Ha Ukẹro i Jehova ọ ha ni Enyo re Mwu Ọwan e Nie

ITIỌRURHOMẸMRO, wu vwo omamerhomẹ kpahen ẹghẹlẹ sansan ri Jehova o tiobọnu ọrhẹ ugbomọphẹ wu ne brorhiẹn oborẹ wu na riamerhen aye lele. Ọrẹ omamerhomẹ, Baibol na ọ tare taghene enyo usuẹn ẹghẹlẹ ro nẹ obẹ Jehova rhe, ọrhọ ta: “Ibrẹdi ọ lẹrhẹ ọwan chẹẹ, enyo ọ lẹrhẹ akpọ merhan.” (Eccl. 10:19; Ps. 104:15) Ọrẹn, wu ji mẹrenvwrurhe ne taghene ihworho ezẹko a da enyo vrẹn oma. Habaye, uvuẹn ọsoso akpọ na ihworho i vwo iroro sansan kpahen enyo. Ọrẹn, me yọ nọ ha userhumu rẹn Olele Kristi brorhiẹn ro serhọ kpahen enyo?

O toro ekete re rhirhiẹ yanghene ra ghwanre-en, arha ha ukẹro i Jehova ọ ha ni emru e suẹn iroro ọrhẹ orhienbro ọwan, ana mẹrẹn ebrurhọ ji nyerẹn omamọ akpọ.

Jerẹ oborẹ wu djokarhọ ne, ihworho buebun uvuẹn akpọ na a da enyo omamọ ji da ye buẹn. Ihworho ezẹko a da enyo ro mwu ọwan fọkime ọ lẹrhẹ ẹhẹn aye totọre. Awọrọ a da ye nẹ aye sabu nyerẹn ghele ebẹnbẹn aye. Uvuẹn ekete ezẹko, arha da enyo ro mwu ọwan buebun, ne nie rhiẹ ohworho ro te edje yanghene ọgba.

Ọrẹn, Ilele Kristi i vwo obọdẹn ọkpọvi mie Jehova, ro rhiẹ Omemama aye. Jerẹ udje, ọ ta kpahen oborẹ ono nerhumie rhe arha da enyo vrẹn oma. Ọkezẹko, e se kpahiẹn uvuẹn Proverbs 23:​29-35, ro dje kpahen ohworho rọ da enyo vrẹn oma ọrhẹ obẹnbẹn ro nerhumie rhe.a Daniel, ro rhiẹ ọkpako ukoko obẹ Europe, ọ karorhọ aruẹ akpọ ro nyerẹnren bọmọke o ki rhiẹ Olele Kristi, nọ tare: “Enyo ẹda vrẹn oma ọ lẹrhere mẹ brorhiẹn ri sọre, ji rioja omiamiamo sansan ri hobọte akpenyerẹn mẹ.”

Marhẹ Ilele Kristi ine ru ha ugbomọphẹ aye ruiruo ji kẹnoma rẹn ebẹnbẹn enyo ro mwu ọwan ọnọ sabu so? Oborẹ ọnọ ha userhumu rẹn aye yẹ ọrẹ aye ina ha ukẹro ri Jehova ọ ha ni erhirhiẹ na e nie.

Jene yono kpahen oborẹ i Baibol ọ ta kpahen enyo re mwu ọwan ọrhẹ oborẹ ọsoriẹ ihworho ezẹko a da ye.

OBORẸ I BAIBOL NA Ọ TARE

Baibol na ọ hasuẹ enyo ro mwu ọwan ra da izede ro serhọ-ọ. Itiọrurhomẹrmo, Baibol na o kweri taghene ana sabu riamerhen enyo ro mwu ọwan. Nọ tare: “Riẹ emaruọn rhẹ omamerhomẹ, ne wu ji da enyo ọnọ rhẹ ọmudu aghọghọ.” (Eccl. 9:7) Jesu ọ da enyo ro mwu ọwan uvuẹn erhirhiẹ ezẹko, omaran ji te idibo i Jehova erọrọ.—Matt. 26:​27-29; Luke 7:34; 1 Tim. 5:23.

Ọrẹn, Baibol na o fiẹ ovẹnẹ ọduado rhẹ ọrẹ ana da ibiẹ enyo ro mwu ọwan yanghene da ye vrẹn oma. Nọ tare: ‘Wu vwa da inyo vrẹn oma-a.’ (Eph. 5:18) Ọ ji ta riobarorhọ taghene “idinyo . . . i ha Uvie Osolobrugwẹ riuku-u.” (1 Cor. 6:10) Jehova o vwo ekwerhọ kpahen enyo ẹda vrẹn oma-a. Ukperẹ ana nyalele oborẹ e ruẹ uvuẹn ẹkwotọre ọwan, ono rhomu arha nyalele irhi Jehova.

Ihworho ezẹko e roro taghene aye ina sabu da enyo ro mwu ọwan buebun, ọrẹn o mwu aye-e. Ọrẹn, iroro ọrana ọsọre omamọ. Baibol na ọ dabu djeyi fiotọre taghene ohworho orho rhiẹ “ọvrẹn harẹn enyo obuebun,” ọnọ sabu ruẹ oborẹ ọsọre ji sẹrerhumuji Jehova. (Titus 2:3; Prov. 20:1) Jesu ọ tobọ ha orhetio phia taghene enyo ẹda vrẹn oma, ọnọ sabu lẹrhẹ ohworho ja ruẹ akpọ ọkpokpọ na. (Luke 21:​34-36) Omarana, me yọ nọ sabu ha userhumu rẹn Olele Kristi no jo serhọ ufi enyo ẹda vrẹn oma?

RORO KPAHEN OBORẸ ỌSỌRIẸ WA DA ENYO ỌRHẸ UCHUNU WA DA

Ọ sọre ohworho ọnọ ha uphẹn rẹn irueruo ẹkwotọriẹ no suẹn ukẹro rọ ha ni enyo ro mwu ọwan. Ilele Kristi e ruẹ oborẹ ọ merhen Jehova oma sekpahen emaren ọrhẹ ekwakwa ra da. Baibol ọrhọ ta: “Sẹ are a ria yanghene are a da yanghene are e ruẹ ekwakwa erọrọ, are i ruẹ kemru kemru nọ ha ujiri vwe Osolobrugwẹ.” (1 Cor. 10:31) Jene roro kpahen enọ ezẹko ọrhẹ iruemru-urhi Baibol:

Mia da enyo ro mwu ọwan neneyo awọrọ i ja ha mẹ djechẹẹ? Exodus 23:2 ọrhọ ta: “Are i vwa ghwiẹ lele otu na-a.” Jehova ọ ha orhetio rẹn emọ Israel kpahen ọrẹ aye ine je lele ihworho ri vwe ruẹ oborẹ ọ merhiẹn oma. Orhetio ọrana o ji sekpahen Ilele Kristi inyenana. Arha ha uphẹn rẹn otuẹdẹre ọwan nẹ aye suẹn iroro ọrhẹ orhienbro ọwan kpahen enyo ro mwu ọwan, ọnọ sabu lẹrhẹ ọwan tephe rẹn Jehova ọrhẹ irhi egbagba enẹyen.—Rom. 12:2.

Mia da enyo neneyo mi djephia taghene mẹmẹ ọgba? Ọ sọ ra na da enyo vrẹn oma uvuẹn irueruo ẹkwotọre ezẹko-o. (1 Pet. 4:3) Ọrẹn, djokarhọ oborẹ 1 Corinthians 16:13 ọ tare: “Are i rhọmọ, are i mevigbanhon uvuẹn esegburhomẹmro na, nẹ are i fiudugbere jeghwai gbanhon.” Enyo ro mwu ọwan ọnọ ghini sabu ha userhumu rẹn ohworho gbanhon? Ẹjo. Enyo ro mwu ọwan ọnọ sabu lẹrhẹ ohworho je kiki roro emru te, yanghene je suẹn irueruo yi serhọ. Omarana, ukperẹ ono rhiẹ oka omẹgbanhon, enyo ẹda vrẹn oma o dje oka ovwiẹlẹme phia. Isaiah 28:7 o dje kpahen ohworho ro begheri fọkiẹ enyo ro mwu ọwan, ro ji brorhiẹn ri sọre.

Obọdẹn omẹgbanhon o nẹ obẹ Jehova rhe, o ji sekpahen ọrẹ ene mevigbanhon uvuẹn urhomẹmro na. (Ps. 18:32) Olele Kristi urhomẹmro ọnọ sabu ruẹ ọrana nyoma rọ nọ sẹrorẹ omayen nẹ imwofẹn, no jo beghe nẹ ogame i Jehova. Jesu o dje aruẹ omẹgbanhon ọrana phia ọke rọ ha otọrakpọ na, ihworho buebun ni ji mwuọghọ riẹn fọkime o dje uduefigbere phia.

Mia da enyo neneyo mi sabu kpariroro vrẹn ebẹnbẹn mẹ? Jehova no mwu obọ ijoro owu ya: ‘Ọke ọfiamu ọ vuọn ẹhẹn mẹ, owẹwẹ [Jehova i] ha urhebro mẹ jeghwai ru mẹ gbanhon.’ (Ps. 94:19) Wu rhe vwo ebẹnbẹn, tẹnrovi Jehova nọ ha userhumu wẹn, o rhiẹ enyo ro mwu ọwa-an. Izede owu ra na sabu ruẹ ọrana yẹ ọrẹ ana nẹrhomo vwe i Jehova ọke ephian. Habaye, imizu buebun i mẹrẹn urhebro mie igbehian ri te edje ne uvuẹn ukoko na. Itiọrurhomẹmro, ohworho ọrhọ da enyo ro mwu ọwan nọ kpariroro vrẹn ebẹnbẹn yen, ọnọ sabu lẹrhiẹ je vwo omẹgbanhon rọ nọ tiẹn ọdandan, ji ruẹ oborẹ ọgbare. (Hos. 4:11) Daniel, ra hunute ọtonrhọ, ọrhọ ta: “Mi wọnrọn hasuẹ ọfiamu ọrhẹ ẹhẹn obrorhiẹn ro kpokpi mẹ. Ni mia da enyo vrẹn oma ne mi sabu nyerẹn ghele erhirhiẹ na, ọrẹn ebẹnbẹn na ni bunrhọ, igbehian mẹ buebun ni ji sẹrerhumuji mẹ, e vwe rhe mwuọghọ mẹ-ẹ.” Me yọ ha userhumu rẹn Daniel? Nọ tare: “Ne mi mẹrẹnvwrurhe taghene mi guọlọ userhumu Jehova, o rhiẹ enyo re mwu ọwa-an. Ọke ọrana ọvo yi mia sabu nyerẹnghele ebẹnbẹn mẹ ji fiẹ aye kparobọ.” Ọrẹ imwẹro, Jehova ọ havwiẹ ọke ephian rọ nọ ha userhumu rẹn ọwan ọrhọ tobọ họhọ taghene o vwo oborẹ ana sabu ru kpahen erhirhiẹ ọwa-an.—Phil. 4:​6, 7; 1 Pet. 5:7.

Orhianẹ wa da enyo ọke ezẹko, ofori wu roro kpahen enọ enana: ‘Owuọwan uvuẹn ekrun na yanghene ugbehian mẹ ọ ta mẹ kpahen uruemru mia da enyo ne?’ Orhiomaran, ọnana ọnọ sabu djephia taghene wu vwo uruemru yanghene obẹnbẹn wu vwe ji rhe kpahen. ‘Mia da vrẹn oborẹ mia da te bi?’ Ọrana ọnọ sabu rhiẹ erhirhiẹ ohworho rọ vwọ da vrẹn oma bi, ọrẹn ọnọ da vrẹn oma orho ru. ‘Ọ bẹn mẹ mi ne ruẹ emru orhianẹ mia da enyo uvwre ẹdẹ ezẹko-o?’ Orhiomaran, nọyẹ enyo ẹda vrẹn oma o rhiẹ uruemru wu na ja sabu nyajovwo ne. Ọnọ sabu rhirhiẹ taghene wu guọlọ userhumu idọkitọ ne wu ki fiẹ obẹnbẹn na kparobọ.

Fọkiẹ imwofẹn yanghene ebẹnbẹn re nerhumu enyo ẹda vrẹn oma sa, Ilele Kristi ezẹko i vwa rha da enyo re mwu ọwan kakaka-a. Awọrọ i brorhiẹn aye ina ja da fọkime ọ vwọ merhen aye-e. Orhianẹ owuọwan usuẹn igbehian o bru aruẹ orhiẹn ọrana, wu na sabu dje uruemru esiri phia nyoma wu ne mwuọghọ rẹn orhienbro yi vabọ echẹdjẹ.

Yanghene wu mẹrẹn ẹghwanren rọ havwiẹ ne fọkime wu fi ughwru rhọ ye. Olele Kristi ọnọ sabu fi ughwru rhẹ uchunu enyo rọ nọ da. Yanghene ọnọ sabu jurhi uchunu ọgbọ rọ nọ da enyo, ọkezẹko ukwọgbọ uvuẹn ọkprughwre na yanghene ibiesuọn uvuẹn ọke rọ riẹ emaren. Awọrọ i fiẹ ughwre rhẹ aruẹ enyo ro mwu ọwan aye ina da, aye ina sabu da beer ọrẹn aye i da ogogoro-o. Ọke ohworho orho fiẹ ughwre rhẹ enyo rọ da, nọ phẹrẹ rọ nọ nyamwuien. Habaye, o vwo oborẹ ọnọ lẹrhẹ ofa ruẹ Olele Kristi ro bru aruẹ orhiẹn ọrana ji nya kpahiẹ-ẹn.

Ofori ne roro rẹn awọrọ. Romans 14:21 ọrhọ ta: “O fori ne wu kẹnoma rẹn aranmo yanghene enyo yanghene ekwakwa erọrọ orhianẹ ono rhiẹ ukọ rẹn omizuo.” Marhẹ wu ne ru ha urhebro ọnana ruiruo? Dje ẹguọlọ imizu phia. Wu rhe roro taghene wu rha da enyo ro mwu ọwan ọnọ suẹ ukọ rẹn ọwọrọ, ẹguọlọ ono mwuo ja da enyo na. Nyoma ọrana, we dje ọdamẹ ọrhẹ ọghọ rẹn iroro awọrọ, o rhiẹ ọnọ ọvo-o.—1 Cor. 10:24.

Habaye, igọmẹti ina sabu vwo irhi ri sekpahen enyo ro mwu ọwan ro fori nẹ Olele Kristi ọ nyalele. Irhi erana ina sabu sekpahen ẹgbukpe ohworho ono te, nọ ki sabu da enyo, yanghene a vwa da enyo ọke ra ghwa imoto, yanghene ọke ra ha aruẹ imashini ezẹko ruiruo-o.—Rom. 13:​1-5.

Jehova o brọghọ rhẹ ọwan oma rhẹ ugbomọphẹ ra na riamerhen ẹghẹlẹ buebun rọ yẹrẹ ọwan. Ọrana ọ haba ọrẹ ana djẹ odjẹ omobọ kpahen oborẹ ana re ọrhẹ oborẹ ana da. Jenẹ odjẹ ọwan o djephia taghene e vwo ọdaremẹro kpahen ugbomọphẹ rọ yẹrẹ ọwan nyoma ra na haye jiri Jehova.