ENỌ I BAIBOL NA Ọ KPAHENRHỌ
Ana sabu harhomu edandan ọwan?
Ọ bẹn re ne vwo ekwerhọ i Jehova-a
Baibol na ọ tare taghene ituakpọ ephian eruedandan. Ọwan i ha ọdandan riuku mie ọhworhare ọrukaro Adam. Omarana ọwan ne ruẹ sọ ọkezẹko, jeghwai viẹ oja orho ru. Jesu Kristi ro rhiẹ Ọmọ Osolobrugwẹ, ọ kwosa edandan ọwan nyoma ro hwu rẹn ọwan. Fọkiẹ izobo otan yen, na sabu harhomu edandan ọwan. Ọnana ẹghẹlẹ Osolobrugwẹ.—Se Romans 3:23, 24.
Ihworho ezẹko i ruẹ edandan eghwaghwa ne, aye ne roro sẹ Osolobrugwẹ ọnọ harhomu aye. Ọrẹ omamerhomẹ, Baibol na ọ tare: “Ọbara i Jesu ro rhiẹ Ọmọyen, o ruru ọwan fon nẹ edandan ephian ne.” (1 John 1:7) Jehova ọ tobọ harhomu edandan eghwaghwa nẹ ẹhẹn sa, orhianẹ e dje uruemru ẹghwẹriẹ phia.—Se Isaiah 1:18.
Me ye ne ruo na sabu ha edandan ọwan rhomu ọwan?
Arha guọlọ ni Jehova ọ ha edandan ọwan rhomu ọwan, ene vi yono kpahiẹn ji vwẹruọ izede yi, ọrhẹ ọkpọvi ro tiobọnẹ rẹn ọwan. (John 17:3) Jehova ọ harhomẹ ihworho ri ghwẹriẹ nẹ ẹhẹn rhe ra jeghwai damoma wene uruemru aye.—Se Acts 3:19.
Ọ bẹn re ne vwo ekwerhọ i Jehova-a. Jehova o rhe ekete ra vwiẹlẹ. O dje arodọmẹ ọrhẹ uruemru esiri phia. Omarana, o fo nẹ ẹguọlọ esiri ọnana o mwu ọwan yono kpahen oborẹ ene ru lẹrhẹ oma merhiẹn?—Se Psalm 103:13, 14.