Emiemọ, Are i Yono Emọ Are nẹ Aye i Vwo Irherhe

Ọwan e nyerẹn uvwre ihworho re ni orhorhomu taghene obiobiomu ji ni obiobiomu taghene orhorhomu. (Isa 5:20) Ọrẹ omemwurhọ, ihworho ezẹko e ruẹ ekwakwa ri Jehova o vwo utuoma kpahen, jerẹ uruemru rẹ ehworhare a gbẹ ehworhare yanghene emẹse a gbẹ emẹse. Igbehian emọ ọwan obẹ isukuru yanghene awọrọ ina sabu rha riẹriẹ aye nẹ aye i hẹrokele aye vwobọrhọ erharhere iruemru. Marhẹ wu ne ru mwuegbe emọ enọ nẹ aye i sabu fi ọdamuni ọnana yanghene eri họhọ ọnana kparobọ?

Yono emọ enọ kpahen iruemru-urhi Jehova. (Le 18:3) Rhe yono aye bibiesuọn sekpahen ẹgbukpe aye, nẹ aye i rhe oborẹ i Baibol na ọ ta kpahen ehware ro serhọ. (De 6:7) Nọ oma: ‘Mi yono emọ mẹ ne kpahen izede ro fori re ne dje ẹguọlọ phia, oborẹ ọ ghanren te ra na sẹ osẹme ro fori, ọrhẹ oborẹ aye ine ruo orhianẹ a guọlọ hobọte aye ekete ro vwo fo? Emọ mẹ ine rhe oborẹ aye ine ruo orhianẹ ohworho o dje ifoto yanghene ughe ihworho ri banfirhọ rẹn aye? Yanghene oborẹ aye ine ruo orhianẹ ohworho ọ ta rẹn aye nẹ aye i ru oborẹ i Jehova o vwo utuoma kpahen?’ Wu rhe yono aye vwana, ọnọ ha userhumu rẹn aye kẹnoma rẹn okpetu. (Pr 27:12; Ec 7:12) We rhe yono emọ enọ, we djephia taghene wu vwo ẹguọlọ kpahen ẹghẹlẹ ro nẹ obẹ i Jehova rhe na.—Ps 127:3.

NI IVIDIO NA BỌN OGHWA RO NO RHIRHIẸ YE—SẸRORẸ EMỌ ENỌ NẸ ‘OBORẸ OBIOMURUN,’ ORHO RU GBA KPAHENRHỌ ENỌ ENANA:

• 

  Mesoriẹ emiemọ ezẹko e tiẹrierhumu rẹ aye ine yono emọ aye kpahen ehware?

• 

  Mesoriẹ emiemọ ine vi yono emọ aye “lele ọkpọvi Jehova”?—Eph 6:4

• 

  Ekwakwa ego yẹ ukoko i Jehova o tiobọnu ne ri na ha userhumu rẹn emiemọ yono emọ aye kpahen ehware?—w19.05 12, ekpeti

• Mesoriẹ o fo ne wu rhe lele emọ enọ tẹmro kuẹgbe bọmọke ebẹnbẹn ina ki homaphia?