugwẹ: “Wu ne se, ni mi na kpahenrhọ wẹn [nẹ uvuẹn Usin].”—Se Job 14:13-15.
2. Marhẹ e ru rhe taghene ana sabu rhọmọ eri hwuru?
Ọke i Jesu ọ ha uvuẹn otọrakpọ na, Osolobrugwẹ ọ yẹriẹ omẹgbanhon nọ rhọmọ ihworho ri hwuru. Jesu ọ rhọmọ ọmọ ọgbọtọ rọ ha ẹgbukpe 12, ọrhẹ ọmọ ọhworhare ọmase uku rhiẹ akpọ. (Mark 5:41, 42; Luke 7:12-15) Ọke oru, Lazarus ro rhiẹ ugbehian i Jesu no hwuru. Dedevwo ẹdọke ẹne i vrẹn nẹ ri Lazarus o hwu, ra jeghwai sien ne, Jesu nọ rhọmeriẹn rhiẹ akpọ. Ọke i Jesu ọ nẹrhomo vwe Osolobrugwẹ hin, nọ tare uvuẹn ekete usin na: “Lazarus, vẹnrẹn rhe!” Omarana, “ọhworhare ro hwuru na no vẹnrẹn rhe,” o nyerẹn ne! (John 11:43, 44) Gbe roro kpahen oborẹ oma ọ merhen ekrun ọrhẹ igbehian i Lazarus te, ọke aye a mẹriẹn!
3. Ifiẹrorhọ ọgo yọ havwiẹ rẹn eri wu vwo ẹguọlọ kpahen ri hwuru?
Baibol na no veri: “Ono vwo ẹrhọmọnuhwu.” (Acts 24:15) Ihworho ri Jesu ọ rhọmọ nuhwu ọke ahwanren, e riẹ odjuwu-u. (John 3:13) Oma ọ dabu merhen aye taghene a rhọmerẹ aye rhiẹ otọrakpọ na. Omaran ọ ji havwọ, phẹrẹkpẹ, Jesu ọnọ rhọmọ ihworho buebun ri na riamerhen akpenyerẹn bẹmẹdẹ uvuẹn i paradais uvuẹn otọrakpọ na. Ọye ọ tare taghene, “ọsoso ihworho ri ha uvuẹn usin okarorhọ,” nọyẹ, tobọ te ihworho ri sẹrẹ ọwan ẹro ne, Osolobrugwẹ ọnọ karorhọ aye, jeghwai rhọmọ aye nuhwu.—John 5:28, 29.
YONO KODO RHỌ
Yono oborẹ o djerie phia uvuẹn i Baibol na taghene i Jesu o vwo omẹgbanhon rọ nọ rhọmọ ihworho ri hwuru. Yono oborẹ ẹrhọmọnuhwu na ono ru yọ urhebro ọrhẹ ifiẹrorhọ.
4. Jesu o djerie phia taghene ọnọ sabu rhọmọ ihworho ri hwuru
Yono riaro kpahen oborẹ i Jesu o ru harẹn ugbehian yen Lazarus. Se John 11:14, 38-44, orho ru, are i gba kpahenrhọ enọ enana:
Marhẹ e ru rhe taghene i Lazarus o ghini hwu?—Se oghwẹmro 39.
Orhianẹ i Lazarus o ghini riẹ odjuwu, wu rorori taghene manẹ i Jesu ọ rhọmiẹ rhiẹ otọrakpọ na?
5. Ana rhọmọ ihworho buebun nuhwu!
Se Psalm 37:29, orho ru, are i gba kpahenrhọ onọ ọnana:
Bọgo yẹ iduduru ihworho ra na rhọmọnuhwu ine rhirhiẹ?
Orhiẹ ihworho ri ga i Jehova ọvo yi Jesu ọnọ rhọmọnuhwu-u. Se Acts 24:15, orho ru, are i gba kpahenrhọ onọ ọnana:
Ọrọmo ye wu guọlọ mẹrẹn ra na rhọmọnuhwu?
Roro kpahen ọnana: Jesu ọnọ sabu rhọmọ ohworho ro hwuru phẹphẹrẹ jerẹ oborẹ ọsẹ ọ rhọmọ ọmọyen nẹ omerhẹn
6. Ẹrhọmọnuhwu na ọnọ sabu yọ urhebro ọrhẹ ifiẹrorhọ
Iyẹnrẹn i Baibol na kpahen ọmọ ọgbọtọ i Jairus ọ yẹ ihworho urhebro, jeghwai bọn ere mwuomarhọ gbanhan. Se ikuegbe na uvuẹn i Luke 8:40-42, 49-56.
Bọmọke i Jesu ọ ki rhọmọ ọmọ ọgbọtọ i Jairus, nọ ta rẹn ọsẹ ye: “Wu vwa zofẹ-ẹn, ghwai vwo esegburhomẹmro.” (Se oghwẹmro ọrẹ 50.) Marhẹ ifiẹrorhọ kpahen ẹrhọmọnuhwu na ono ru ha userhumu wẹn . . .
ọke ohworho wu vwo ẹguọlọ kpahen orho hwu?
orhianẹ arhọ ọnọ ọ ha uvuẹn erhirhiẹ imwofẹn?
Kporo IVIDIO na, orho ru, are i gba kpahenrhọ onọ ọnana.
Marhẹ ifiẹrorhọ ẹrhọmọnuhwu na o ru ha urhebro rẹn eri vwiẹ i Phelicity, jeghwai bọn aye gbanhon?
OBORẸ IHWORHO EZẸKO A TA: “Mi sabu vwo imwẹro na taghene eri mi vwo ẹguọlọ kpahen ri hwuru ina rharhumu nyerẹ-ẹn.”
Me wu rorori?
Ekete i Baibol ọgo ye wu na ha djephia taghene ẹrhọmọnuhwu ono rhirhiẹ ye?
ME WU YONORIN?
Baibol na o veri taghene ana rhọmọ iduduru ihworho ri hwuru. Jehova ọ guọlọre nẹ aye i rharhumu nyerẹn, ọye o ji tiobọnu omẹgbanhon rẹn i Jesu rọ nọ rhọmọ aye nuhwu.
Ẹzẹkoko
Marhẹ oma o ruẹ i Jehova ọrhẹ i Jesu rẹ aye ina rhọmọ eri hwuru rhiẹ akpọ?
Bọgo yẹ iduduru ihworho ra na rhọmọnuhwu na ine rhirhiẹ, odjuwu gbinẹ otọrakpọ na? Mesoriẹ wa ta omaran?
Mesoriẹ o mwuẹro taghene eri wu vwo ẹguọlọ kpahen ri hwuru ina rharhumu nyerẹn?
GUỌLỌ IYẸNRẸN ERỌRỌ
Yono kpahen oborẹ ọnọ ha userhumu wẹn nyerẹnghele omemwurhọ.
Iruemru-urhi i Baibol ọnọ ghini sabu ha userhumu rẹn ohworho ro mwuomarhọ?
Marhẹ emọvwerhe ine ru nyerẹnghele uhwu ohworho aye i vwo ẹguọlọ kpahen?
O vwo erẹ ana rhọmọnuhwu riẹ odjuwu? Ayọmo ya na ja rhọmọnuhwu?