Karorhọ ane i Lot

Lot o lele Abraham ro rhiẹ omizu ọsẹ ye rhirhiẹ uvuẹn ẹkwotọre i Canaan. Ọke oru, Abraham ọrhẹ i Lot ni vwo isurhe buebun te erhirhiẹ otọre na o vwo te harẹn aye. Abraham nọ ta rẹn i Lot: ‘Ọwan i sabu rhirhiẹ ekete owu ghwomara-an. Biko djẹ ekete wu guọlọ nya, mẹmẹ ni ne riẹ ekete ọreva ye.’ Abraham o vwo ufiuvwele-e.

Lot nọ mẹrẹn otọre orhorhomu owu rọ kẹrẹ amwa re se Sodom. Ame ọrhẹ odin buebun i ha avwaye. Omarana, Lot nọ djẹ amwa ọrana, ọye ọrhẹ ekrun ọnẹyen ni kwa riẹ avwaye.

Ihworho i Sodom ọrhẹ amwa ọrọrọ rọ kẹreriẹ re se Gomorrah, i biomurun omamọ. Itiọrurhomẹmro, aye i biomurun te erhirhiẹ i Jehova o brorhiẹn taghene ọnọ ghwọghọ aye. Ọrẹn, Osolobrugwẹ ọ guọlọ simi Lot ọrhẹ ekrun ọnẹyen, omarana, no dje emakashe awanva ya ha orhetio rẹn aye, aye ni tare: ‘Are i brokpakpa! Are i vẹnrẹn na amwa ọnana! Jehova ọ samọ ghwọghiẹ.’

Lot o vẹnrẹn ogege-e. Lot no gbeghẹrẹ. Omarana, emakashe na ni sun Lot, aniẹ ọrhẹ emọyen awanva nẹ amwa na, aye ni tare: ‘Are i zorhẹ! Are i simi arhọ are, are i vwe ni oberhumu-u. Are i rhe ni oberhumu, are ine hwuo!’

Ọke aye e te amwa owu re se i Zoar, Jehova nọ ha oso erhanren ghwọghọ Sodom ọrhẹ Gomorrah. Amwa eva erana ni ghwọghọ totọre. Ọke ane i Lot ọ tiẹn uvwele i Jehova jeghwai ni oberhumu, nọ dẹriẹrhiẹ usimo adanwun! Ọrẹn, Lot ọrhẹ emọyen awanva i simirhọ, nime aye i huvwele i Jehova. Ọnọ da aye omamọ taghene ane i Lot ọ huvwele-e. Ọrẹn, oma ọ ji merhen aye, nime aye i nyalele ọkpọvi Jehova.