Ọvrẹn rọ Huvwele Osolobrugwẹ

Joseph ọ ha usuẹn emọ re vwiẹ rẹn i Jacob kperhumu. Imizie ekpako ni mẹrẹnvwrurhe taghene i Jacob o vwo ẹguọlọ kpahen i Joseph omamọ. Marhẹ wu rorori taghene oma o ruru aye fọkiẹ ọnana? Aye na rioma kpahen i Joseph, aye ni jeghwai vwo utuoma kpahiẹn. Ọke i Joseph ọ menemena, nọ ta rẹn imizie kpahen emena na. Aye ne roro taghene emena na o mevirhọ taghene aye ine gburhomu rhotọre rẹn i Joseph. Aye ni me vwo utuoma kpahiẹn omamọ!

Ẹdẹ owu, imizu i Joseph e sun igegede uvuẹn ekete rọ kẹrẹ amwa i Shechem. Jacob no dje i Joseph ye ni oborẹ aye e ruẹ lele. Aye ni kparughwaro mẹrẹn i Joseph rọ sa, aye ni tare: ‘Gbe ni ọrẹ ọmenemena na. Jene kpe yi hwu!’ Aye ni mwu rien jeghwai dorien rhẹ ọgọdọ okokodo. Ọrẹn, Judah, owu usuẹn imizie, nọ tare: ‘Are i vwe kpe yi-i! Jenẹ a rhẹ ye no rhiẹ ọvrẹn.’ Omarana, aye ni rhẹ i Joseph uchunu igho idọlọ efuanfon 20, harẹn ileyi ri nẹ ẹkwotọre i Midian rhe, re riẹ ẹkwotọre i Egypt.

Ọke oru, imizu i Joseph ni dimi ewun i Joseph rhẹ ọbara ẹvwe, aye ni djerie rẹn ọsẹ aye, aye ni tare: ‘Ọnana orhiẹ ewun ọmọ?’ Omarana, Jacob no rorori taghene aranmo rọ djoma o kpe i Joseph ne. Ẹhẹn yen nọ taghare. O vwo ohworho rọ sabu yẹ ye urhebro-o.

Uvuẹn Egypt, na rhẹ i Joseph rẹn ohworho ọduado re se Potiphar, no rhiẹ ọvrẹn riẹn. Ọrẹn, Jehova ọrhẹ i Joseph i ji havwiẹ. Portiphar nọ mẹrẹnvwrurhe taghene i Joseph ọ dabu rhe owian yen, ana ji sabu hẹrosuiẹ. Ọke oru, ne fi Joseph rhẹ ẹrhẹ ohworho rọ hẹrote kemru kemru ri Potiphar o vwori.

Ane i Portiphar nọ mẹrẹnvwrurhe taghene i Joseph o vwo erhumu, ọ jeghwai vwo omẹgbanhon omamọ. Kẹdẹkẹdẹ, nọ ta rẹn i Joseph no lelie gbọfanrhiẹn. Me yi Joseph o ruru? Joseph ọ tenren, nọ tare: ‘Ẹjo! Ọnana ọsọre. Onini mẹ ọ hẹroso mẹ, wẹwẹ aniẹ. Mi rhe leluo gbọfanrhiẹn, ọrana ọdandan rọ haso Osolobrugwẹ!’

Ẹdẹ owu, ane i Portiphar nọ guọlọ gba i Joseph no lelie gbọfanrhiẹn. Nọ sanbọ mwu ewun i Joseph, ọrẹn, Joseph nọ zẹre. Ọke i Portiphar ọ rhiẹ oghwa, aniẹ nọ ta riẹn taghene i Joseph ọ guọlọ gba ye gbọfanrhiẹn. Ọrẹn, ọrana ofian. Portiphar nọ tuekwẹre omamọ, no fi Joseph rhẹ ekanron. Ọrẹn, Jehova ọ kpare iroro vrẹn i Joseph ọke ọrana-a.