Orẹ Ọnyavrẹn rọ Kẹta i Jesu o Ruru

Itu i Jew a riorẹ Ọnyavrẹn kẹgbukpe kẹgbukpe uvuẹn ẹdẹ ọrẹ 14 uvuẹn ubiamo Nisan. Orẹ na ọ karorhọ aye kpahen oborẹ i Jehova o ru simi aye nẹ abọ evrẹn obẹ Egypt jeghwai ha aye riẹ Otọre Ive na. Uvuẹn ẹgbukpe 33 C.E., Jesu ọrhẹ inyikọ ye ni riorẹ Ọnyavrẹn na uvuẹn oghwa owu obẹ i Jerusalem. Ọke aye a riorẹ na hin, Jesu nọ tare: ‘Owuọwan usuẹn are ọnọ rhẹ mẹ.’ No gbe inyikọ na unu, aye ni nọ i Jesu: ‘Ọrọmo yẹ ohworho na?’ Jesu nọ tare: ‘Ohworho na ye mi na ha ibrẹdi ọnana riẹn.’ Omarana, nọ yẹ i Judas Iscariot ovwẹre ibrẹdi owu. Ogege, Judas no vẹnrẹnren, no nẹ oghwa na.

Jesu nọ nẹrhomo, no bru ibrẹdi, nọ hariẹ rẹn inyikọ ye ri hẹrhẹre. Jesu nọ tare: ‘Are i riẹ ibrẹdi ọnana. O mevirhọ ugboma mẹ, mi ne tiobọnu harẹn are.’ Ọke oru, nọ nẹrhomo rhẹ enyo na, nọ hariẹ rẹn inyikọ ye. Jesu nọ tare: ‘Are i da enyo ọnana. O mevirhọ ọbara mẹ, mi ne tiobọnu neneyo a sabu harhomu edandan are. Mi veri taghene mẹmẹ ọrhẹ are ine rhiẹ irodje obẹ odjuwu. Are i ru ọnana kẹgbukpe kẹgbukpe ha karorhọ mẹ.’ Ilele Kristi urhomẹmro, e ji koko kẹgbukpe kẹgbukpe owuọwọn ẹdẹ ọrana. Vwarana, e se irueruo ọrana, Emaren Owuọwọn Ọrovwori na.

Ọke inyikọ na a riẹ emaren ọrana hin, aye na frẹfro kpahen ọrọ maido usuẹn aye. Ọrẹn, Jesu nọ ta rẹn aye: ‘Ohworho rọ maido usuẹn are, ono ni omayen taghene ọye yọ mai kamu, o ni omayen gegerege-e.

‘Are igbehian mẹ. Mia ta rẹn are kpahen kemru kemru Ọsẹ mẹ ọ guọlọre taghene mi ta rẹn are. Phẹrẹkpẹ, mia samọ bru Ọsẹ mẹ riẹ odjuwu. Are ina daji, ihworho ni ne rhe taghene are idibo mẹ, nyoma ẹguọlọ are ine vwo kpahen owuowọnwan. Are i vi vwo ẹguọlọ kpahen owuowọnwan jerẹ oborẹ mi vwo ẹguọlọ kpahen are.’

Ọke oru, Jesu nọ nẹrhomo vwẹ i Jehova nọ sẹrorẹ ọsoso idibo yi. Ọ jeghwai rẹ i Jehova nọ ha userhumu rẹn idibo na wian kugbe ọrẹ ufuoma. Jesu ọ nẹrhomo ne ru odẹ i Jehova fon. Ọke oru, Jesu ọrhẹ inyikọ ye ni so ijoro jiri Jehova, aye ni ruẹ otafe. Ọke re ne mwu i Jesu o ti kẹrẹ ne.