“Owian na ọ Doro Omamọ”

ORODJE David o se emọyen, ekakuro yi, ọrhẹ isodja ye ephian koko. O te ọke aye ina ro ẹghware uvuẹn i Jerusalem ne. Oma ọ merhen aye, rẹ aye e rhon aghwoghwo oghẹnrensan ọnana. Jehova ọ djẹ ọmọ i David ro rhiẹ Solomon, nọ bọn oghwa ẹga ọduado riẹn. Jehova ọ ta rẹn Orodje David oborẹ ana bọn oghwa ẹga na lele, David nọ jeghwai dje yi rẹn Solomon. David nọ tare: “Owian na ọ doro omamọ, nime oghwa ẹga na orhiẹ ọrẹ onyakpọ-ọ, ọrẹn ọrẹ Osolobrugwẹ.”—1 Chron. 28:1, 2, 6, 11, 12; 29:1.

David nọ nọren: “Vwarana, ọrọmo yọ nọ homaphia inyenana rhẹ ẹghẹlẹ rọ ha obọ ro no ru rẹn i Jehova?” (1 Chron. 29:5) Orhianẹ wu ha avwaye, me we ru? Manẹ wa hobọtua owian ọduado ọrana? Otu Israel ni kpare idjaghwẹ ogege. Itiọrurhomẹmro, aye “ni tiobọnu nẹ ẹhẹn rhe rhẹ aghọghọ, nime aye i ru ẹghẹlẹ nẹ ẹhẹn rhe harẹn i Jehova rhẹ ọmudu rọ gbare.”—1 Chron. 29:9.

Ẹgbukpe buebun a vrẹn, Jehova nọ ha ẹkwaphiẹrhotọre ọrọrọ mwu, rọ do ghwẹ oghwa ẹga ọrana. Jehova nọ ha oghwa ẹga ọrẹ ẹhẹn mwu, ọnana yẹ ẹkwaphiẹrhotọre rẹ ituakpọ ina sabu ga ye nyoma izobo i Jesu. (Heb. 9:11, 12) Marhẹ i Jehova o ru lele ihworho kwaphiẹrhọ inyenana? Nyoma owian aghwoghwo na. (Matt. 28:19, 20) Nyoma owian ọnana, na ha i Baibol yono ihworho ri te oduduru buebun, uriusiorin buebun e ji bromarhame, a jeghwai ha ikoko ekpokpọ ri te uzusiorin buebun mwuẹ kukpe kukpe.

Eru riaro ọnana, nọ lẹrhẹ ukoko na fomu ẹbe buebun phia, ukoko na ọ ji bọn Aghwẹlẹ Uvie ọrhẹ Aghwẹlẹ omẹvwa buebun jeghwai kwaphiẹ aye rhọ. We kwerhọ ye taghene owian re ghwoghwo iyẹnrẹn esiri na, ọ doro jeghwai vuọn rhẹ erere?—Matt. 24:14.

Ẹguọlọ rẹ ọwan i vwo kpahen Osolobrugwẹ, ereva ọwan ọrhẹ oborẹ owian aghwoghwo na orhiẹ ọrẹ okpakpa te, ọ lẹrhẹ ihworho Osolobrugwẹ “homaphia . . . rhẹ ẹghẹlẹ rọ ha obọ rẹ aye ine ru rẹn i Jehova,” nyoma aye e toro itetoro nẹ ẹhẹn sa. Marhẹ ọ merhen oma te, ra na “họghọ rẹn i Jehova rhẹ ekwakwa eghoghanren” ọwan, jeghwai mẹrẹn oborẹ ugboma usuon na ọ ha ekwakwa enana ruiruo izede ẹghwanren uvuẹn owian aghwoghwo na!—Prov. 3:9.

Oborẹ Ihworho Ezẹko E Ru Hobọtua Owian Ukoko Na

Ihworho buebun inyenana, e fi igho rhẹ okokọ, rẹ aye ine fi rhẹ ekpeti uvuẹn Aghwẹlẹ Uvie. (1 Cor. 16:2) Kubiamo kubiamo, ikoko na a ha itetoro enana vwe oghọn ukoko Iseri Jehova rọ ha uvuẹn ẹkwotọre aye. Wu na ji sabu toro itetoro nyoma eghọn sansan rẹ Iseri Jehova a ha ruiruo uvuẹn ẹkwotọre ọnọ. Ne wu rhe eghọn sansan rẹ Iseri Jehova a ha ruiruo uvuẹn ẹkwotọre ọnọ, biko nekpẹn userhumu mie oghọn ukoko rọ ha uvuẹn ẹkwotọre ọnọ. Wu na sabu mẹrẹn adrẹsi na uvuẹn www.jw.org. Itetoro owẹwẹ ọvo ina sabu ru yẹ:

ITETORO OMOBỌ

Ọnana itetoro re ruẹ nyoma ibanki, ATM kadi kugbe itetoro nyoma ifonu. Uvuẹn oghọn ukoko Iseri Jehova ezẹko, a sabu nyoma jw.org yanghene i wẹbsaiti erọrọ toro itetoro.
Ana ji sabu toro igho yanghene ekwakwa eghoghanren erọrọ. Ya ileta vwe oghọn ukoko, ro no djephia taghene igho yanghene ekwakwa re torori na, ọrẹ itetoro omobọ.

ẸKWAPHIẸRHOTỌRE ITETORO IBIỌKE

Ana sabu toro igho rẹn ukoko Iseri Jehova, rẹ aye ina kwa rẹn ọwan, ọwan i rha guọlọ igho na ne.
Ya ileta vwe oghọn ukoko, ro no djephia taghene itetoro na, ọrẹ ibiọke.

ẸGHẸLẸ RE MWUEGBE YI RHOTỌRE

Haba itetoro igho ọrhẹ ekwakwa eghoghanren erọrọ, o ji vwo ena erọrọ ra sabu toro itetoro. E kele rẹ aye rhẹ obotọre. Kona kona wu guọlọ ha ruiruo, biko kiki nekpẹn userhumu mie oghọn ukoko Iseri Jehova rọ ha uvuẹn ẹkwotọre ọnọ, nẹ aye i ta wẹn ena ra ha ruiruo re havwiẹ. Ra mẹriẹn taghene urhi ro suẹn osa urhumu ọ vẹnẹ nẹ ekete fie ekete, no fori ne wu nọ vwẹre wu ki djẹ ona wu na ha ruiruo.

Igho re kokori: Ana sabu toro igho re kokori rẹn oghọn ukoko Iseri Jehova, jerẹ igho ra kwa rẹn ohworho ọrhọ ruotọre nẹ iruo yanghene igho ra kwa rẹn ekrun ohworho, orhianẹ ohworho na o hwuru.

Ekwakwa re fi rhẹ ibanki: Ana sabu toro igho re fi rhẹ ibanki, yanghene igho ra kwa rẹn ohworho ọrhọ ruotọre nẹ iruo. Ohworho na, ọnọ sabu ta taghene a kwa ye rẹn ukoko na orho hwu.

Erere ri nẹ eyẹsuọ rhe: Ana sabu ha erere ra mẹrẹnren nẹ eyẹsuọ e ru ẹghẹlẹ rẹn oghọn ukoko Iseri Jehova, nyoma ana ya ọbe rhotọre taghene a haye rẹn oghọn ukoko Iseri Jehova, erhe hwu.

Eghwa ọrhẹ etọre: Ana sabu toro itetoro nyoma ana ha oghwa yanghene otọre ru ẹghẹlẹ rẹn oghọn ukoko Iseri Jehova, orhianẹ ohworho ro vwo oghwa na, ọ guọlọ rhirhiẹ ye, ọnọ sabu rhirhiẹ uvuien bọmọke ono hwu.

Ekwakwa uku: Itetoro ọnana o sekpahen ẹkwaphiẹrhotọre ra ya rhotọre taghene a guọlọre nẹ oghọn ukoko Iseri Jehova, ọ ha igho yanghene ekwakwa re vwori riuku, erhe hwu.

Jerẹ oborẹ ẹmro na “ẹghẹlẹ re mwuegbe yi rhotọre” o mevirhọ, aruo itetoro enana i guọlọ egbemwu mie ohworho ro no toro itetoro na.

Wu rha guọlọ iyẹnrẹn ọrọrọ, biko hiẹn riẹ “Toro itetoro rẹn owian ukoko na ephian” hiẹn riẹ obotọre i jw.org, yanghene nekpẹn userhumu mie oghọn ukoko.