Uvie ro no Sun Bẹmẹdẹ

Ason owu, Orodje Nebuchadnezzar nọ menemena. Emena na no kpokpo ẹhẹn orodje na, ọ vwọ rhọ sabu merhẹ-ẹn. No se ihworho re ru irueruo imajiki, nọ ta rẹn aye: ‘Are i rhian emena mẹ ha mẹ.’ Aye ni tare: ‘O orodje, ta rẹn ame kpahen emena wu menaren na.’ Ọrẹn, Nebuchadnezzar nọ ta rẹn aye: ‘Ejo! Are a ta mẹ oborẹ mi menare-en, mi ne kpe are.’ Ọgbọrọrọ, aye ni ta riẹn: ‘Ta rẹn ame kpahen emena wu menaren na, neneyo ame i sabu rhian yen wẹn.’ Orodje na nọ tare: ‘Are ephian a guọlọ phiẹ mẹ rhọ. Are i ta mẹ oborẹ mi menaren!’ Aye ni ta rẹn orodje na: ‘O vwo onyakpọ owuorowu rọ nọ sabu ruie-e. O vwo ohworho rọ nọ sabu ruẹ oborẹ wa ta na-a.’

Nebuchadnezzar nọ tuekwẹre gbangbanhon, te erhirhiẹ o jurhi taghene e kpe ọsoso evwẹghwanren ri ha uvuẹn amwa na. Usuẹn evwẹghwanren na yẹ Daniel, Shadrach, Meshach, ọrhẹ Abednego. Daniel nọ ta rẹn orodje na nọ yẹ ye ibiọke. Omarana, Daniel ọrhẹ igbehian yen ni nẹrhomo vwe i Jehova nọ ha userhumu rẹn aye. Me yi Jehova o ruru?

Jehova no dje emena i Nebuchadnezzar ọrhẹ oborẹ o mevirhọ rẹn i Daniel uvuẹn emena arudo. Ẹdẹ ọreva ye, Daniel no bru odibo orodje na nya, nọ ta riẹn: ‘Wu vwe kpe evwẹghwanren owuorowu ri ha uvuẹn amwa na-a. Mi na sabu rhian emena orodje na.’ Odibo orodje na nọ ha i Daniel vwe Nebuchadnezzar. Daniel nọ ta rẹn orodje na: ‘Osolobrugwẹ o dje oborẹ ọnọ phia obaro na ha mẹ ne. Ọnana yẹ emena wu menaren na: Wu mẹrẹn oma ọduado ro vwo urhomu oro, udu ọrhẹ abọ ye idọlọ efuanfon, evwan ọrhẹ ugbewun oma na erẹnmo, aghwẹ ye uteru, isihin aghwẹ ye uteru ọrhẹ ọphiẹ. Ọke oru, ne bru atita nẹ ugbenu owu, atita na no se bru isihin aghwẹ oma na. Oma na nọ ghwọghọre dẹriẹrhiẹ iwuwu, aphẹrẹ no zu rie nyarhẹn. Atita na nọ dẹriẹrhiẹ ugbenu ọduado, no rhurhu akpọ na ephian.’

Omarana, Daniel nọ tare: ‘Ọnana yẹ oborẹ emena na o mevirhọ: Uvie ọnọ yẹ urhomu oro na. Ọrẹ idọlọ ọfuanfon na o mevirhọ uvie rọ nọ ha kpahen ọnọ. Uvie ọrọrọ ọnọ họhọ erẹnmo, ro no sun akpọ na ephian. Uvie rọ nọ ha kpahiẹn, ọnọ gbanhon jerẹ uteru. Ọrọkẹta, ono rhiẹ uvie ro vwo vwo okugbe, owuobọ uvie na ọnọ gbanhon jerẹ uteru, owuobọ ye ọnọ lọhọ jerẹ ọphiẹ. Atita rọ dẹriẹrhiẹ ugbenu na yẹ Uvie Osolobrugwẹ. Ọnọ ghwọghọ ivie enana, ọye ọvo nọ yo no rhirhiẹ ye bẹmẹdẹ.’

Nebuchadnezzar no gburhomu rhotọre obaro i Daniel. Nọ tare: ‘Osolobrugwẹ ọnọ, yo dje emena ọnana wẹn. O vwo Osolobrugwẹ rọ họheriẹ-ẹ.’ Ukperẹ Nebuchadnezzar ono kpe i Daniel, nọ hariẹ mwu ẹrhẹ rọ maido usuẹn evwẹghwanren na, nọ ji haye mwu ẹrhẹ osun uvuẹn i Babylon. Wu mẹrẹn oborẹ Osolobrugwẹ ọ kpahenrhọ ẹrhomo i Daniel lele?