“Rhe Leli” Jesu wu Rhe Bromarhame ne

1-2. Ebrurhọ ego ya mẹrẹn erhe bromarhame ne?

EMRU aghọghọ re ne bromarhame rhiẹ usuẹn ekrun i Jehova. Eri vwo uphẹn ọduado ọnana i kwerhọ ẹmro ọbo ijoro David, rọ tare: “Omamerhomẹ ọ havwiẹ rẹn ohworho rẹ owẹwẹ [Jehova] i djẹha, no rhirhiẹ egodo ọnọ.”—Ps. 65:4.

² Jehova ọ vwọ kpara ha ihworho ba ekrun ọnẹye-en. Jerẹ oborẹ e yonorin uvuẹn urhomu-ẹmro rọ vrẹnren, Jehova o tiẹkẹrẹ ihworho ri guọlọ vwo obọdẹn onyerẹnkugbe rhẹ ọye. (Jas. 4:8) Wu rha homakpahontọre rẹn i Jehova ji bromarhame ne, nu we tiẹkẹriẹ uvuẹn izede oghẹnrensan. Vwo imwẹro taghene wu rhe bromarhame hin, ọnọ yọ ‘ebrurhọ buebun bọmọke emru owuorowu ọnọ jọ kanruọn.’—Mal. 3:10; Jer. 17:​7, 8.

3. Owian ọghoghanren ọgo yẹ Ilele Kristi ri homakpahontọre rẹn i Jehova ji bromarhame ne i vwori? (Ecclesiastes 5:​4, 5)

³ Wu rhe bromarhame hin, o ji vwo ekwakwa erọrọ wu ne ruo. Wu na damoma nyerẹnmwu ive omẹhakpahontọre ọnọ, udabọ ẹkparehaso yanghene edamuni. (Se Ecclesiastes 5:​4, 5.) Ru we rhiẹ odibo i Jesu ne na, wu na vi hẹrokele udje i Jesu ji nyalele irhi enẹyen ọke ephian. (Matt. 28:​19, 20; 1 Pet. 2:21) Urhomu-ẹmro ọnana ọnọ ha userhumu wẹn ru te omaran.

“RHE LELI” JESU UDABỌ EBẸNBẸN ỌRHẸ EDAMUNI

4. Izede ọgo yẹ idibo i Jesu ina kpare “orhan oja” aye? (Luke 9:23)

⁴ Wu rhe bromarhame hin, wu na sabu dẹrughwaroghwu ebẹnbẹn ezẹko. Ọnana yọ soriẹ i Jesu ọ ta taghene idibo yi ephian ina kpare “orhan oja” aye. Itiọrurhomẹmro, aye ine ruẹ omaran “kẹdẹkẹdẹ.” (Se Luke 9:23.) Jesu nọ haye ta taghene idibo yi ina rha rioja ọke ephian? Ẹjo. Ukpomaran, o mevirhọ taghene haba ebrurhọ ra na mẹrẹn, ene rhiẹromẹrẹn ebẹnbẹn. Ezẹko usuẹn ebẹnbẹn enana ina tobọ miamoma dede.—2 Tim. 3:12.

5. Ebrurhọ ego yi Jesu o vive kpahen rẹn eri ha Uvie na karo?

⁵ Ọkezẹko, ihworho ekrun ọnọ i kparehasuọ vrẹn ne yanghene wu sẹrerhumuji ekwakwa ugboma ezẹko, ne wu sabu ha edamẹ Uvie na karo. (Matt. 6:33) Orhiomaran, jenẹ o mwuo ẹro taghene Jehova ọ djokarhọ ewian esegburhomẹmro ọnọ. (Heb. 6:10) Ọkezẹko ẹmro i Jesu enana i rugba uvuẹn urhomuo ne, taghene: “O vwo ohworho rọ nyajẹ oghwa ye vwo yanghene imizie ehworhare yanghene imizie emẹse yanghene izie yanghene ọsẹ ye yanghene emọyen yanghene ikegbe fọkiẹ omẹmẹ ọrhẹ fọkiẹ iyẹnrẹn esiri na, rọ nọ jọ mẹrẹn aye akwa 100 ọke ọnana-a, ono ji vwo eghwa, imizu ehworhare, imizu emẹse, izu, emọ ọrhẹ ikegbe kugbe ẹkparehaso, ọrẹn uvuẹn enyerẹn ọrọ sa na, ono vwo arhọ i bẹmẹdẹ.” (Mark 10:​29, 30) Itiọrurhomẹmro, ebrurhọ wu mẹrẹn ne, i ghini bun ghwẹ ekwakwa wu tiobọnu.—Ps. 37:4.

6. Mesoriẹ o fo ne wu rha wọnrọn hasuẹ “ojemẹ ugboma” wu rhe bromarhame ne?

⁶ Wu rhe bromarhame hin, o ji fo ne wu wọnrọn hasuẹ “ojemẹ ugboma.” (1 John 2:16) Fọkime, wẹwẹ jẹ ọmọ Adam rọ vwọ gba. Ọkezẹko, iroro ọnọ ọ họhọ ọrẹ ọnyikọ Paul. Nọ yare: “Ohworho mi havwọ uvuien o ghini vwo omamerhomẹ kpahen urhi Osolobrugwẹ, ọrẹn, mia mẹrẹn urhi ọrọrọ uvuẹn ugboma mẹ rọ wọnrọn hasuẹ urhi ro suẹn iroro mẹ, nọ lẹrhe mẹ rhiẹ ọvrẹn rẹn urhi ọdandan rọ ha uvuẹn ugboma mẹ.” (Rom. 7:​22, 23) Ẹhọn ọnọ sabu seriotọre ọkezẹko fọkiẹ ojemẹ esọsọ enana. Ọrẹn we rhe roro kpahen ive wu ve rẹn i Jehova ọke wa homakpahontọre riẹn, ọnọ ha userhumu wẹn wọnrọn hasuẹ edamuni. Itiọrurhomẹmro, ive omẹhakpahontọre ọnọ, ọnọ ha userhumu wẹn wu rha dẹrughwaroghwu edamuni. Izede ọgo?

7. Marhẹ omẹhakpahontọre rẹn i Jehova ono ru ha userhumu wẹn fuevwan kpahiẹn?

⁷ Wu rha homakpahontọre rẹn i Jehova, nu wa tiẹn oma. Ọnana o mevirhọ taghene wu na tiẹn ojemẹ ọrhẹ ẹkẹ omobọ ezẹko ri Jehova o vwo utuoma kpahen. (Matt. 16:24) Omarana, wu rha dẹrughwaroghwu ọdamuni, wu vwe rhe roro kpahen oborẹ wu ne ruo-o. Fọkime wu brorhiẹn rhotọre kpahen oborẹ wu ne ruo ne, nọyẹ, ọrẹ wu na fuevwan kpahen i Jehova. Ne wu ne vwo omwemẹ wu na lẹrhẹ oma merhen i Jehova. Ọke ọrana, ne wu na họhọ i Job. Udabọ edamuni egbogbanhon rọ dẹrughwaroghwu, o ji fiudugbere ta: “Mi na sẹrorẹ emevigbanhon mẹ!”—Job 27:5.

8. Marhẹ eroro kodo kpahen ẹrhomo omẹhakpahontọre ọnọ, ono ru ha userhumu wẹn tiẹn edamuni?

⁸ We rhe roro kodo kpahen ẹrhomo omẹhakpahontọre ọnọ rẹn i Jehova, wu ne vwo omẹgbanhon wu na tiẹn edamuni ephian. Jerẹ udje, wu lele esa yanghene ane ọwọrọ ruẹ irueruo obẹlẹme-e, gbinẹ wu ne ruie? Ẹjo! Fọkime wu ve rẹn i Jehova ne taghene wu na sẹrerhumuji ekwakwa erana. Wu rha tiẹn ojemẹ esọsọ ne, wu rhe brudu taghene aye ine kpokpo ẹhọn wu rhe bromarhame hi-in. Ọke ọrana, ne wu na sabu “kẹnoma” rẹn “izede ọvwọkon na.”—Prov. 4:​14, 15.

9. Marhẹ eroro kodo kpahen ẹrhomo omẹhakpahontọre ọnọ, ono ru ha userhumu wẹn ha ogame i Jehova karo?

⁹ Me wu ne ruo orhianẹ a yẹruọ owian, rọ nọ lẹrhuọ ja sabu riẹ uyono ukoko ọke ephian? Wu rhe oborẹ wu ne ruo. Bọmọke a ki ha owian na wẹn, wu brorhiẹn ne taghene wu ha aruẹ owian ọrana-a. Omarana, ne wu na sabu brorhiẹn ro serhọ. Wu rha karorhọ omwemẹ ri Jesu o djephia nọ sabu lẹrhẹ oma merhen Ọsẹ ye, ọnọ lẹrhuọ kiki tiẹn kemru kemru ri Jehova o vwo utuoma kpahen, ro rhiẹ ohworho wu homakpahontọre riẹn ne.—Matt. 4:10; John 8:29.

10. Marhẹ i Jehova ono ru ha userhumu wẹn “rhe leli” Jesu wu rhe bromarhame ne?

¹⁰ Itiọrurhomẹmro, ebẹnbẹn ọrhẹ edamuni a yọ uphẹn wu ne djephia taghene wu guọlọ “rhe leli” Jesu. We rhe ruẹ ọnana, vwo imwẹro taghene Jehova ọnọ ha userhumu wẹn. Baibol na ọ tare: “Osolobrugwẹ ọ fuevwan, ọ vwọ samọ lẹrhẹ are dẹrughwaroghwu ọdamuni rẹ are ina ja sabu di-in, ọrẹn, ọnọ ji gbẹn izede firhọ nẹ are i sabu din ọdamuni na.”—1 Cor. 10:13.

OBORẸ ENE RU RHE LELI JESU

11. Me yẹ izede owu rọ mai ghanren wu ne leli Jesu ọke ephian? (Ni ifoto na.)

¹¹ Jesu o vwo oruru kpahen ogame i Jehova, ọ ji nẹrhomo vwe yi ọke ephian. (Luke 6:12) Wu rhe bromarhame hin, izede owu rọ mai ghanren wu ne leli Jesu ọke ephian, yẹ ọrẹ wu ne ruẹ ekwakwa ri na lẹrhuọ tikẹrẹ i Jehova rhọ. Baibol na ọ tare: “Kerhirhiẹ kerhirhiẹ ọwan i ru riaro te ne, jene rhe ruẹ riarorhọ uvuẹn erhirhiẹ ọnana.” (Phil. 3:16) Ne ọke ya ruọke, wu ne rhon kpahen oborẹ imizu sansan i ru fiomarhọ ogame i Jehova vuọnvuọn. Ọkezẹko aye i riẹ Isukuru Ighwoghwẹmro Uvie na, yanghene ya ga uvuẹn ekete ra mai guọlọ userhumu. Wu rhe vwo uphẹn na, bru ẹkẹ ọnana tẹ oma. Oma ọ merhen ihworho i Jehova, aye ine kerabọ owian aghwoghwo aye. (Acts 16:9) Ọrẹn, wa rha sabu ru te omaran vwo? Wu vwe roro taghene wa ghanren te ihworho ri ru te omara-an. Ọ ghanranren omamọ nẹ Olele Kristi orho dje edirin phia. (Matt. 10:22) Karorhọ taghene wu rha ha ọsoso omẹgbanhon ọnọ ga i Jehova udabọ erhirhiẹ ephian wu havwọ, ọrana yọ lẹrhẹ oma merhiẹn. Ọrana izede ọghoghanren owu wu ne leli Jesu ọke ephian wu rhe bromarhame hin.—Ps. 26:1.

12-13. Me wu ne ruo orhianẹ oruru wu vwo kpahen ogame i Jehova no seriotọre? (1 Corinthians 9:​16, 17) (Se ekpeti na “Rha Zorhẹ na Nyarhẹn.”)

¹² Me wu ne ruo orhianẹ wu vwa rha riamerhen owian aghwoghwo ọnọ-ọ, yanghene ẹrhomo ọnọ o vwo rho nẹ ẹhẹn sa-a? Orhianẹ wu vwa rha riamerhen isese i Baibol ọnọ vwo? Ọrana ọrhọ phia wẹn wu rhe bromarhame hin, wu vwe brorhiẹn taghene Jehova ọ sẹrerhumujo ne-e. Wẹwẹ ohworho rọ vwọ gba, habaye, iroro ọnana ọnọ sabu kpokpuo. Wu rha djokarhọ taghene oruru ọnọ o seriotọre, roro kpahen udje ọnyikọ Paul. Dedevwo Paul ọ damoma rọ nọ hẹrokele i Jesu, o rheri taghene ọkezẹko ẹhẹn yen ono ji seriotọre. (Se 1 Corinthians 9:​16, 17.) No tare: “Mia rha tobọ vwo omwemẹ na-a, mi ne ji ruie ghele, fọkime ọrana owian ra yẹre mẹ.” Nọyẹ, Paul o vwo omwemẹ rọ nọ wian owian aghwoghwo na udabọ ebẹnbẹn ro rhiẹromẹrẹn.

¹³ Omaran ọ ji havwọ, wu vwa lẹrhẹ iroro ijẹgba mwuo brorhiẹ-ẹn. Brorhiẹn wu ne ruẹ oborẹ ọgbare udabọ iroro wu vwori ephian. Wa rha damoma ruẹ oborẹ ọgbare ọke ephian, ọkezẹko, ọnọ lẹrhẹ iroro ọnọ serhọ. Kerhirhiẹ kerhirhiẹ, wu rhe fiomarhọ ogame i Jehova vuọnvuọn, ọnọ ha userhumu wẹn rhe leli Jesu wu rhe bromarhame hin ne. Habaye, ọnana ono ji rhiẹ emru urhebro rẹn imizu ukoko na erọrọ.—1 Thess. 5:11.

“RHA DAMU OMA NẸ . . . RHE DJE OBORẸ WU HAVWỌ PHIA”

14. Me wu ne rhe nẹ sua ọke ephian, mesoriẹ? (2 Corinthians 13:5)

¹⁴ Emru ọrọrọ rọ nọ ha userhumu wẹn wu rhe bromarhame hin, yẹ ọrẹ wu ne ni oma so kẹdẹkẹdẹ. (Se 2 Corinthians 13:5.) Nẹ ọke ya ruọke, rhe ni akpenyerẹn ọrhẹ uruemru ọnọ sua, sẹ wa nẹrhomo kẹdẹkẹdẹ, we se ji yono i Baibol na, yanghene riẹ uyono ukoko ji vwobọrhọ owian aghwoghwo na. Guọlọ izede wu ne ruẹ ogame ọnọ merhoma rhọ. Jerẹ udje, nọ oma: ‘Mi na sabu dje iyono i Baibol elolọhọ na fiotọre rẹn awọrọ? Me mi na sabu ru nẹ owian aghwoghwo na ọ merhoma rhọ? Mia hunute edamẹ kirighwo uvuẹn ẹrhomo mẹ, aye djephia taghene mi hẹroso i Jehova? Mie riẹ uyono ukoko ọke ephian? Me mi na sabu ru ne mi rhe vwobọrhọ uyono ukoko ji riamerhiẹn?’

15-16. Me yẹ udje omizu ọhworhare owu o yoniruon kpahen oborẹ ene ru fiẹ ọdamuni kparobọ?

¹⁵ O ji fo ne wu djokarhọ ekete wa vwiẹlẹ. Udje omizu ọhworhare owu re se Robert o dje ọnana phia, nọ tare: “Ọke mia ha emrẹ ẹgbukpe 20, mi vwo owian ibiọke owu mia wian. Ẹdẹ owu ọke mia wian hin, ọgbọtọ owu ekete iruo mẹ, nọ ha use mẹ ni mi rhiẹ oghwa ye. Nọ ta mẹ taghene ọwọrọ o rhirhiẹ oghwa na ọke ọrana-a, ame ina ji ‘riamerhen ọke na.’ Ọke ukaro, ni mia djikilo, ọrẹn obẹtaye, ni mi fiudugbere tiẹn use na ji ta riẹn oborẹ ọsoriẹ.” Ọ merhoma taghene Robert o fiẹ ọdamuni na kparobọ. Ọrẹn, ọke rọ rharhumu roro kpahen erhirhiẹ na, nọ mẹrẹnvwrurhe taghene o ru sikẹnsikẹn phan. Nọ tare: “Mia tiẹn use na phẹrẹ te jerẹ oborẹ i Joseph o ruẹ ane i Potipha-ar. (Gen. 39:​7-9) O gberi mẹ unu taghene ọ tobọ bẹn ri mia tiẹn use na. Ọnana ọ ha userhumu mẹ mẹrẹnvwrurhe taghene, o fori mi bọn onyerẹnkugbe mẹ rhẹ i Jehova gbanhonrhọ.”

¹⁶ Wu na ji mẹrẹn erere, wu rhe ni oma so jerẹ Robert. Wu rha tobọ fiẹ ọdamuni kparobọ, nọ oma, ‘Marhẹ o jiri te mi ki fie kparobọ?’ Orhianẹ wu djokarhọ ekete wa vwiẹlẹ, wu vwe brorhiẹn kpe oma-a. Ghọghọ taghene wu rhe kpahen ovwiẹlẹme na ne. Nẹrhomo kpahiẹn, ji rhe ruẹ ekwakwa ri na lẹrhuọ vwo omwemẹ rhọ wu na mọrọn irhi Jehova.—Ps. 139:​23, 24.

17. Marhẹ Robert o ru rhua ujiri vwe odẹ i Jehova fọkiẹ atamwu ọnẹyen?

¹⁷ Ikuegbe i Robert o ji hi-in. Nọ tare: “Ọke mia tiẹn use na, ọgbọtọ na nọ ta mẹ, ‘Wu vrẹn ọdamuni na!’ Ni mi nọriẹn oborẹ o mevirhọ. Nọ ta mẹ taghene o vwo idama owu ro rhiẹ Oseri Jehova bi ro rhiẹ ugbehian yen, rọ tare taghene iphuphẹn Iseri Jehova ephian a bẹbẹ ruẹ oborẹ ọsọre aye i rhe vwo uphẹn na. Nọ ta rẹn ugbehian yen taghene ọnọ dami mẹ ni, no rhe sẹ urhomẹmro. Oma nọ merhenren mẹ omamọ taghene mi ha ujiri vwe odẹ i Jehova.”

18. Me wu brorhiẹn yen taghene wu ne ruo wu rhe bromarhame ne? (Se ekpeti na “Ifi Irhomu-ẹmro re wu na Riamerhiẹn.”)

¹⁸ Wu rha homakpahontọre rẹn i Jehova ji bromarhame, we djephia taghene wu guọlọ ruẹ odẹ ye fon uvuẹn erhirhiẹ ephian. Jenẹ o mwuo ẹro taghene Jehova ọ mẹrẹn ebẹnbẹn ọrhẹ edamuni we fiẹkparobọ. Ọnọ ha ebrurhọ wẹn vuọnvuọn. Vwo imwẹro taghene ọnọ yọ omẹgbanhon nyoma ẹhẹn ọfuanfon na. (Luke 11:​11-13) Nyoma userhumu i Jehova, wu na sabu rhe leli Jesu wu rhe bromarhame ne.