Jacob ọ ha ive na Riuku

Isaac ọ ha ẹgbukpe 40, ọke rọ rọnmọ i Rebekah. Isaac o vwo ẹguọlọ kpahen i Rebekah omamọ. Ọke oru, Rebekah no vwiẹ ejimẹ ehworhare rẹn Isaac.

Odẹ ọmọ ọkpako na Esau, ọmọvwerhe na yẹ Jacob. Esau ọ kọn riẹ ada omamọ, o ji kpe eranmo omamọ. Ọrẹn, Jacob o rhirhiẹ oghwa omamọ.

Uvuẹn ọke aye, ọmọ ọhworhare ọkpako yọ ha otọre ọrhẹ igho ọsẹ ye riuku. Uvuẹn ekrun Isaac, oborẹ aye a haba riuku yẹ ive i Jehova o ve rẹn Abraham. Esau o vwo ọdaremẹro kpahen ive erana-a, ọrẹn, Jacob o rheri taghene aye i ghanranren omamọ.

Ẹdẹ owu, oma ọ ghwọghọ Esau nẹ ibefi rhe. No sọrhen emaren ri Jacob o sere, Esau nọ tare: ‘Orhọmo o kpe mẹ hwuẹ! Yẹ mẹ usuẹn emaren we sere na!’ Jacob nọ tare: ‘Mi na yọ, ọrẹn, vive mẹ vwẹre taghene mẹmẹ yi na ha ekwakwa enọ riuku.’ Esau nọ tare: ‘Uku erana e fiemru ha mẹ-ẹ! Wu na sabu ha aye riuku. Mi guọlọ riẹ emaren.’ Wu rorori taghene oborẹ Esau o ruru na orhomurun? Ẹjo, o rhomu-u. Esau no tiobọnu emru ọghoghanren fọkiẹ emaren rọ nọ riọ.

Ọke Isaac ọ ho omamọ ne, nọ guọlọ ha ebrurhọ rẹn ọmọyen ọkpako. Ọrẹn, Rebekah nọ ha userhumu rẹn i Jacob ro rhiẹ ọmọvwerhe no vwo ebrurhọ na. Ọke Esau o rhon kpahiẹn, nọ tuekwẹre ọgbogbanhon, nọ djẹ iroro ro no kpe i Jacob. Isaac ọrhẹ Rebekah i guọlọ sẹrorẹ Jacob, omarana, aye ni ta riẹn: ‘Nyarhẹn ye lele omizu izuo re se Laban rhirhiẹ bọmọke ẹhẹn Esau ono zien.’ Jacob ọ huvwele ọsẹ ye ọrhẹ izie, nọ zẹre no simi arhọ ye.