Emakashe i Jehova ri Siyẹ Oberun Iyesi ri vwo Erhanren

Orodje i Syria rẹ odẹ ye o rhiẹ Ben-hadad, ọ kparahaso emọ Israel ọke ephian. Ọrẹn, ọmẹraro Elisha nọ ha orhetio rẹn orodje ro sun Israel, fọkiẹ ọrana, orodje na nọ sabu zẹ vabọ. Omarana, Ben-hadad no brorhiẹn ro no mwu Elisha. No rhonrin taghene Elisha ọ ha uvuẹn amwa re se Dothan, no dje isodja i Syria buebun ye mwu Elisha.

Isodja i Syria ni riẹ Dothan uvuẹn ason. Urhiọke ẹdẹ ọreva ye, odibo Elisha nọ ruẹ otafe, nọ mẹrẹn isodja i Syria buebun ri kinhariẹ amwa na. Ofẹn no mwurien, no bunu: ‘Elisha, me yẹ ọwan ine ruo?’ Elisha nọ ta riẹn: ‘Ihworho ri ha obọ ọwan i bun ghwẹ aye.’ Ogege, Jehova no rurie nẹ odibo Elisha ọ mẹrẹn iyesi ọrhẹ ekalokpọ owọnren ri vwo erhanren ri vuọn oberun igbenu ri kinhariẹ amwa na.

Ọke rẹ isodja i Syria a guọlọ mwu Elisha, Elisha nọ nẹrhomo vwe i Jehova: ‘Biko, Jehova ruie nẹ ihworho na i tuẹro.’ Ogege, isodja na e rhe ekete aye i havwọ ghwomara-an, ọrẹn, aye a ji mẹrẹn ude. Elisha nọ ta rẹn isodja na: ‘Amwa ọrọrọ yẹ are i rhere na. Are i leli mẹ, mi ne dje ohworho are a guọlọ na harẹn are.’ Aye ni lele Elisha riẹ Samaria, ro rhiẹ amwa Orodje Israel o rhirhiẹ.

Isodja i Syria na ni mẹrẹnvwrurhe taghene aye i ha uvuẹn amwa Israel. Orodje ro sun Israel nọ nọ Elisha: ‘Mi kpe aye?’ Elisha ọ ha uphẹn ọnana ru ihworho na kele, nime aye a guọlọ kpe yi? Ẹjo. Elisha nọ tare: ‘Wu vwe kpe aye-e. Yẹ aye emaren, ne wu nyajẹ aye vwo nẹ aye i nyarhẹn.’ Omarana, orodje na nọ yẹrẹ aye emaren jeghwai tiobọnu aye nẹ aye i nyarhẹn.