Ẹghẹlẹ Ọgo Ya Na Sabu Yẹ I Jehova?

JESU ọ tare ọke owu: “Omamerhomẹ ọ havwiẹ harẹn ohworho ro tiobọnẹ ghwẹ ọrẹ a yẹre.” (Acts 20:35) Uruemru-urhi ọrana o ji sekpahen onyerẹnkugbe ọwan rhẹ i Jehova. Izede ọgo? Jehova ọ yẹre ọwan ẹghẹlẹ buebun ra lẹrhẹ oma merhen ọwan, ọrẹn ana sabu mẹrẹn omamerhomẹ ọduado erhe ruẹ ẹghẹlẹ rẹn i Jehova. Ẹghẹlẹ ọgo ya na sabu yẹ i Jehova? Proverbs 3:9 ọrhọ ta: “Họghọ rẹn i Jehova rhẹ ekwakwa eghoghanren enọ.” Usuẹn “ekwakwa eghoghanren” re vwori yẹ ọke, ena, omẹgbanhon, ọrhẹ ekwakwa ugboma ọwan. Arha ha aruẹ ekwakwa erana hobọtua ogame urhomẹmro na, ọwan ne ruẹ ẹghẹlẹ rẹn Osolobrugwẹ, nọ jeghwai yẹ ọwan omamerhomẹ ọduado.

Orho sekpahen ekwakwa ugboma re vwori, me yọ nọ ha userhumu rẹn ọwan ja sẹrerhumuji ẹghẹlẹ re ne ru rẹn i Jehova? Ọnyikọ Paul ọ ha urhebro rẹn Ilele Kristi ri ha Corinth nẹ aye i “fiẹ emru rhẹ okokọ” rẹ aye ine toro. (1 Cor. 16:⁠2) Me wu na sabu ru orhianẹ wu guọlọ rhe iyẹnrẹn erọrọ kpahen izede sansan ra ha toro itetoro uvuẹn ekete we rhirhiẹ? Biko se ekpeti rọ ha obotọre na.

O rhiẹ ekwotọre ephian ya sabu toro nyoma itanẹti-i. Ọrẹn, wu na sabu mẹrẹn izede erọrọ ra na sabu toro uvuẹn ekete rọ tẹmro kpahen itetoro uvuẹn iwẹbsaiti na. Uvuẹn ẹkwotọre ezẹko, o vwo ekete uvuẹn iwẹbsaiti na rọ ji kpahenrhọ enọ rẹ ihworho i nọ kpahen itetoro ne.