UYONO 14

Dabu Kanrunumwu Ihwẹnmro Kirighwo

Hebrews 8:1

OBORẸ ENE RUO: Ha userhumu rẹn otu na kpomavi rẹn ẹmro na, nẹ aye i jeghwai djokarhọ oborẹ ihwẹnmro owuowu o ru surhobọmwu urhomu-ẹmro ọrẹ ẹmro na.

OBORẸ ENE RUIE LELE:

Wọ oborẹ wu na ta rhẹ ẹhẹn. Ni ẹmro na so sẹ o fori ne wu haye yono otu na, lẹrhẹ imwẹro aye gbanhon, yanghene lẹrhẹ aye kpare idjaghwẹ, orho ru gba ha iroro enana mwuegbe. Damoma neneyo ọsoso ihwẹnmro na ọ ha userhumu wẹn tẹmro na mwidjẹn.

Nọ oma: ‘Enọ ego yi mie fiẹrorhọ taghene otu na ina nọ? Aye i rha mẹrẹn ẹkpanhenrhọ ye ne, onọ ọgo yẹ aye ina ji sabu nọ?’ Orho ru, gbe mwuegbe ihwẹnmro na lele izede ọrana neneyo otu na i sabu nyalele ẹmro na, vwẹruọ ye, jeghwai rhiabọ dedie.
Kanrunumwu urhomu-ẹmro ọrẹ ẹmro na. Rha hunute urhomu-ẹmro ọrẹ ẹmro na nyoma wu na rharhumu ta ẹmro kirighwo ri ha uvuien yanghene nyoma wu na ha ẹmro ri surhobọmwuie ruiruo.
Ruẹ ihwẹnmro na lọhọ jeghwai fiotọre. Sanọ ihwẹnmro ri surhobọmwu ẹmro na re wu na ji sabu haphia uvwre ọke re bru wẹn na. Bru ihwẹnmro wa ha ruiruo kpẹtẹ, dabu dje ihwẹnmro owuowu fiotọre, domaji ibiesuọn wa rha tẹmro kpahen aye, jeghwai surhu ọsoso ihwẹnmro na mwu owuowọnwan.

Wu na sabu hunute ẹmro kirighwo uvuẹn otọnrhọ ẹmro na neneyo otu na i sabu kpomavi rẹn ẹmro na yanghene wu na sabu rharhumu hunute aye uvuẹn obẹta ẹmro na neneyo otu na i sabu karorhọ aye.