UYONO 43
Ukẹro Ọgo yẹ Ofori nẹ Ilele Kristi i Ha Ni Enyo ro Mwu Ọwan?
Uvuẹn akpọ na ephian, ihworho a ha ukẹro sansan ni enyo ro mwu ọwan. Ihworho ezẹko a da enyo ro mwu ọwan aye i rhe kwomakugbe igbehian aye. Ihworho ezẹko i vwe kwe da kakaka-a. Ọrẹn, ezẹko a da inyo vronma. Ukẹro ọgo yi Baibol na ọ ha ni enyo ro mwu ọwan?
1. Ọsọre ra na da inyo re mwu ọwan?
Baibol na ọ kparehaso enyo ro mwu ọwa-an. Ukpomaran, ọke i Baibol na ọ ta kpahen ẹghẹlẹ sansan rẹ Osolobrugwẹ ọ yẹrẹ ọwan, ọ ji hunute “enyo rọ lẹrhẹ ọmudu onyakpọ ghọghọ.” (Psalm 104:14, 15) Ehworhare ọrhẹ emẹse ezẹko ri fuevwan ọke ahwanren, ra hunute uvuẹn i Baibol na, i da inyo re mwu ọwan.—1 Timothy 5:23.
2. Urhebro ọgo yi Baibol na ọ yẹ ihworho ri guọlọ da enyo ro mwu ọwan?
Jehova o vwo utuoma kpahen uruemru ra da inyo vronma. (Galatians 5:21) Baibol na ọrhọ ta: “Wu vwe kwomakugbe ihworho ra da inyo buẹn pha-an.” (Proverbs 23:20) Omarana, arha guọlọ da enyo ro mwu ọwan, ọrhọ tobọ rhianẹ a ha uvuẹn oghwa ọwan, a vwa da ye te erhirhiẹ rọ nọ hobọte iroro ọwan, ẹmro ọwan, irueruo ọwan, yanghene omọkpokpọ ọwa-an. Orhianẹ a sabu sun oma ọwan kpahen enyo ro mwu ọwa-an, ofori na kẹnoma riẹn phẹlẹphẹlẹ.
3. Marhẹ ene ru sabu mwuọghọ rẹn orhienbro awọrọ kpahen enyo ro mwu ọwan?
Owuowọnwan yo no vi brorhiẹn sẹ ọnọ da enyo ro mwu ọwan yanghene ọ da-a. Arha mẹrẹn ohworho rọ djẹ odjẹ rọ nọ da ibiẹ enyo ro mwu ọwan, a vwa ha ye guẹnzọ-ọn, habaye, o ji fo ne jiri enyo ro mwu ọwan rẹn ohworho ro vwọ guọlọ da-a. (Romans 14:10) Ọwan i vwe kwe da enyo ro mwu ọwa-an, orhianẹ ono rhiẹ ukọ rẹn awọrọ. (Se Romans 14:21.) Ọwan ‘i vwa guọlọ ọdamẹ ọwan ọvo-o, ọrẹn, a ji guọlọ ọrẹ ọreva ọwan.’—Se 1 Corinthians 10:23, 24.
YONO KODO RHỌ
Yono kpahen iruemru-urhi i Baibol ri na ha userhumu wẹn brorhiẹn sẹ wu na da enyo ro mwu ọwan, ọrhẹ uchunu wu na da, orhianẹ wu guọlọ da. Jeghwai guọlọ otọre oborẹ wu na sabu ru, orhianẹ wu vwo obẹnbẹn inyo ẹda.
4. Brorhiẹn sẹ wu na da
Ukẹro ọgo yi Jesu ọ ha ni uruemru ra da enyo ro mwu ọwan? Na sabu mẹrẹn ẹkpahenrhọ na, jene yono kpahen igbevwunu ọrukaro ro ruru. Se John 2:1-11, orho ru, are i gba kpahenrhọ enọ enana:
Uvuẹn igbevwunu ọnana, me yẹ ọwan ina sabu yono kpahen ukẹro i Jesu ọ ha ni enyo ro mwu ọwan, ọrhẹ era da ye?
Ra mẹriẹn taghene i Jesu ọ kparehaso enyo ro mwu ọwan na-a, ukẹro ọgo yẹ Olele Kristi ọnọ ha ni ohworho rọ da ye?
Ọrẹn, nime Olele Kristi o vwo ugbomọphẹ rọ da enyo ro mwu ọwan, ọrana o mevirhọ taghene nọ nọ rhọ da ye ọke ephia-an. Se Proverbs 22:3, orho ru, are i gba ta kpahen iroro ri na sabu lẹrhuọ brorhiẹn sẹ wu na da enyo ro mwu ọwan:
Wu na ghwa, yanghene ha imashini ruiruo.
Wu mẹrenvwan.
Idọkitọ ọ ha urhebro wẹn ne wu kẹnoma rẹn enyo ro mwu ọwan.
Wu vwa sabu sun oma kpahen uchunu enyo wa da-a.
Urhi na o kwenu wẹn ne wu da enyo ro mwu ọwa-an.
Wu ha uvuẹn ekete owu rhẹ ohworho rọ djẹ odjẹ rọ nọ kẹnoma rẹn enyo ro mwu ọwan, nime o vwo obẹnbẹn ro no sun oma yen kpahiẹn ọke rọ vrẹn ne.
O fori ne wu ghalẹ enyo ro mwu ọwan uvuẹn irueruo orọnmo, yanghene irueruo erọrọ? Ne wu sabu mẹrẹn oborẹ ọnọ ha userhumu wẹn brorhiẹn, kporo IVIDIO na.
Se Romans 13:13 ọrhẹ 1 Corinthians 10:31, 32. Are i rhe se ekete i Baibol na owuowu ne, are i gba kpahenrhọ onọ ọnana:
Wu rha ha uruemru-urhi ọnana ruiruo, marhẹ ono ru ha userhumu wẹn brorhiẹn rọ nọ lẹrhẹ oma merhen i Jehova?
Olele Kristi owuowu yo no brorhiẹn harẹn omobọ ye sẹ ọnọ da enyo ro mwu ọwan, yanghene ọ da-a. Ọrhọ tobọ rhianẹ ọ da enyo ro mwu ọwan ọkezẹko, ọke ọrọrọ, ọnọ sabu brorhiẹn rọ nọ jọ da
5. Brorhiẹn uchunu wu na da
Wu rhe brorhiẹn wu na da inyo re mwu ọwan, karorhọ ọnana: Dedevwo i Jehova ọ kparehaso enyo ro mwu ọwan ra na da-a, ọ kparehaso uruemru ra da ye vronma. Mesoriẹ? Se Hosea 4:11, 18, orho ru, are i gba kpahenrhọ onọ ọnana:
Me yọ nọ sabu phia rẹn ohworho ọrhọ da enyo vronma?
Me yọ nọ ha userhumu rẹn ọwan na ja rha da enyo vronma? O fori ne ru dẹndẹn, jeghwai rhe ekete omẹgbanhon ọwan o teri. Se Proverbs 11:2, orho ru, are i gba kpahenrhọ onọ ọnana:
Mesoriẹ orhomu ne fi ughwru rhẹ uchunu enyo ra na da?
6. Me yọ nọ ha userhumu rẹn ohworho dobọ inyo ẹda vronma ji?
Ni oborẹ ọ ha userhumu rẹn ọhworhare owu dobọ enyo ẹda vronma ji. Kporo IVIDIO na, orho ru, are i gba kpahenrhọ enọ enana.
Uvuẹn ividio na, marhẹ inyo ẹda vronma o ru hobọte uruemru i Dmitry?
Ọ sabu dobọ inyo ẹda vronma ji ogege?
Marhẹ o ru sabu fi obẹnbẹn ọnana kparobọ?
Se 1 Corinthians 6:10, 11, orho ru, are i gba kpahenrhọ enọ enana:
Marhẹ inyo ẹda vronma ọ gbanhon te?
Me yo djephia taghene ọrọ da inyo vronma ọnọ sabu wene?
Se Matthew 5:30, orho ru, are i gba kpahenrhọ onọ ọnana:
Ọke i Jesu o dje udje obọ ra na fian nie, o mevirhọ taghene ene tiobọnu ekwakwa ezẹko na sabu lẹrhẹ oma merhen i Jehova. Me wu na sabu ru orhianẹ wa damoma wu na dobọ inyo ẹda vronma ji?a
Se 1 Corinthians 15:33, orho ru, are i gba kpahenrhọ onọ ọnana:
Marhẹ igbehian ine ru hobọte uchunu enyo ro mwu ọwan wa da?
OHWORHO ỌNỌ SABU NỌ: “Inyo ẹda ọsọre?”
Marhẹ wu na kpahenrhọ ye lele?
ME WU YONORIN?
Jehova ọ yẹrẹ ọwan enyo ro mwu ọwan na riamerhiẹn, ọrẹn, ọ kparehaso uruemru ra da ye buẹn phan, yanghene ra da ye vronma.
Ẹzẹkoko
Ukẹro ọgo yi Baibol na ọ ha ni enyo ro mwu ọwan?
Imwofẹn ego yi havwiẹ arha da inyo vronma?
Marhẹ ene ru họghọ rẹn orhienbro awọrọ sekpahen inyo ẹda?
GUỌLỌ IYẸNRẸN ERỌRỌ
Marhẹ iphuphẹn ine ru djẹ odjẹ ri serhọ kpahen enyo ro mwu ọwan?
Djokarhọ idjaghwẹ wu na kpare ne wu sabu fi obẹnbẹn inyo ẹda vronma kparobọ.
“Oborẹ wu ne ru ha Ukẹro ro Serhọ ni Enyo ro Mwu Ọwan” (Oghwa Odẹrẹ, January 1, 2010)
O fori nẹ Olele Kristi o vwobọrhọ uruemru ra kpare itebele enyo rierun ha ze itebele owuowọnwan?
“Enọ Rẹ Otu Re Se Ẹbe Ọwan i Nọren” (Oghwa Odẹrẹ, February 15, 2007)
Uvuẹn ikuegbe na “Mẹmẹ Idrọmu Ro Vwo Vwo Oba Vẹrhẹ Bi,” se kpahen oborẹ ọhworhare owu o ru dobọ inyo ẹda vronma ji.
a Era da inyo vronma i guọlọ userhumu ohworho rọ tona nẹ aye i sabu dobọ ye ji. Idọkitọ buebun i tare taghene eri vwo obẹnbẹn inyo ẹda, i vwa da enyo kakaka-a.