Joseph ọ Sẹrẹ i Jehova ẹro-o

Ọke i Joseph ọ ha uvuẹn ekanron, Pharaoh ro rhiẹ orodje Egypt nọ menemena, o vwo ohworho owuorowu rọ sabu rhian emena na-a. Owu usuẹn idibo yi nọ ta riẹn taghene i Joseph ọnọ sabu rhian emena na. Ogege, Pharaoh no dje urhomu vwe i Joseph.

Pharaoh nọ nọ i Joseph: ‘Wu na sabu rhian emena mẹ?’ Joseph nọ ta rẹn i Pharaoh: ‘Egypt ono vwo emaren buebun ọsoso ẹgbukpe irhiruẹ, ọrẹn, orhọmo no no rhirhiẹ ye ẹgbukpe irhiruẹ. Djẹ ọvwẹghwanren ro no koko emaren, neneyo orhọmo o jo rho kpe ihworho enọ.’ Pharaoh nọ kpahenrhọ riẹn: ‘Mi djẹ ruọ! Wu ne rhiẹ ohworho ọreva rọ mai vwo omẹgbanhon uvuẹn Egypt!’ Marhẹ i Joseph o ru rhe otọre emena i Pharaoh? Jehova yọ ha userhumu riẹn.

Joseph nọ dabu koko emaren uvwre ẹgbukpe irhiruẹ na. Orhọmo nọ ghini homaphia lele ọsoso akpọ na ephian jerẹ oborẹ i Joseph ọ tare. Ihworho ni nẹ ekete sansan bru i Joseph rhe, mọ dẹ emaren mie yi. Ọke Jacob o rhon taghene emaren ọ ha uvuẹn Egypt, no dje imizu i Joseph awan ikpe riẹ avwaye ya dẹ emaren.

Aye ni bru i Joseph nya, Joseph o vwrurhe rẹ aye ogege. Ọrẹn, aye e vwrurhe yi-i. Aye ni gburhomu rhotọre riẹn, jerẹ oborẹ ọ mẹrẹnren uvuẹn emena yen ọke rọ kamu. Joseph ọ guọlọ rhe sẹ imizie i ghwẹriẹ ne. Omarana, nọ ta rẹn aye: ‘Are idọrhẹ. Are i rhe mo ni oborẹ ẹkwotọre ame ọ havwọ.’ Aye ni tare: ‘Ẹjo! Ame imizu ri nẹ i Canaan rhe, ame awan 12 bi. Ọrẹn, omizu ame owu o hwu ne, ubrevwiẹ ame ọrhẹ ọsẹ ame i ha obẹ oghwa.’ Joseph nọ ta rẹn aye: ‘Are i ghwẹrioma ya ha ubrevwiẹ are rhe, ni mi ne kwerhọ oborẹ are a ta na.’ Omarana, aye ni ghwẹrioma rie.

Ọke emaren aye ọ rharhumu hin, Jacob no dje emọyen ghwẹrioma riẹ Egypt. Aye ni ha ubrevwiẹ aye re se Benjamin lele oma ọke ọnana. Neneyo i Joseph ọ sabu rhe sẹ imizie i ghini ghwẹriẹ ne, no fi uko yi re ruru rhẹ idọlọ ọfuanfon rhẹ ẹkpa ri Benjamin o fi emaren rhọ, nọ tare taghene imizie yi so rie. Ọke idibo i Joseph a mẹrẹn uko na uvuẹn ẹkpa i Benjamin, no gbe imizie unu. Aye ni rẹ i Joseph nọ ha oja riẹ aye ukperẹ ono rhiẹ i Benjamin.

Joseph nọ mẹrẹnvwrurhe taghene imizie i ghwẹriẹ ne. Joseph ọrhọ sabu sun omaye-en. No kwenu oviẹ, nọ tare: ‘Mẹmẹ i Joseph, omizu are. Ọsẹ mẹ ọ je ha akpọ?’ Ọnana o gbe imizie unu omamọ. Joseph nọ ta rẹn aye: ‘Are i vwe mwuomarhọ fọkiẹ oborẹ are i ruru mẹ-ẹ. Osolobrugwẹ yo djeri mẹ rhiẹ aran, ni mi sabu simi arhọ are. Are i brokpakpa ghwẹrioma rie, ya kpare ọsẹ mẹ rhe.’

Aye ni ghwẹrioma bru ọsẹ aye ya ta riẹn oborẹ ọ phiare, jeghwai haye riẹ Egypt. Dedevwo ẹgbukpe buebun i vrẹn ne, Joseph no kwomakugbe ekrun ọnẹyen ọgbọrọrọ.