Jacob Ọrhẹ Esau i Kwaphiẹrhọ

Jehova o vive rẹn Jacob taghene ọnọ sẹroriẹ jerẹ oborẹ ọ sẹrorẹ Abraham ọrhẹ Isaac. Jacob o rhirhiẹ uvuẹn amwa re se Haran, avwaye yọ rọnmọ, vwo ekrun ọduado, jeghwai rhiẹ ọdafe.

Ọke oru, Jehova nọ ta rẹn i Jacob: ‘Ghwẹrioma riẹ amwa wu nurhe.’ Omarana, Jacob ọrhẹ ekrun ọnẹyen ni tuẹn ugbo onya rhọ. Ọke aye a nyarhẹn, idibo i Jacob ezẹko, ni bru rie rhe, aye ni ta riẹn: ‘Esau ro rhiẹ omizuo ọrhẹ ehworhare ri te 400 e bro sa!’ Ofẹn no mwu Jacob taghene Esau ọnọ sabu rhua ẹkuọn vwe yi ọrhẹ ekrun ọnẹyen. Jacob nọ nẹrhomo vwe i Jehova: ‘Biko simi mẹ nẹ abọ omizu mẹ.’ Ẹdẹ ọreva ye, Jacob nọ ta rẹn idibo yi nẹ aye i kpare igegede, ẹvwe, inama, ikẹrẹkẹtẹ, ọrhẹ iyesi buebun vwe Esau.

Ason ọrana, ọke i Jacob ọvo ọ havwiẹ, nọ mẹrẹn ọmakashe! Ọmakashe na no lelie wọnrọn. Aye i wọnrọn ye te urhiọke. Dedevwo i Jacob ọ konron, o fiobọrhotọre-e. Ọmakashe na nọ tare: ‘Njaji mẹ vwo, mi nyarhẹn.’ Ọrẹn, Jacob nọ tare: ‘Ẹjo, mi nyajo vwo-o, jokpanẹ wu ha ebrurhọ mẹ.’

Obẹta ye, ọmakashe na nọ ghini yẹ i Jacob ebrurhọ. Jacob no rheri taghene i Jehova ọ vwọ samọ lẹrhẹ Esau ha ẹkuọn vwe yi-i.

Urhiọke ẹdẹ ọrana, Jacob nọ kparughwaro mẹrẹn Esau ọrhẹ ehworhare ri te 400 ra sa. Jacob no brokpakpa zẹ bru Esau, no gburhomu rhotọre riẹn ọgbọ irhiruẹ. Esau nọ zẹ ya vwa i Jacob, nọ gbaleriẹ. Aye awanva na viẹ, aye ni kwaphiẹrhọ. Marhẹ wu rorori taghene oma o ru i Jehova kpahen oborẹ i Jacob o ru kwaphiẹ ẹghwọ na rhọ?

Ọke oru, Esau nọ ghwẹrioma riẹ oghwa ye, Jacob nọ rharhumu tuẹn onya rhọ. E vwiẹ emọ ehworhare awan 12 rẹn i Jacob. Odẹ aye yẹ Reuben, Simeon, Levi, Judah, Dan, Naphtali, Gad, Asher, Issachar, Zebulun, Joseph, ọrhẹ Benjamin. Jehova ọ ha Joseph ro rhiẹ owu usuẹn emọ na, simi ihworho enẹyen. Marhẹ yo rurie lele? Jene yono kpahiẹn.