OBỌRẸ FIVE

Rharhumu Bru “Osuingegede Ọrhẹ Ọrọ Hẹrote Arhọ Are Na”

Ovwẹ owu usuẹn ebẹnbẹn re dje kpahen uvuẹn ibroshọ ọnana ro se kpahuọn? Orho rhiẹ omaran, rhe taghene ọrhẹ owẹwẹ ọvo-o. Idibo Osolobrugwẹ ri vwẹ esegburhomẹmro buebun—ọke rẹ aya i Baibol rhẹ ọke ọnana—i mẹrẹn ebẹnbẹn ẹruẹ enana. Jerẹ oborẹ i Jehova ọ yẹ raye userhumu ha fiẹ ebẹnbẹn kparobọ yẹdẹ ran, omaran ọnọ ji sabu rhirhiẹ ha wẹn.

Jehova ono mevi hawẹn wu rha rharhumu brie rhe

JE NẸ o mwẹnro taghene Jehova ono mevi hawẹn, wu rha rharhumu brie rhe. Ọye ọnọ hẹ userhumu wẹn fi ọfiamo kparobọ, ti evwan-ebiomu nẹ ẹhẹn, lẹrhẹ ẹhẹn ọnọ totọre, jeghwai lẹrhuọ vwo obrorhiẹn ẹhẹn ro fiotọre. Ne wu na rharhumu vwo ẹhẹn re wu ne rhe kuomakugbe awọrọ, rha ga i Jehova. Erhirhiẹ wu havwọ ọnọ sabu họhọ aruẹ ọrẹ Ileli Kristi ezẹko uvuẹn ẹgbukpe uzusiorin ọrukaro yẹdẹ, rẹ ọnyikọ Pita ọ ya vwe taghene: “Are i họhẹ igegede re beghe, ọrẹn wanana, are i rharhumu bru osuingegede ọrhẹ ọrọhẹrote arhọ are na ne.”—1 Peter 2:25.

Ẹrharhumu bru i Jehova nya yẹ oborẹ ọmai rhomu re wu na sabu ru. Mesoriẹ? Wu na lẹrhẹ ọmudu i Jehova ghọghọ. (Proverbs 27:11) Jerẹ obore wu rheri vẹrhẹ, Jehova o vwẹ oma-eririon, fọkiẹ omaran na, oborẹ ọwan eruẹ ọ sabu teyi ẹhẹn. Jerẹ oborẹ ọhavwọ, Jehova ọvwọ gba ọwan vwo ẹguọlọ kpahien, yanghene ga ye-e. (Deuteronomy 30:19, 20) Ọhworhare owu ro yono kpahen i Baibol o djerie izede omana: “Ọwọrọ ọ sabu je ọmudu ọnọ na-a. Wẹwẹ ọvo yẹ ena sabu je yi.” A rha ga i Jehova rhẹ ọmudu rẹ ẹguọlọ ọ havwọ, ọmudu ame nẹ ọnọ sabu jefirhọ. Erhe ruẹ ọnana, jẹ ọwan a yẹ ye omamẹ emru ne—atamwu ọwan—nẹ ana lẹrhẹ ọmudu ọnẹyen ghọghọ omamọ. Ọrẹ imwẹnro, ovwo oborẹ ana ha vwanvwọn omamerhomẹ rẹ ana mẹrẹn, arha ha ẹga ro fori harẹn i Jehova-a.—Acts 20:35; Revelation 4:11.

Oleli kristi ọmase furhiemu arharhumu dede rhiẹ ukoko na sasasa

Riobaro rhọ, wu rha tuẹn ẹga Ileli Kristi rhọ ne, evwan nẹ ọnọ vuọn ọrẹ ẹhẹn. (Matthew 5:3) Izede ọgo? Ituakpọ a nọ sẹ, ‘Mesoriẹ ame fọkiẹ ha uvuẹn akpọ na?’ Orhọmo ẹkpahenrhọ harẹn enọ ri sekpahen oborẹ a fọkiẹ ma akpọ, o kpe aye. Ọdamẹ ọrana o gberẹ ituakpọ, nime Jehova ọ hariẹ ba ye ma. Ọ ma rọwan izede rẹ ana mẹrẹn evwan-ẹvuọn nyoma ẹga rẹ ọwan a hariẹn sa. Ovwo oborẹ ọnọ sabu vuọn ọwan evwan te ọrẹ ene rhe taghene ẹguọlọ ọyẹ ọro mwọwan ha ẹga harẹn i Jehova-a.—Psalm 63:1-5.

Biko rhe taghene i Jehova ọ guọlọre ne wu rharhumu bru ọye rhe. Me ọnọ lẹrhiẹ mwo ẹro? Rorie: A hariẹ ru ẹrhomo nẹ eki ru ibroshọ ọnana. Ọkezẹko, Ọkpako Ukoko yanghene omizu ọrọrọ yọ hariẹ wẹn. Ẹhẹn ọnọ no seruo ne wu seyi, ne wu jeghwai ru kpahen oborẹ ọ ha uvuen. Enana ephian na i djerie phia taghene wẹwẹ a je sẹrẹ i Jehova ẹro-o. Ukpe rono rhiomaran, ọye o tio bọrọbọrọ kẹrẹ-oma.—John 6:44.

Udu ọwan ọnọ sabu gbanhon, rẹ erhe taghene idibo i Jehova ri vruru evwa sẹriẹ ẹro-o. Ọrana yẹ oborẹ omizu ọmase owu re sẹ Donna ọmẹrẹn vwrurhe. Nọ tare: “Me lọrẹ oma ha bibiesuọn nuvuẹn urhomẹmro na, ọrẹn ọke buebun, ni mie roro kpahẹn oborẹ ọ ha ọbe Psalm 139:23, 24, rọ tare: ‘Ni mẹ fiotọre, Ee Osolobrughwẹ, ne wu rhe ọmudu mẹ. Nie sẹ mi vwẹ izede ọvwiavwia uvuẹn ẹhẹn mẹ, ne wu sun mẹ lele izede ọrẹ ibẹmẹdẹ.’ Mi rheri taghene ọrhẹ obọrẹ akpọ na yẹ mi havwọ-ọ—ekwakwa ye e serhọ ha mẹ-ẹ—mi jeghwai rhe taghene ukoko i Jehova yẹ o fori taghene mi rhirhiẹ. Ni mia mẹriẹn taghene i Jehova ọmwobọ sẹrerhumu ji mẹ-ẹ; mẹmẹ ye na gbẹn izede re mi na nya rharhumu brie. Oma ọ merhen re mẹ taghene mi ru ọnana!”

“Ni mia mẹriẹn taghene i Jehova ọmwobọ sẹrerhumu ji mẹ-ẹ; mẹmẹ ye na gbẹn izede re mi na nya rharhumu brie”

Ame hariẹ ru ẹrhomo nẹ, ọrurhomẹmro taghene wẹwẹ i je rharhumu mẹrẹn “aghọghọ ọrẹ i Jehova.” (Nehemiah 8:10) Wu vwa sa mo kperẹ oja, wu rha rharhumu bru i Jehova rhe-e.

Ekpahenrhọ Harẹn Enọ Ri Se Kpahen Erharhumu Bru I Jehova

TẸGO MI NA NYA TONRHỌ?

Bibiesuọn bibiesuọn yẹ oma ohworho ro kpomẹ emiamo ọrẹ ugboma ọsasa. Omaran ọji havwọ, wu na je sabu vwo osasame Oleli Kristi, wa rha ria ibibiesuọn usuẹn emaren ẹhẹn na kẹdẹkẹdẹ. Wu ne roro taghene ghwai ukwọgbọ, ọye wu ne ru ikemrukemru-u. Ọkezẹko, wu na sabu ha ibiẹ iminiti ezẹko se i Baibol na, kerhọ ikpekporo yi, yono owu usuẹn ẹbe ukoko ọwan, jeghwai ro uvuẹn Iwẹbsaiti jw.org yanghene tv.jw.org. Je damoma ne wu rhe riẹ uyono ukoko ogege. Maido, nekpẹn userhumu mie i Jehova izede ọrẹ ẹrhomo. “Hẹ ọsoso ọfiamu ọnọ ha dọn ye, nime ọye ọ damerhọ owẹwẹ.”—1 Peter 5:7.

“Ọkerẹ ẹga mẹ o ru furhiemu, ofa nẹ ọro mẹ re mi na nẹ ẹrhomo. Ri mie fiudugbere nẹ ẹrhomo, ọkpako owu rọ ha ekete ri mie rhirhiẹ nọ mọ nekpen mẹ. Nẹ ọ hẹ userhumu ha mẹ sabu mẹrẹn vwrurhe taghene i Jehova ọ je kparẹ iroro vrẹn mẹ-ẹ. Ọkpako na nọ djiroro ha mẹ taghene mi na sabu tonrhọ rhẹ i Baibol e se kẹdẹkẹdẹ. Ri mie ru ọnana, ni mi sabu vwo oruru rharhumu riẹ iyono ukoko. Ojiri-i, ni mi rharhumu tuẹn owian aghwoghwo na rhọ. Oma ọmerhen re mẹ taghene i Jehova ọ kparẹ iroro vrẹn mẹ-ẹ.”—Eeva.

MARHẸ UKOKO NA INE NI MẸ RHỌ?

Je nẹ o mwẹnro taghene ihworho re ha uvuẹn ukoko na ine deduo ghwologhwolo. Ukpe rẹ aye ine nuo sakamu, yanghene ha guẹzọn, aye ine djephia taghene aye i vwẹ ẹguọlọ kpahuọn, jeghwai lẹrhẹ uduo gbanhon.—Hebrews 10:24, 25.

“Ofa ọroro mẹ ọke ri mie tu ruẹ uvuẹn Aghwẹlẹ Uvie. Ni mie roro aruẹ ukẹro rẹ imizu ina ha ni mẹ. Omizu ọmase ro tẹ omirẹghwa ne owu, rọ ha ukoko na tẹ ẹgbukpe 30 ne, nọ ta mẹ taghene, ‘Wu ha oghwa ne, Ọmọ mẹ!’ Ẹmro ọrana oghini te mẹ ọmudu. Ọrurhomẹmro, mi ghini ha oghwa ne.”—Javier.

“Ọkerẹ mie tẹ Aghwẹlẹ Uvie, ni mi ye siyẹ urhie oberhumu nẹ ohworho owuorowu ojorho ni mẹ so. Dede na, buebun ri rheri mẹ uvuẹn uyono ọke emọvwerhe iji vwrurhe mẹ. Aye ni dediri mẹ rhorhomu, nọ lẹrhẹ ẹhẹn mẹ totọre. Nẹ ọhọhọre taghene me ha uvuẹn oghwa mẹ ne.”—Marco.

MARHẸ EKPAKO NA INE RU HẸ USERHUMU MẸ?

Ekpako na ena hẹ ukẹro esiri ha nuo. Aye ine jiruo fọkiẹ ẹhẹn re wu na rharhumu rhọmọ “ẹguọlọ ọrukaro re wu vwori na.” (Revelation 2:4) Aye ine dje aruẹdọn phia hẹ userhumu wẹn sabu kpọ obore wu ru sọ ephian vi, rhẹ “ẹhẹn bọrọbọrọ.” (Galatians 6:1; Proverbs 28:13) Ekpako na ena vwo ẹkwaphiẹrhotọre nẹ ohworho orho leluo yono, rhẹ ẹbe jerẹ Draw Close to Jehovah or “Keep Yourselves in God’s Love.” Vwo imwẹnro taghene ekpako ena hẹ udu rhọ aghwẹ, jeghwai hẹ obọ tua omẹ ọsoso idjaghwẹ re wu na kpare.—Isaiah 32:1, 2.

“Uvwre ẹgbukpe ẹrẹnren rẹ ẹga mẹ ọ havwọ furhiemu na, ekpako na nẹ adamoma rẹ aye ine se mẹ te oma. Ẹdukwẹdẹ, ọkpako owu no djẹ ifoto rẹ ọye ọ ha rame ha mẹ. Ifoto na nọ lẹrhe re mẹ karorhọ ekwakwa buebun rọ lẹrhẹ aghọghọ ri mi vwori ọke ri mia ga i Jehova bri rharhumu ti mẹ uhrun. Ekpako na ne nyoma ẹguọlọ hẹ userhumu mẹ rharhumu sasa ọrẹ ẹhẹn.”—Victor.

“Ọye Ono Ruo Gbanhon”

Ọbe ijoro ọwan, Sing to Jehovah, ovwẹ ijoro buebun ra merhẹn ọwan oma, rẹ ọyẹ ọwan urhebro, je hẹ udu rẹ ọwan aghwẹ, re wa guọlọ tuẹn owian ọrẹ ẹhẹn na rhọ. Gbe roro kpahiẹn, jerẹ udje, ẹmro re ha ijoro ikekele 60. Re ti nẹ 1 Peter 5:10 rhe, urhomẹmro ijoro na ọyẹ, “Ọye Ono Ruo Gbanhon.”

Ovwo ‘bo r’ọsoriẹ Jehov’ọ h’ẹmriẹn wẹn.

O seruo nuvu’ okuku rhiu de.

Uvu’ẹhọn nọ mẹrẹn ọdamẹ wu vwori

Wu na guọliẹ ji ru’oborọ gbare.

Wu veri re wu ne ru’ọdamẹ yen;

Ọ hobọ tua, ọnọ rharhumu rue.
’Solobrugwẹ ọ hẹ ọmọ ‘nẹyen hawẹn;

Nọ guọlọre ne wu fikparobọ.

Orho rhio borọ vwọ nya j’ọmọ ‘nẹyen vwo,

Ọnọ jeghwai h’omẹgbanhon ha wẹn.

Obore wu ruru’ọsẹriẹro rẹ;

Ono ji hẹrot’ọsosu’enẹyen.

(IKORỌS)

Ọ dẹruọ nyomi Jesu, wẹ nọ ri Jehova.

Ono ruo mevi ono ji ruo gbanhon.

Ono suon je hẹroto, j’oborọ havw’eruo.

Ono ruo mevi, ono ji ruo gbanhon.

Ne wu sabu kerhọ oborẹ a hẹ unu so ijoro Uvie na erọrọ, gba hiẹn riẹn www.jw.org. Gbe nẹ obotọre PUBLICATIONS > MUSIC.