Wu Mwuegbe wu na Homakpahontọre Rẹn i Jehova ne?

1-2. Me yẹ ohworho ono vi ru no ki bromarhame?

UVWRE ẹgbukpe isionrin ri vrẹnren, ihworho ri vrẹn oduduru owu yi bromarhame rhiẹ Iseri Jehova. Jerẹ i Timothy ọke ahwanren, buebun ihworho enana i yono urhomẹmro na “nẹ ọke ọmọboban rhe.” (2 Tim. 3:​14, 15) Ezẹko i te imirẹghwa yanghene ho dede aye i ki yono kpahen i Jehova. Ẹgbukpe ezẹko ri vrẹnren, ọmase owu ro lele Iseri Jehova yono i Baibol na kugbe, o bromarhame ọke rọ ha ẹgbukpe 97!

² Orhianẹ eri vwiẹruọ Iseri Jehova, yanghene we lele Iseri Jehova yono i Baibol na kugbe, wa djiroro wu ne bromarhame? Ọrana omamọ ẹkẹ wu bruru! Ọrẹn, ne wu ki bromarhame, wu ne vi homakpahontọre rẹn i Jehova. Urhomu-ẹmro ọnana, ono dje kpahen oborẹ omẹhakpahontọre o mevirhọ. Ono ji dje kpahen oborẹ ọsoriẹ o fo ne wu homakpahontọre ji bromarhame, wu rhe mwuegbe ne.

ME YẸ OMẸHAKPAHONTỌRE?

3. Dje udje ihworho ezẹko uvuẹn i Baibol na ri homakpahontọre rẹn i Jehova.

³ Uvuẹn i Baibol na, omẹhakpahontọre o mevirhọ ọrẹ a djẹ ohworho ha, nọ wian owian oghẹnrensan. A ha agbamwa Israel kpahontọre rẹn i Jehova. Ọrẹn, a djẹ ihworho ezẹko ha usuẹn aye nẹ aye i homakpahontọre rẹn i Jehova vuọnvuọn. Jerẹ udje, onẹrhon rẹ Aaron o kuẹ rhọ o vwo oro ro lo obaruiẹ, ro dje “oka ọfuanfon ọrẹ omẹhakpahontọre” ọnẹyen phia. Oro na o mevirhọ taghene a djẹriẹ ha nọ wian owian oghẹnrensan—nọyẹ ọrẹ ono rhiẹ orherẹn ọduado rẹn Israel. (Lev. 8:9) O ji vwo awọrọ ra djẹha ni wian owian oghẹnrensan rẹn i Jehova, e se aye i Nazirite. A ha ẹmro na “Nazirite” nẹ ẹmro i Hebrew re se nazirʹ, ro mevirhọ “Ohworho rọ Havwọ San,” yanghene “Ọra ha kpahontọre.” O vwo irhi ri Jehova o tiobọnu nyoma i Moses, ro suẹn akpenyerẹn ihworho enana.—Num. 6:​2-8.

4. (a) Wu rha homakpahontọre rẹn i Jehova ne, me ye fiẹrorhọ mio? (b) Me yo mevirhọ ne wu “tiẹn” oma? (Ni ifoto na.)

⁴ Wu rha homakpahontọre rẹn i Jehova, nọyẹ wu djẹ odjẹ wu na ha ọhọriẹ karo uvuẹn akpenyerẹn ọnọ ji rhiẹ odibo i Kristi ne. Me yẹ ọnana o surhobọmwu? Jesu nọ tare: “Orhianẹ ohworho ọ guọlọ leli mẹ, ọravwọ ọgbọ tiẹn omayen.” (Matt. 16:24) Ẹmro i Greek na “ọravwọ ọgbọ tiẹn omayen,” ọnọ ji sabu mevirhọ taghene “ọravwọ ono nyerẹn aruẹ akpọ rẹ Osolobrugwẹ ọ guọlọ mie yi.” Wu rha homakpahontọre rẹn i Jehova ne, wu na vi tiẹn kemru kemru rọ kparehaso ọhọriẹ. (2 Cor. 5:​14, 15) Ọrana o mevirhọ taghene ana tiẹn “irueruo ugboma na,” jerẹ ọfanrhiẹn. (Gal. 5:​19-21; 1 Cor. 6:18) Aruẹ irhi enana ina lẹrhẹ akpọ gbanhon wẹn? Ẹjo, jokpanẹ we vwo ẹguọlọ kpahen i Jehova, ji vwo imwẹro taghene irhi enẹyen ina ha userhumu wẹ-ẹn. (Ps. 119:97; Isa. 48:​17, 18) Omizu ọhworhare owu re se Nicholas nọ tare, “Wu na sabu ni irhi Jehova jerẹ ogba ekanron rọ vwọ lẹrhuọ vwo ugbomọphẹ, yanghene ogba rọ sẹroruọ nẹ abọ ikporokpo.”

5. (a) Marhẹ wu ne ru homakpahontọre rẹn i Jehova? (b) Me yẹ ovẹnẹ rọ ha uvwre omẹhakpahontọre ọrhẹ omebrurhame? (Ni ifoto na.)

⁵ Marhẹ wu ne ru homakpahontọre rẹn i Jehova? Wu ne vive riẹn nyoma ẹrhomo taghene ọye ọvo ye wu na ga, ji ha ọhọriẹ karo uvuẹn akpenyerẹn ọnọ. Ive ọnana o mevirhọ taghene wu ne rhe vwo ẹguọlọ kpahen i Jehova “rhẹ ọsoso ọmuduo ọrhẹ ọsoso arhọ ọnọ ọrhẹ ọsoso ẹhọn kugbe ọsoso omẹgbanhuọn.” (Mark 12:30) Omẹhakpahontọre oborẹ we ruẹ ọrẹ odjahen, uvwre owẹwẹ rhẹ i Jehova ọvo. Ọrẹ ovẹnẹ, e bru ohworho rhẹ ame ọrẹ afiede; rọ lẹrhẹ awọrọ rhe taghene ọ homakpahontọre ne. Omẹhakpahontọre ọnọ ive rọ ghanranren omamọ, gba damoma nyerẹn mwuie fọkime ọrana oborẹ i Jehova ọ guọlọ mio.—Eccl. 5:​4, 5.

MESORIẸ WU NA HOMAKPAHONTỌRE RẸN I JEHOVA?

6. Me yo mwu ohworho homakpahontọre rẹn i Jehova?

⁶ Ẹguọlọ wu vwo kpahen i Jehova yo no mwuo homakpahontọre riẹn. Orhiẹ iroro ọnọ ọvo-o. Habaye, a bọn riẹn kpahen “irherhe rọ gbare” ọrhẹ “erhefiotọre izede Osolobrugwẹ”—nọyẹ oborẹ wu yono kpahen i Jehova, rọ lẹrhẹ ẹguọlọ wu vwo kpahiẹn kodorhọ. (Col. 1:9) Uyono i Baibol ọnọ, ọ lẹrheruọ vwo imwẹro ne taghene (1) Jehova o nyerẹn, (2) ẹhẹn ọfuanfon Osolobrugwẹ ya ha ya i Baibol na, ọrhẹ (3) ọ ha ọhọriẹ te orugba nyoma ukoko yi.

7. Me ye ne vi ru vwẹre na ki homakpahontọre rẹn Osolobrugwẹ?

⁷ Eri homakpahontọre rẹn i Jehova ine vi vwo irherhe i Baibol na, ji rha nyalele irhi Jehova. Aye a ha uphẹn ephian ghwoghwo iyẹnrẹn esiri na rẹn awọrọ. (Matt. 28:​19, 20) Ẹguọlọ aye i vwo kpahen i Jehova o kodo rhọ ne, omaran ji te omwemẹ rẹ aye ina ha ẹga ro fiotọre riẹn. Rhẹ omaran ọ ji havwọ wẹn? Wu rhe vwo aruẹ ẹguọlọ ọnana, omẹhakpahontọre ọrhẹ omebrurhame ọnọ, no no nẹ ẹhọn rhe, ukperẹ ono rhiẹ fọkiẹ eri vwiẹruọ, ọrọ ha i Baibol yonuo, yanghene igbehian enọ.

8. Marhẹ uruemru ọdaremẹro ono ru ha userhumu wẹn brorhiẹn wu na homakpahontọre rẹn i Jehova? (Psalm 116:​12-14)

⁸ Wu rhe roro kpahen oborẹ i Jehova o ru wẹn ne, ọnana ono mwuo homakpahontọre riẹn. (Se Psalm 116:​12-14.) Baibol na o se i Jehova Ọro Tiobọnẹ “ẹghẹlẹ irhorhomu ọrhẹ obọdẹn ẹghẹlẹ ephian.” (Jas. 1:17) Ẹghẹlẹ rọ maido ro tiobọnu ne, yẹ Ọmọyen ro rhiẹ Jesu ro hwu harẹn ọwan. Ọnana ghini obọdẹn ẹghẹlẹ! Izobo otan na ọ yẹruọ uphẹn wu ne vwo obọdẹn onyerẹnkugbe rhẹ i Jehova. Ọ ji yọ uphẹn wu ne nyerẹn bẹmẹdẹ obaro na. (1 John 4:​9, 10, 19) Omẹhakpahontọre ọnọ rẹn i Jehova, izede ọghoghanren owu wu ne dje ọdaremẹro phia fọkiẹ ẹguọlọ ri Jehova o dje wẹn, ọrhẹ ebrurhọ erọrọ rọ yẹruọ ne. (Deut. 16:17; 2 Cor. 5:15) A ta kpahen ọdaremẹro ọnana uvuẹn ọbe na Riamerhen Akpenyerẹn Bẹmẹdẹ! uyono 46 udjoghwẹ 4, ro ji vwo ividio iminiti esa ro vwo urhomu-ẹmro na Ha Ẹghẹlẹ wu Vwori Kpahontọre Rẹn Osolobrugwẹ.

WU MWUEGBE WU NA HOMAKPAHONTỌRE JI BROMARHAME NE?

9. Mesoriẹ o vwo serhọ na gba ohworho homakpahontọre?

⁹ Wu na sabu rhe roro taghene we ji mwuegbe wu na homakpahontọre ji bromarhame-e. Ọkezẹko o ji vwo ewene ezẹko ro fori wu ru uvuẹn akpenyerẹn ọnọ, ne wu sabu nyamwu irhi Jehova, yanghene wu guọlọ ọke wu ne ruẹ esegburhomẹmro ọnọ gbanhonrhọ. (Col. 2:​6, 7) Orhiẹ ihworho ephian ra ha i Baibol yono ye ruẹ riaro ukwọgbọ-ọ, habaye iphuphẹn ephian i sabu mwuovwan rẹ aye ina homakpahontọre ji bromarhame ọke owu-u. Damoma ni oma so neneyo wu rhe oborẹ wu ruriaro te ne uvuẹn ogame i Jehova, ukperẹ wu na ha oma vwanvwọn awọrọ.—Gal. 6:​4, 5.

10. Me wu na sabu ru wu rha mẹrẹnvwrurhe taghene we ji mwuegbe wu na homakpahontọre ji bromarhame-e? (Se ekpeti na “Ihworho ra Mọren Ghwanren Uvuẹn Urhomẹmro na.”)

¹⁰ Wu rha tobọ mẹrẹnvwrurhe taghene we ji mwuegbe wu na homakpahontọre rẹn i Jehova-a, gbe bru ẹkẹ ọrana te oma. Nẹrhomo vwe i Jehova nọ ha userhumu wẹn ruẹ ewene ri serhọ uvuẹn akpenyerẹn ọnọ. (Phil. 2:13; 3:16) Jenẹ o mwuo ẹro taghene ọnọ kpahenrhọ ẹrhomo ọnọ, ji ha userhumu wẹn.—1 John 5:14.

OBORẸ Ọ LẸRHẸ IHWORHO EZẸKO TIẸRIERHUMU

11. Marhẹ i Jehova ono ru ha userhumu rẹn ọwan sẹrorẹ esegburhomẹmro ọwan?

¹¹ Ihworho ezẹko ri mwuegbe rẹ aye ina homakpahontọre ji bromarhame ne, e ji tiẹrierhumu. Aye ina sabu roro, ‘Erhe le mẹ nẹ ukoko fọkime mi ruẹ ọdandan ọghwaghwa vwo?’ Wu rhe vwo aruẹ ofẹn ọrana, vwo imwẹro taghene Jehova ọnọ yọ oborẹ wu guọlọre ne wu ‘sabu mwuovwan obaruiẹ, ji lẹrhẹ oma merhiẹn vuọnvuọn.’ (Col. 1:10) Ọnọ ji yọ omẹgbanhon wu ne ruẹ oborẹ ọgbare. O ru omaran rẹn ihworho buebun ne. (1 Cor. 10:13) Fọkiẹ ọnana, ihworho buebun i vwe rhe ruẹ oborẹ ana fọkiẹ le aye nẹ ukoko-o. Jehova ọ ha userhumu rẹn ihworho yi sẹrorẹ esegburhomẹmro aye.

12. Me ya na sabu ru ne je rhe ruẹ ọdandan ọghwaghwa?

¹² Fọkiẹ ijẹgba, ọwan ephian a dẹrughwaroghwẹ ọdamuni re ne ruẹ oborẹ ọsọre. (Jas. 1:14) Ọrẹn, wẹwẹ yi ne brorhiẹn sẹ wu ne se rhẹ ọdamuni na yanghene fie kparobọ. Itiọrurhomẹmro, wẹwẹ ọvo yi na sabu suẹn oborẹ wu ne nyerẹn akpọ lele. Ihworho ezẹko ina sabu frẹfro taghene a sabu suẹn ojemẹ ọwa-an, ọrẹn ọrana ofian. Ojemẹ esọsọ i rha tobọ homaphia, wu na sabu fi aye kparobọ. Omarana, rha nẹrhomo kẹdẹkẹdẹ. Rhe se i Baibol na kẹdẹkẹdẹ. Rhe riẹ uyono ukoko Ilele Kristi. Rhe vwobọrhọ owian aghwoghwo na. We rhe ruẹ ekwakwa enana ọke ephian, wu ne vwo omẹgbanhon wu ne nyerẹnmwu ive omẹhakpahontọre ọnọ. Karorhọ taghene Jehova ọnọ ha userhumu wẹn.—Gal. 5:16.

13. Obọdẹn udje ọgo yi Joseph o dje rẹn ọwan?

¹³ Wu rhe mwuegbe rhotọre hẹrhẹ edamuni, nọ nọ phẹrẹ wu ne nyerẹnmwu ive omẹhakpahontọre ọnọ. Baibol na ọ hunute ihworho ezẹko ri ruẹ ọnana, dedevwo aye ihworho ri vwa gba. Jerẹ udje, Ane i Potiphar ọ damoma ọgbọ buebun ro no leli Joseph ghwọwe. Ọrẹn, Joseph o brorhiẹn rhotọre kpahen oborẹ ono ruo ne. Baibol na ọ ta rẹn ọwan taghene “nọ tenren,” ji ta: “Marhẹ mi ne ru ruẹ ọdandan ọghwaghwa ọnana haso Osolobrugwẹ?” (Gen. 39:​8-10) O fiotọre taghene Joseph o brorhiẹn oborẹ ono ruo ne, bọmọke a ki damiẹ ni. Fọkiẹ ọrana, nọ phẹrẹre ro fiẹ ọdamuni na kparobọ.

14. Me ye ne ruo na sabu rhe fiẹ edamuni kparobọ?

¹⁴ Marhẹ wu ne ru vwo aruẹ omwemẹ ri Joseph o vwori na? Wu na sabu brorhiẹn vwana kpahen oborẹ wu ne ruo wu rha dẹrughwaroghwu ọdamuni. Brokpakpa tiẹn ekwakwa ri Jehova o vwo utuoma kpahen, wu vwe roro kpahen aye dede-e. (Ps. 97:10; 119:165) Wu rhe ruẹ ọnana, ne wu na sabu fiẹ edamuni kparobọ. Fọkime, wu rhe oborẹ wu ne ruo ne. Wu ji mwuegbe rhotọre ne.

15. Marhẹ ohworho ono ru djephia taghene ọ ‘guọlọ i Jehova nẹ otọre ẹhẹn sa’? (Hebrews 11:6)

¹⁵ Ọkezẹko, o mwuruon ẹro taghene wu rhe urhomẹmro na ne, wu ji guọlọ ga i Jehova rhẹ ọsoso ọmuduo, ọrẹn emru ọ ji lẹrhuọ tiẹrierhumu wu na homakpahontọre ji bromarhame. Wu na sabu roro kpahen udje Orodje David. Ji rẹ i Jehova: “Dabu ni mẹ fiotọre, O Osolobrugwẹ, neneyo wu sabu rhe oborẹ ọ ha uvuẹn ọmudu mẹ. Ni mẹ so, neneyo wu sabu rhe oborẹ o rhiẹ ọfiamu mẹ. Nie sẹ o vwo iroro ọkon owuorowu uvuẹn ẹhẹn mẹ, jeghwai sun mẹ lele izede arhọ i bẹmẹdẹ.” (Ps. 139:​23, 24) Jehova ọ ha ebrurhọ rẹn ihworho ra “guọliẹ nẹ otọre ẹhẹn sa.” Omẹdamu we djephia ne wu sabu homakpahontọre rẹn i Jehova ji bromarhame, o djephia taghene wa ghini guọliẹ.—Se Hebrews 11:6.

RHE TIẸKẸRẸ I JEHOVA

16-17. Marhẹ i Jehova o ru tiẹ era mọren ghwanren uvuẹn urhomẹmro na kẹrẹ oma? (John 6:44)

¹⁶ Jesu ọ tare taghene Jehova yo tiẹ idibo yi kẹrẹ oma. (Se John 6:44.) Roro kpahen oborẹ ọnana ọ merhoma te ọrhẹ oborẹ o mevirhọ wẹn. Jehova orho tiẹ ohworho kẹrẹ oma, nọyẹ ọ mẹrẹn emru orhorhomu uvuẹn oma ọravwọ. Ha riẹn, ọravwọ “emru rọ havwọ san,” yanghene “efe ọghoghanren.” (Deut. 7:6; ekete ra djokarhọ) Ukẹro ọrana yọ ji ha nuo.

¹⁷ Ọkezẹko wẹwẹ uphuphẹn, eri vwiẹruọ jẹ Iseri Jehova. Wu na sabu rhe roro taghene wa ga i Jehova, nẹ oma ọ merhen eri vwiẹruọ. Ọrẹn, Baibol na ọ tare: “Are i tikẹrẹ Osolobrugwẹ, ọye no no tikẹrẹ are.” (Jas. 4:8; 1 Chron. 28:9) Wu rha kpare udjoghwẹ wu ne tikẹrẹ i Jehova, ọye no no ji tikẹruọ. Jehova ọ mẹrẹn omẹdamu ọnọ, o ji rhe taghene wu ha usuẹn ukoko yi. O tiẹ owuowọnwan kẹrẹ omayen—tobọ te ihworho ra mọren ghwanren uvuẹn urhomẹmro na. Aruẹ ohworho ọnana ọrhọ kpare udjoghwẹ ro no tikẹrẹ i Jehova, Jehova ono ji tikẹriẹ jerẹ oborẹ a djokarhọ uvuẹn James 4:8.—Haye vwanvwọn 2 Thessalonians 2:13.

18. Me ye ne yono kpahen uvuẹn urhomẹmro rọ ha kpahen ọnana? (Psalm 40:8)

¹⁸ Wu rha homakpahontọre rẹn i Jehova ji bromarhame, nọyẹ wa hẹrokele i Jesu ne. Jesu ọ homakpahontọre, ji ruẹ kemru kemru rẹ Ọsẹ ye ọ guọlọre. (Se Psalm 40:8; Heb. 10:7) Uvuẹn urhomu-ẹmro rọ ha kpahen ọnana, ene yono kpahen oborẹ ọnọ ha userhumu wẹn rha fuevwan ga i Jehova wu rhe bromarhame hin.