ONO 7
Marhẹ Mi Ne Ru Sabu Tiẹn Ọhiẹn Ọfanrhiẹn?
ME ỌYẸ WU NE RU?
Roro kpahen erhirhiẹ ọnana: Ibiamo eva ne yẹ Heather ọ mẹrẹn i Mike, ọrẹn ọ họhọre taghene o jiri ne rọ mẹriẹn. Aye ọwan a nyoma ifonu dje urhomu vwe oma aye ọke ephian, aye a ha ọke jijiri tẹmro kuẹgbe uvuẹn ifonu, aye a sabu tobọ ta oborẹ ọ ha ẹhẹn aye uhwọgbọ. Ọrẹn oborẹ i Mike ọ guọlọre, ọ ghwẹ ẹmro ẹ ta ọvo.
Uvuẹn ibiamo eva re vrẹnre na, Mike ọrhẹ Heather a nya tan abọ jeghwai fiọnfiọn unu ọkezẹko. Heather ọ guọlọ ru ghwẹ ọrana-a. Ọrẹn ọ guọlọ nẹ i Mike ọ va ye obọ-ọ. Mike ọvo yọ rọ lẹrhẹ oma merhiẹn san. ‘Habaye’, Heather nọ ta rẹn omayen, ‘mẹmẹ rhẹ Mike i vwo ẹguọlọ kpahen oma ame . . . ’
Wu rha do te edje wu ne lele idama kọn jeghwai ha uvuẹn erhirhiẹ ọrẹ Heather, me ọyẹ wu ne ru?
ZIKẸN NE WU RORO!
Ehware ẹghẹlẹ ro nẹ obẹ Osolobrugwẹ rhe harẹn eri rọmọ ne ọvo. Ehware e bru e ki te edje orọmo, o dje ọghọ phia rẹn ẹghẹlẹ ọrana-a. Ọ họhọ omamọ evwun ra yẹ ruọ, re wa ha ru ovwẹrowẹn
Wu rhe gbe urhi ro suẹn ekwakwa ra maren ghwu, jerẹ urhi rọ sabu lẹrhẹ oborẹ o rierun seriotọre, wu na rioja oborẹ ono nẹ erhumie rhe. Omaran ono ji rhirhiẹ wu rhe gbe urhi ro suẹn uruemru ghwu, jerẹ urhi rọ tare: ‘Kẹnoma rẹn ọfanrhiẹn.’—1 Thessalonians 4:3.
A rha tiẹn akama ọrana, me ọyẹ ono nẹ erhumie rhe? Baibol na ọrhọ ta: ‘Kohworho kohworho ro ruẹ irueru ọfanrhiẹn, o ruẹ ọdandan hasuẹ ugboma yen.’ (1 Corinthians 6:18) Marhẹ ọrana o rhiẹ urhomẹmro?
Ihworho ra guọlọ otọre emru, i mẹrẹnvwrurhe taghene usuẹn oborẹ iphuphẹn buebun ri bru ehware aye i ki te edje orọmo i mẹrẹn ne, yẹ:
EMIAMIAMO. Iphuphẹn buebun ri bru ehware aye i ki te edje orọmo, i tare taghene ọ darẹ aye omamọ.
JẸ ẸRUẸHASO E VWO. Aye i rhe gbọfanrhiẹn hin, aye ọwan ne roro, ‘Ọrọmo yo lele gbọfanrhiẹn vrẹn omẹmẹ ne?’
ỌPHIẸRHỌ. Itiọrurhomẹmro, egbọtọ buebun e guọlọ ohworho rọ nọ hẹrote aye, orhiẹ ọrẹ ono sehiẹn aye-e. Idama buebun a guọlọ ọgbọtọ rẹ aye lele gbọfanrhiẹn ne-e.
Obẹta ye: Wu rhe bru ehware wu ki te edje orọmo, we dje ọghọ rẹn oma-a, nime wu kpare oborẹ ọghanranren fughwẹ. (Romans 1:24) Ugboma ọnọ ọghanren vrẹn oborẹ wu na kpare fughwẹ!
Djephia taghene wu vwo omẹgbanhon wu na ‘kẹnoma rẹn ọfanrhiẹn.’ (1 Thessalonians 4:3) Orhoru, wu rha rọmọ, wu na sabu lele ọrẹ wu rọmọre na bru ehware. Ne wu na sabu ru omaran dẹn, ẹhẹn orho kpokpuo-o, wu rha viẹ oja-a, ofẹn oborẹ o nẹ erhumu ehware ebru e ki te edje orọmo orho mwuo-o.—Proverbs 7:22, 23; 1 Corinthians 7:3.
ME ỌYẸ WU RORORI?
Ohworho ro ghini vwo ẹguọlọ kpahuọn ọnọ ha ẹkuọn ugboma ọrhẹ ọrẹ ẹhẹn wẹn?
Ohworho ro ghini vwo ọdamẹ kpahuọn ono gboghwẹ rhẹ onyerẹnkugbe ọnọ rhẹ Osolobrugwẹ?—Hebrews 13:4.