ENỌ IPHUPHẸN A NỌ
Me yi Baibol na ọ ta Kpahen Irueruo Ehware ra ha Ugbunu Ruẹ?
Lele oborẹ ọ ha uvuẹn iyẹnrẹn ọrẹ U.S. Centers for Disease Control and Prevention, joma ohwobọ iphuphẹn ri ha uvwre ẹgbukpe 15 fiẹ 19 re rhonmie, i vwobọrhọ irueruo ehware ra ha ugbunu ruẹ ne. Sharlene Azam rọ ya ọbe na Oral Sex Is the New Goodnight Kiss nọ tare taghene, “Wu rhe lele iphuphẹn ta kpahen oghwẹmro ro sekpahen [irueruo ehware ra ha ugbunu ruẹ] aye na ta taghene o vwo oborẹ ọsọre vwọye-e. Aye i vwa tobọ nie taghene ehware-e.”
Me wu rorori?
Ẹkpahenrhọ ọgo yọ gbare usuẹn enọ ri ha obotọre na?
Ọgbọtọ ọnọ sabu mẹrenvwan nyoma irueruo ehware ra ha ugbunu ruẹ?
Ee
Ẹjo
Irueruo ehware ra ha ugbunu ruẹ ọnọ sabu suẹ emiamo rẹn ohworho?
Ee
Ẹjo
Irueruo ehware ra ha ugbunu ruẹ ghini ehware?
Ee
Ẹjo
Me yẹ urhomẹmro na?
Ha ẹkpahenrhọ ọnọ vwanvwọn eri ha obotọre na.
Ọgbọtọ ọnọ sabu mẹrenvwan nyoma irueruo ehware ra ha ugbunu ruẹ?
Ẹkpahenrhọ: Ẹjo. Ọnana yọ soriẹ ihworho buebun a ta taghene irueruo ehware ra ha ugbunu ruẹ ọ sọ-ọ, ọrẹn ọ sọre.
Irueruo ehware ra ha ugbunu ruẹ ọnọ sabu suẹ emiamo rẹn ohworho?
Ẹkpahenrhọ: Ee. Ohworho ro ruẹ irueruo ehware nyoma ugbunu, ọnọ sabu vwo emiamo jerẹ hepatitis (A yanghene B), genital warts, gonorrhea, herpes, HIV, ọrhẹ syphilis.
Irueruo ehware ra ha ugbunu ruẹ ghini ehware?
Ẹkpahenrhọ: Ee. Irueruo ephian ro sekpahen eghọn ehware ọwọrọ jẹ ehware, ọrhọ tobọ rhianẹ ehware, irueruo ehware ra ha ugbunu ruẹ, ọrẹ a gbe ọphioro, ọrhẹ ọrẹ a ha obọ lerhe oghọn ehware awọrọ.
Mesoriẹ o fiemru?
Roro kpahen ekete i Baibol ezẹko ri ta kpahen irueruo ehware ra ha ugbunu ruẹ.
Baibol na ọrhọ ta: “Ọnana yẹ ọhọre Osolobrugwẹ, taghene are i . . . kẹnoma rẹn irueruo ọfanrhiẹn.”—1 Thessalonians 4:3.
Ẹmro ọrukaro ra rhian rhẹ “ọfanrhiẹn” o sekpahen irueruo obẹlẹme ephian rẹ awanva ri vwe rhiẹ esa yanghene ane e ruẹ tobọ te ehware, irueruo ehware ra ha ugbunu ruẹ, ọrẹ a gbe ọphioro, ọrhẹ ọrẹ a ha obọ lerhe oghọn ehware awọrọ. Ohworho ro vwobọrhọ irueruo ọfanrhiẹn, ọnọ sabu rioja omamọ, ọrọ mai biomu, orho vwo omamọ onyerẹnkugbe rhẹ i Jehova-a.—1 Peter 3:12.
Baibol na ọrhọ ta: “Kohworho kohworho ro ruẹ irueruo ọfanrhiẹn, o ruẹ ọdandan hasuẹ ugboma yen.”—1 Corinthians 6:18.
Irueruo ehware ra ha ugbunu ruẹ, ọ suẹ emiamo, jeghwai ghwọghọ onyerẹnkugbe ohworho o vwori rhẹ Osolobrugwẹ. Ọ ji hobọte ohworho ọrẹ iroro. Ọbe na Talking Sex With Your Kids ọrhọ ta, “Ihworho ri bru ehware aye i ki rọnmọ a vioja omamọ, aye e ji roro taghene ọro lelirẹ aye bru ehware na o vwo ọdamẹ kpahen aye-e. Aruẹ irueruo ehware ephian ọ lẹrhẹ ohworho roro omaran. O toro oborẹ e rurie lele-e.”
Baibol na ọrhọ ta: “Mẹmẹ, Jehova, yẹ Osolobrugwẹ are, Ohworho ro yono are nẹ are i mẹrẹn erere harẹn omobọ are.”—Isaiah 48:17.
O mwuruon ẹro taghene irhi Osolobrugwẹ kpahen ehware ọnọ rhua erere vwo? Gbinẹ we roro taghene aye i vwa lẹrhuọ vwo ugbomọphẹ-ẹ? Ne wu sabu kpahenrhọ enọ erana, roro kpahen izede rẹ imoto buebun a ghwa omamọ, ro ji vwo eka ro dje oborẹ ana ghwa gbanhon te, ọke ra na dobọji, ọrhẹ ọke ra na ghwa. We nie taghene eka erana a lẹrhuọ je vwo ugbomọphẹ-ẹ, gbinẹ aye a sẹroruọ? Me yọ nọ phia orhianẹ wẹwẹ yanghene awọrọ e ru lele eka erana-a?
Irhi re suẹn izede, e gberẹ ughwru rhẹ ugbomọphẹ wu vwori, ọrẹn aye a sẹroruọ. Omaran ọ ji havwọ, irhi Osolobrugwẹ e gberẹ ughwru rhẹ ugbomọphẹ wu vwori, ọrẹn aye a sẹroruọ
Omaran irhi Osolobrugwẹ i ji havwọ. Wu rha ten aye, wu na rioja oborẹ ono nerhumie rhe. (Galatians 6:7) Ọbe na Sex Smart nọ tare, “Wu rha tiẹn oborẹ wu vwo imwẹro kpahen ọke jijiri, jeghwai vwobọrhọ irueruo ri vwe serhọ, oma ọrhọ merhuọ-ọn.” Ọrẹ ovẹnẹ, wu rha mọrọn irhi Osolobrugwẹ, ne wu ne vwo omamọ uruemru. Ọrọ mai ghanren, wu ne vwo ẹhẹn obrorhiẹn rọ fonron.—1 Peter 3:16.