Jonathan o vwo Uduefigbere Ọrhẹ Atamwu

Ọmọ ọkpako Orodje Saul re se Jonathan, ọgba owọnren ro ji vwo uduefigbere. David ọ tare taghene i Jonathan ọ zorhẹ ghwẹ egodi, o ji vwo omẹgbanhon ghwẹ okporokpo. Ẹdẹ owu, Jonathan nọ mẹrẹn isodja itu i Philistine ri te awan 20, ri mevi oberun ugbenu. Jonathan nọ ta rẹn ohworho rọ kpare ekwakwa owọnren ọnẹyen: ‘Ọwan ine lele aye wọnrọn, Jehova ọrhọ yẹ ọwan oka. Itu i Philistine na i rha ta rẹn ọwan ne bru aye rhe, ọwan ni ne lele aye wọnrọn.’ Itu i Philistine na ni tare: ‘Are i me lele ame wọnrọn!’ Omarana, aye awanva ni rheren riẹ oberun ugbenu na, aye ni fi isodja na kparobọ.

Fọkime Jonathan yẹ ọmọ i Saul ọkpako, manẹ ọye yo rhiẹ orodje, Saul orho hwu hin. Jonathan o rheri taghene i David yi Jehova ọ djẹre no rhiẹ orodje harẹn emọ Israel; ọrẹn, ọ rioma kpahiẹ-ẹn. Jonathan ọrhẹ i David ni me rhiẹ igbehian. Aye ni vive rẹ aye ina hẹrote owuowọnwan, jeghwai chochọn omoma aye. Neneyo Jonathan o djephia taghene aye igbehian, nọ yẹ i David ewun ọnẹyen, odan ọlọkọ, ubigẹn ọrhẹ umuaya.

Ọke i David ọ zẹ fọkiẹ i Saul rọ guọlọ kpe yi, Jonathan no bru i David nya, nọ ta riẹn: ‘Gbanhon, ne wu ji fiudugbere. Jehova yọ djẹruọ ne wu rhiẹ orodje. Ọsẹ mẹ dede o rhe ọnana.’ Oma ọnọ merhuọn wu rhe vwo ugbehian jerẹ i Jonathan?

Ọgbọ buebun, Jonathan o fi arhọ ye rhẹ erhirhiẹ imwofẹn nọ sabu ha userhumu rẹn i David. Jonathan o rheri taghene Saul ọ guọlọ kpe i David, omarana, nọ ta rẹn ọsẹ ye: ‘Emru ọdandan wu ne kpe i David; ọye o ru oborẹ ọsọre-e.’ Evwan no biomu i Saul kpahen i Jonathan. Ẹgbukpe ezẹko a vrẹn hin, Saul ọrhẹ i Jonathan ni hwu rhẹ uvweri.

Ọke i Jonathan o hwu hin, David nọ guọlọ ọmọ i Jonathan re se Mephibosheth. Ọke i David ọ mẹriẹn, nọ ta rẹn i Mephibosheth: ‘Fọkime ọsẹ ọnọ omamọ ugbehian ha mẹ, mi na hẹroto ọsoso enyerakpọ ọnọ ephian. Wu ne rhirhiẹ oghwa mẹ jeghwai leli mẹ riẹ emaren.’ Jonathan ọ sẹrẹ i David ẹro-o.