Jesu ọ Ghẹrẹ Ihworho Buebun

A ki riorẹ Ọnyavrẹn na uvuẹn ẹgbukpe 32 C.E., inyikọ na ni ghwẹrioma nẹ aghwoghwo rhe. Oma ọ ghwọgherẹ aye, omarana, Jesu ọrhẹ aye ni ruẹ owọ riẹ Bethsaida, neneyo aye i sabu ronmoma. Ọke owọ na ọ joma te akpa ne, Jesu nọ mẹrẹnvwrurhe taghene ihworho buebun a hẹrhẹ aye oboran. Dedevwo, Jesu ọrhẹ inyikọ ye ọvo i guọlọ ronmoma, o ji rhiabọ dede ihworho na. Jesu o simi ihworho re kpomẹ usuẹn aye, ọ jeghwai yono aye. Jesu o yonirin aye kpahen Uvie Osolobrugwẹ ọsoso ẹdẹ ọrana. Ọke owuọwọn o te, inyikọ ye ni bru rie nya ya ta riẹn: ‘Orhọmo o kpe ihworho na ne. Ta rẹn aye nẹ aye i nyarhẹn neneyo aye i sabu ya riẹ emaren.’

Jesu nọ tare: ‘O fo nẹ aye i nyarhẹ-ẹn. Are i guọlọ emaren rẹn aye, nẹ aye i riẹ ekete aran.’ Inyikọ na ni nọ i Jesu: ‘Wu guọlọre nẹ ame i ya dẹ ibrẹdi harẹn aye?’ Philip ro rhiẹ owuọwan usuẹn inyikọ na, nọ tare: ‘Ọwan i rha tobọ vwo igho buebun, a sabu dẹ ibrẹdi ro no te aye ephian re-e.’

Jesu nọ nọren: ‘Marhẹ emaren rọ havwiẹ o bun te?’ Andrew nọ tare: ‘Ibrẹdi isionrin kugbe irhenrin ekokamu eva, yi havwiẹ. Ọrana o te-e.’ Jesu nọ tare: ‘Ha ibrẹdi ọrhẹ irhenrin na vwe mẹ.’ Nọ ta rẹn ihworho na nẹ aye i siyẹ totọre, nẹ aye i ghalẹ oma aye rhẹ ẹko 50 ọrhẹ ẹko 100. Jesu nọ ha ibrẹdi na ọrhẹ irhenrin na, no nẹ odjuwu, nọ nẹrhomo. Ọke oru, nọ ha emaren na rẹn inyikọ ye, inyikọ na ni ghalẹ emaren na rẹn ihworho na. Ehworhare awan 5,000 ọrhẹ emẹse kugbe emọ ephian ni riẹ evwan vuọn. Ọke oru, inyikọ na ni koko emaren ri hẹrhẹre, neneyo e je rhe tue aye fughwẹ. Emaren ri hẹrhẹre na i vuọn ekalokpọ 12! Ọrana ghini igbevwunu, gbinẹ rhẹ omaran?

Oma nọ merhen ihworho na, aye na guọlọ ha i Jesu mwu ẹrhẹ orodje. Ọrẹn, Jesu o rheri taghene ọke i Jehova ọnọ haye mwu ẹrhẹ orodje o ji te-e. Ọke oru, nọ ta rẹn otu na nẹ aye i nyarhẹn, nọ jeghwai ta rẹn inyikọ ye, nẹ aye i da Urhie i Galilee vrẹn riẹ obọreva ye. Inyikọ na ni ruẹ owọ aye, Jesu ọvo no riẹ oberun ugbenu. Mesoriẹ? Nime ọ guọlọ nẹrhomo vwe i Jehova ro rhiẹ Ọsẹ ye. Jesu ọrhọ tobọ vwo ewian buebun dede, ọye ọ ji kwaphiẹ ọke rhọ nẹrhomo ọke ephian.