Idama—Are i Rhiẹ Ilele Kristi ri te Edje

1. Me yẹ idama ro rhiẹ Olele Kristi ono vi ru no fikparobọ?

ORODJE David nọ ta rẹn Solomon: “Gbanhon ne wu ji dje oma rhiẹ ọgba.” (1 Ki. 2:​1-3) Ofori nẹ Ilele Kristi ephian ri rhiẹ ehworhare inyenana i ha urhebro ọrana ruiruo. Na sabu vwo efikparobọ, aye ine vi yono ji huvwele irhi Jehova, jeghwai ha iruemru-irhi Baibol na ruiruo uvuẹn ọsoso akpenyerẹn aye. (Luke 2:52) Mesoriẹ ọghanren nẹ imizu ri rhiẹ idama i do te edje?

2-3. Mesoriẹ ọghanren nẹ idama o rhiẹ Olele Kristi ro te edje?

² Ọhworhare ro rhiẹ Olele Kristi o vwo ewian buebun uvuẹn ekrun ọrhẹ ukoko na. O vwo ẹfro-o, are ri rhiẹ idama i roro kpahen ohwan sansan rẹ are ine vwo obaro na ne. Ọkezẹko, are i bru ẹkẹ are ine rhiẹ ọkobaro, odibo owian yanghene ọkpako ukoko orho ru. Ọkezẹko, wu guọlọ rọnmọ ji vwiẹ emọ. (Eph. 6:4; 1 Tim. 3:1) Ọrẹn, ne wu sabu nyamwu ẹkẹ erana ji fikparobọ, o fori ne wu do te edje.b

³ Me yọ nọ ha userhumu wẹn do te edje? O vwo ena eghoghanren ro fori taghene wu vwo. Omarana, me wu na sabu ru vwana ne wu mwuegbe ji vwo efikparobọ uvuẹn ewian wu na wian obaro na?

IDJAGHWẸ RA LẸRHẸ OLELE KRISTI DUA TE EDJE

4. Bọgo wu na mẹrẹn omamọ idje wu na hẹrokele? (Ni ifoto na.)

⁴ Hẹrokele omamọ idje. Baibol na o vwo idje buebun rẹ idama ina sabu hẹrokele. Ehworhare erana ọke ahwanren i vwo ẹguọlọ kpahen Jehova, aye i ji kpare ehwan sansan rẹ aye a hẹrote ihworho yi. Wu na ji sabu mẹrẹn omamọ idje uvwre ehworhare ri rhiẹ Ilele Kristi ri te edje uvuẹn ekruon ọrhẹ ukoko na. (Heb. 13:7) Jesu Kristi jẹ omamọ udje wu na sabu hẹrokele. (1 Pet. 2:21) Ọke wa rha dabu yono kpahen idje enana, roro kpahen omamọ iruemru aye kirighwo. (Heb. 12:​1, 2) Orho ru, gbe brorhiẹn oborẹ wu ne ru hẹrokele aye.

5. Marhẹ wu ne ru vwo omẹgbanhon iroro, mesoriẹ ọghanren? (Psalm 119:9)

⁵ Vwo ne wu ji “sẹrorẹ . . . omẹgbanhon iroro.” (Prov. 3:21) Ọhworhare ro vwo omẹgbanhon iroro ọ dabu roro kpahen idjaghwẹ ye vwẹre o ki brorhiẹn. Omarana, wian gbanhon ne wu sabu vwo ji sẹrorẹ omẹgbanhon iroro. Mesoriẹ? Akpọ ọnana ọ vuọnren rhẹ idama ra nyalele iroro omobọ aye, yanghene ra lẹrhẹ iroro aye suẹn irueruo aye. (Prov. 7:7; 29:11) Ekwakwa ra kpare iyẹnrẹn ina ji sabu hobọto. Ọrẹn, marhẹ wu ne ru sabu vwo omẹgbanhon iroro? Tonrhọ nyoma wu ne yono kpahen iruemru-irhi Baibol na, ọrhẹ oborẹ ọsoriẹ aye rhiẹ emru erere. Orho ru, gba ha iruemru-irhi enana e brorhiẹn rọ nọ ha ujiri vwe i Jehova. (Se Psalm 119:9.) Wu rhe vwo ena eghoghanren enana, aye ina ha userhumu wẹn sabu rhiẹ Olele Kristi ro te edje ne. (Prov. 2:​11, 12; Heb. 5:14) Roro kpahen oborẹ omẹgbanhon iroro ono ru ha userhumu wẹn uvuẹn erhirhiẹ eva enana: (1) oborẹ wu ne ruẹ imizu emẹse lele, ọrhẹ (2) oborẹ wu ne ru brorhiẹn kpahen osẹme ọnọ.

6. Marhẹ omẹgbanhon iroro ono ru ha userhumu rẹn idama mwuọghọ rẹn emẹse?

⁶ Omẹgbanhon iroro ọnọ ha userhumu wẹn họghọ rẹn emẹse. O serhọ orhianẹ idama o vwo ọdamẹ kpahen omizu ọmase ro rhiẹ Olele Kristi. Ọrẹn, idama ro vwo omẹgbanhon iroro, ọ vwọ samọ ta, ya, yanghene ruẹ emru owuorowu ro no djephia taghene ọye o vwo ẹhẹn rọ nọ rọnmọ omizu ọmase na-a, jokpanẹ ọ ghini guọlọ rọnmiẹn. (1 Tim. 5:​1, 2) Orhianẹ ọ kọn rhẹ omizu ọmase owu, idama na ọnọ sẹrorẹ omamọ uruemru omizu na, izede aye awanva ine je rhirhiẹ ekete kologho, jokpanẹ ohworho yanghene ihworho i ha avwaye.—1 Cor. 6:18.

7. Marhẹ omẹgbanhon iroro ono ru ha userhumu rẹn idama ọke rọ djẹ aruẹ ewun ọrhẹ osẹme rọ nọ sẹ?

⁷ Izede ọrọrọ idama o ru djephia taghene o vwo iroro ro serhọ, yẹ odjẹ rọ djẹ sekpahen osẹme ọrhẹ omẹhaphia ye. Ọgbọ buebun, ihworho re ko jeghwai jiri aruẹ ewun ọrhẹ osẹme sansan, i vwe mwuọghọ rẹn Jehova-a, aye ji nyerẹn akpọ rọ vwọ fon. Omarana, ewun aye ko na ba oma aye, yanghene lẹrhẹ ehworhare họhọ emẹse. Ọke idama rọ hẹrokele udje i Jesu, ọ djẹ aruẹ ewun ro no kurhọ, ofori nọ ha uphẹn rẹn iruemru-urhi Baibol na no suien, nọ ji nyalele omamọ idje ri ha uvuẹn ukoko rọ havwọ. Ọnọ sabu nọ omayen: ‘Odjẹ mẹ o djephia taghene mi vwo iroro rọ gbare, ji họghọ rẹn awọrọ? Oborẹ mia sẹ osẹme lele ọ lẹrhiẹ phẹrẹ awọrọ ine vwo imwẹro taghene mẹmẹ odibo i Jehova?’ (1 Cor. 10:​31-33; Titus 2:6) Oma ọnọ merhen i Jehova ọrhẹ imizu ukoko na kpahen idama ro vwo omẹgbanhon iroro.

8. Marhẹ idama ono ru rhiẹ ohworho ra hẹrosua?

⁸ Rhiẹ ohworho ra hẹrosua. Idama ra hẹrosua, ọ dabu gbẹro rhotọre wian ọsoso ewian ra yẹriẹ. (Luke 16:10) Roro kpahen udje ọgbagba ọrẹ Jesu. O nẹro rẹn ewian yen, yanghene wian aye yanghan yangha-an. Ukpomaran, ọ wian owian ri Jehova ọ yẹriẹ, tobọ te uvwrọke ọgbogbanhon. O vwo ẹguọlọ kpahen ihworho—maido idibo yi—o ji vwo omwemẹ rọ nọ ha arhọ ye kpahontọre rẹn aye. (John 13:1) Jerẹ i Jesu, wian gbanhon uvuẹn owian ephian ra yẹruọ. Orhianẹ we rhe oborẹ wu na wian yen lele-e, homariotọre nekpẹn userhumu mie imizu ehworhare ri te edje. Wu vwe ruẹ ibiẹ uchunu wu na sabu ru ọvo-o. (Rom. 12:11) Ukpomaran, dabu wian ewian gba, wian yen rẹn “Jehova, orhiẹ ituakpọ-ọ.” (Col. 3:23) Itiọrurhomẹmro, wa gba-a, omarana vwo omeriotọre ne wu ji kwe orusọ enọ.—Prov. 11:2.

VWO ENA WU NA HA RUIRUO KẸDẸKẸDẸ

9. Mesoriẹ idama ono vi vwo ena rọ nọ ha ruiruo kẹdẹkẹdẹ?

⁹ Ne wu sabu rhiẹ Olele Kristi rọ do te edje, ofori wu vwo ena wu na ha ruiruo kẹdẹkẹdẹ. Ena enana ina ha userhumu wẹn kpare ohwan uvuẹn ukoko na, vwo iruo rọ nọ ha userhumu wẹn hẹrote oma yanghene ekruon, ji vwo omamọ onyerẹnkugbe rhẹ awọrọ. Jene roro kpahen ezẹko usuẹn ena enana.

10-11. Marhẹ idama ono ru mẹrẹn erere rẹn omayen ọrhẹ imizu ukoko na ọke orho rhe oborẹ e se ji ya fiotọre? (Psalm 1:​1-3) (Ni ifoto na.)

¹⁰ Yono oborẹ e se ji dabu ya fiotọre. Baibol na ọ tare taghene ohworho rẹ oma ọ merhan ji fiẹkparobọ, o fiẹ ọke rhotọre kẹdẹkẹdẹ se Ẹmro Osolobrugwẹ ji roro kodo kpahiẹn. (Se Psalm 1:​1-3.) We rhe se i Baibol na kẹdẹkẹdẹ, nu we rhe iroro i Jehova, rọ nọ ha userhumu wẹn dabu roro ekwakwa fiotọre. (Prov. 1:​3, 4) A guọlọ aruẹ ehworhare erana uvuẹn ukoko na. Mesoriẹ?

¹¹ Imizu ukoko na i guọlọ userhumu imizu ehworhare ri mwuovwan nẹ aye i sabu vwẹruọ urhebro ọrhẹ ọkpọvi ra bọn kpahen i Baibol na. (Titus 1:9) Wu rhe rhe oborẹ e se ji ya fiotọre, wu na sabu mwuegbe obọdẹn iyẹnrẹn, ẹmro ọrhẹ ẹkpahenrhọ ra bọn awan gbanhan. Wu na ji sabu ya ẹmro ri na ha userhumu wẹn rhotọre, ọke we yono ọrhẹ ọke wa kerhọ ẹmro otu uvuẹn uyono ukoko, ọrhẹ uvuẹn omẹvwa okinhariẹ kugbe emẹvwa ẹkwotọre. Ẹmro erana wu ya rhotọre ina ha userhumu wẹn bọn esegburhomẹmrọ gbanhon, ji ha urhebro rẹn awọrọ.

12. Me yọ nọ ha userhumu wẹn vwo ena re lele awọrọ tẹmro?

¹² Vwo ena re lele awọrọ tẹmro. Idama ro rhiẹ Olele Kristi ono vi yono oborẹ e lele awọrọ dabu tẹmro. Ọhworhare rọ dabu rhe ẹmro ta, ọ kerhọ ji kwerhọ iroro awọrọ. (Prov. 20:5) Ọ sabu vwẹruọ aruẹ uvwele awọrọ a ha tẹmro, oborẹ ughwaro aye o djephia ọrhẹ oborẹ aye a rhua oma aye lele. Wu sabu yono ena enana-a, jokpanẹ wu ghwọghọ ọke rhẹ ihworho. Orhianẹ wa ha ifonu yanghene ikọmputa ruiruo, jerẹ ọrẹ wa ha dje urhomu vwe awan, ọrana ọnọ sabu lẹrhuọ je rhe oborẹ e lele awọrọ tẹmro. Omarana, rhie uphẹn firhọ wu ne lele awọrọ tẹmro kugbe.—2 John 12.

13. Me yẹ emru ọrọrọ rẹ idama ono yono? (1 Timothy 5:8) (Ni ifoto na.)

¹³ Yono oborẹ wu ne ru hẹrote oma. Idama ro te edje ne ọnọ vi hẹrote omayen ọrhẹ ekruien. (Se 1 Timothy 5:8.) Uvuẹn ẹkwotọre ezẹko, idama e yono ena mie ọsẹ aye yanghene owuọwan uvuẹn ekrun aye. Uvuẹn ẹkwotọre erọrọ, idama o yono iruo yanghene aruẹ owian erọrọ uvuẹn isukuru uvwre ibiọke. Uvuẹn erhirhiẹ ephian, ofori wu yono aruẹ iruo owu rọ nọ ha userhumu wẹn mẹrẹn iruo. (Acts 18:​2, 3; 20:34; Eph. 4:28) Vwo uruemru ra dabu gbẹro rhọ owian, ji wian yen hiẹn. We rhe ruẹ omaran, wu na sabu mẹrẹn iruo, ji sẹroriẹ. Iruemru ọrhẹ ena ra hunute ne na, i rhiẹ oborẹ i ghanranren rẹn idama ri rhiẹ Ilele Kristi, neneyo aye i sabu wian owian ro teri aye uvuẹn obaro na. Jene yono kpahen ewian erana ezẹko.

MWUEGBE HẸRHẸ EWIAN OBARO NA

14. Marhẹ idama ono ru mwuegbe ro no rhiẹ ọkobaro ọke ephian?

¹⁴ Vwobọrhọ iruo Uvie na vuọnvuọn. Imizu ehworhare buebun ri te edje ne, i tuẹn owian Uvie na rhọ vuọnvuọn ọke uphuphẹn. Owian ọkobaro ọ ha userhumu rẹn idama yono oborẹ ono ru lele aruẹ ihworho sansan wian kugbe. Ọ ji ha userhumu riẹn brorhiẹn uchunu igho rọ nọ ghwọghọ, ji ha ẹghwanren haye ruiruo. (Phil. 4:​11-13) Oborẹ ọnọ ha userhumu riẹn rhiẹ ọkobaro yẹ ọrẹ ono rhiẹ ọkobaro ibiọke. Buebun aye i gare ẹrhẹ ọkobaro ibiọke uvwrọke, rọ ha userhumu rẹn aye rhiẹ ọkobaro ọke ephian. Owian ọkobaro ọnọ ha userhumu rẹn aye vwo uphẹn ẹga erọrọ, jerẹ owian ebanbọn yanghene ya ga obẹ Oghọn Ukoko.

15-16. Marhẹ idama ono ru mwuovwan rọ nọ ga ẹrhẹ odibo owian yanghene ọkpako uvuẹn ukoko na?

¹⁵ Rhiẹ odibo owian yanghene ọkpako ukoko. Ehworhare ri rhiẹ Ilele Kristi, i bru ẹkẹ aye ina nyamwu evwan rọ nọ lẹrhẹ aye rhiẹ idibo owian yanghene ekpako ukoko. Baibol na ọ tare taghene idama ro ruẹ riaro no rhiẹ oniruo, “omamọ owian yo vwo ẹhẹn kpahen.” (1 Tim. 3:1) Bọmọke ọnọ ki ga ẹrhẹ ọkpako, idama ono vi mwuovwan ro no rhiẹ odibo owian. Idibo owian a ha userhumu rẹn ekpako hẹrote imizu ukoko na. Ekpako ọrhẹ idibo owian a ha userhumu rẹn imizu ukoko na, ji vwobọrhọ owian aghwoghwo na rhẹ oruru. Idama ina sabu mwuovwan aye ine rhiẹ idibo owian, ọke aye a ha uvwre ẹgbukpe 17-19. Habaye, odibo owian rọ dabu mwuovwan, ọnọ sabu rhiẹ ọkpako ukoko ọke rọ ha uvwre ẹgbukpe 20-24.

¹⁶ Marhẹ wu ne ru mwuovwan hẹrhẹ ewian enana? O vwo aruẹ ona owu-u. Ọrẹn, evwan enana wu na nyamwu i ha i Baibol na, a bọnren aye kpahen ẹguọlọ wu vwo kpahen Jehova, ekruon, ọrhẹ imizu ukoko na. (1 Tim. 3:​1-13; Titus 1:​6-9; 1 Pet. 5:​2, 3) Damoma vwẹruọ evwan enana owuowu. Nẹrhomo vwe i Jehova nọ ha userhumu wẹn nyamwu aye.c

17. Marhẹ idama ono ru mwuegbe ro no rhiẹ esa ọrhẹ urhomu ekrun? (Ni ifoto na.)

¹⁷ Esa ọrhẹ urhomu ekrun. Jerẹ oborẹ i Jesu ọ tare, imizu ehworhare ezẹko ri te edje ne, a rọnmọ-ọ. (Matt. 19:12) Ọrẹn, wu rhe brorhiẹn wu na rọnmọ, nọyẹ wu vwo ewian erọrọ wu ne rhiẹ esa ọrhẹ urhomu ekrun. (1 Cor. 11:3) Jehova ọ guọlọre nẹ esa o vwo ẹguọlọ kpahen aniẹ, ji hẹrote edamẹ ugboma yen, rhiẹ ugbehian yen, ji ha userhumu riẹn ga i Jehova. (Eph. 5:​28, 29) Iruemru ọrhẹ ena ra hunute uvuẹn ọtonrhọ urhomu-ẹmro ọnana, jerẹ ọrẹ ene vwo omẹgbanhon iroro, ọrẹ ana họghọ rẹn emẹse, ji rhiẹ ohworho ra hẹrosua, ina ha userhumu wẹn rhiẹ omamọ esa. Ọnọ lẹrhuọ dabu mwuegbe wu na wian ewian we rhiẹ esa ọrhẹ urhomu ekrun gba.

18. Marhẹ idama ono ru mwuegbe ro no rhiẹ ọsẹ?

¹⁸ Ọsẹ. Wu rha rọnmọ hin, wu na sabu rhiẹ ọsẹ. Me wu na sabu yono mie Jehova kpahen ọrẹ wu ne rhiẹ omamọ ọsẹ? O vwo iyono buebun. (Eph. 6:4) Jehova ọ ta rẹn Ọmọyen, Jesu, taghene ọye o vwo ẹguọlọ kpahiẹn, ji vwo ekwerhọ ye ọrẹ afiede. (Matt. 3:17) Wu rhe rhiẹ ọsẹ, damoma yẹ emọ imwẹro ọke ephian taghene wu vwo ẹguọlọ kpahen aye. Rha dabu jiri aye ghwologhwolo fọkiẹ ekwakwa irhorhomu aye ruẹ. Esẹ ra hẹrokele udje i Jehova, a ha userhumu rẹn emọ aye dua te edje uvuẹn ukoko na. Wu na sabu mwuegbe vwana hẹrhẹ owian ọnana nyoma wu ne vwo ẹguọlọ kpahen awọrọ uvuẹn ekruon ọrhẹ uvuẹn ukoko na, ji yono oborẹ wu ne ru dje ẹguọlọ ọrhẹ ọdaremẹro phia rẹn aye. (John 15:9) Ọnana ọnọ ha userhumu wẹn dabu wian owian gba, re wu ne rhiẹ esa ọrhẹ ọsẹ. Ọrẹn vwana, damoma rhiẹ ohworho rọ wian rẹn Jehova, ekruon, ọrhẹ ukoko na.

ME WU NE RUO VWANA?

19-20. Me yọ nọ ha userhumu rẹn idama rhiẹ Olele Kristi ro te edje? (Ni ifoto obaro ọbe na.)

¹⁹ Are ri rhiẹ idama, i sabu rhiẹ Olele Kristi ro te edje ogege-e. Ofori wu djẹ omamọ idje wu na hẹrokele, vwo omẹgbanhon iroro, rhiẹ ohworho ra hẹrosua, tẹn ena wu na ha ruiruo kẹdẹkẹdẹ, ne wu ji mwuegbe hẹrhẹ ewian obaro na.

²⁰ Ofu ọnọ sabu zo ọke we roro kpahen ewian ri ha obaro na. Ọrẹn, wu na sabu fikparobọ. Karorhọ taghene Jehova o mwuegbe rọ nọ ha userhumu wẹn. (Isa. 41:​10, 13) Itiọrurhomẹmro, imizu ukoko na ina ji ha userhumu wẹn. Wu rha sabu do te edje ne, wu ne vwo obọdẹn akpenyerẹn ro vwo ebrurhọ. Ame i vwo ẹguọlọ kpahen are idama! Jenẹ i Jehova ọ ha ebrurhọ rẹn are ọke are a wian gbanhan nẹ are i rhiẹ Ilele Kristi ri te edje.—Prov. 22:4.