Aye e Gburhomu Rhotọre-e

Ọke Orodje Nebuchadnezzar ọ menemena kpahen oma ọduado na hin, nọ ma oma oro ọduado harẹn omayen. Nebuchadnezzar ọ ma oma na rhẹ otọre rọ ha uvuẹn i Dura, no se ihworho ri vwo ẹrhẹ ọduado uvuẹn amwa na nẹ aye i me koko obaro oma na, o ji se Shadrach, Meshach, ọrhẹ Abednego. Orodje na nọ tare: ‘Are i rhe rhon edon ikpekporo na, are i gbe gburhomu rhotọre rẹn oma na! Kohworho kohworho ro vwo gburhomu rhotọre, ene dorien rhẹ erhanren.’ Shadrach, Meshach, ọrhẹ Abednego ine gburhomu rhotọre rẹn oma na, gbinẹ i Jehova ọvo yẹ aye ina ga?

Omarana, orodje na nọ tare taghene e gbe kporo ikpekporo na. Ihworho ephian ni gburhomu rhotọre rẹn oma na, ọrẹn Shadrach, Meshach, ọrhẹ Abednego e kwe gburhomu rhotọre-e. Ihworho ezẹko usuẹn ihworho na ni mẹrẹnvwrurhe taghene aye e kwe gburhomu rhotọre-e, aye ni ta rẹn orodje na: ‘Ehworhare i Hebrew awansa na, e kwe gburhomu rhotọre rẹn oma na-a.’ Nebuchadnezzar no dje urhomu vwe aye, nọ tare: ‘Mi na yẹ are uphẹn ọrọrọ, neneyo are i gburhomu rhotọre rẹn oma na. Are erhe kwe gburhomu rhotọre rẹn oma na-a, mi ne doron are rhẹ erhanren na. O vwo osolobrugwẹ owuorowu rọ nọ sabu simi are nẹ abọ mẹ-ẹ.’ Aye ni tare: ‘Ame a guọlọ uphẹn ọrọrọ-ọ. Osolobrugwẹ ame ọnọ sabu simi ame. Ọrẹn, ọrhọ tobọ simi ame dede-e, O orodje, ame i gburhomu rhotọre rẹn oma na-a.’

Nebuchadnezzar nọ tuekwẹre gbangbanhon. Nọ ta rẹn idibo yi nẹ aye i koko erhanren na phie nọ djẹrẹ ọgbọ irhiruẹ ghwẹ oborẹ ọ djẹrẹ te bi!’ Ọke oru, nọ ta rẹn isodja ye: ‘Are i gba ehworhare enana, nẹ are i doron aye rhẹ uvuẹn erhanren na!’ Ọke isodja na e doron Shadrach, Meshach, ọrhẹ Abednego rhẹ erhanren na, aghworo erhanren na no kpe isodja na, nime erhanren na ọ djẹrẹre omamọ. Ọrẹn, ọke i Nebuchadnezzar o ni erhanren na, nọ mẹrẹn awan ẹne ra nya uvuẹn erhanren na, ukperẹ ono rhiẹ awansa. Ofẹn no mwurien, nọ nọ ihworho ra wian riẹn: ‘Rhẹ awansa yẹ ọwan i doron rhẹ erhanren na? Mia mẹrẹn awan ẹne, owu usuẹn aye ọ họhọ ọmakashe!’

Nebuchadnezzar no ti kẹrẹ erhanren na, no se rẹ aye: ‘Are i ruẹ otafe, idibo Osolobrugwẹ rọ Mai Rierun na!’ No gbe ihworho ephian unu rẹ aye a mẹrẹn Shadrach, Meshach, ọrhẹ Abednego ri nya nẹ uvuẹn erhanren na rhe, ọrẹn, erhanren na ọ torhẹ aye-e. Ẹton aye, oma aye ọrhẹ ewun aye a torhẹ-ẹ, oma aye ọ tobọ gbon ọrhen iphirhi-i.

Nebuchadnezzar nọ tare: ‘Osolobrugwẹ i Shadrach, Meshach, ọrhẹ Abednego ọ ghini do. O dje ọmakashe ọnẹyen me simi aye. O vwo osolobrugwẹ rọ họhọ Osolobrugwẹ aye-e.’

Jerẹ Shadrach, Meshach, ọrhẹ Abednego, wu vwo omwemẹ wu na sẹrorẹ atamwu kpahen i Jehova, o toro oborẹ erhirhiẹ na ọ gbanhon te-e?