UYONO 46
Mesoriẹ o Fo Ne Wu Homakpahontọre Jeghwai Bromarhame?
Wa homakpahontọre rẹn i Jehova nyoma we ve ha riẹn uvuẹn ẹrhomo taghene ọye ọvo wu na ga, ọhọre ọnẹyen yọ nọ ji karo uvuẹn akpenyerẹn ọnọ. (Psalm 40:8) Orho ru, nu we bromarhame. Nyoma ọnana, nu we djephia rẹn awọrọ taghene wu homakpahontọre ne. Orhienbro ra na homakpahontọre rẹn i Jehova, yẹ orhienbro rọ mai ghanren kparobọ rẹ ọwan ina sabu bru. Me yọ nọ sabu mwu ọwan brorhiẹn ọghwaghwa ọnana?
1. Me yo mwu ohworho homakpahontọre?
Ẹguọlọ yo mwu ọwan homakpahontọre rẹn i Jehova. (1 John 4:10, 19) Baibol na o jiririe rẹn ọwan: “Vwo ẹguọlọ kpahen i Jehova Osolobrugwẹ ọnọ rhẹ ọsoso ọmudu ọnọ, rhẹ ọsoso ugboma ọnọ, kugbe ọsoso ẹhẹn ọnọ, ọrhẹ ọsoso omẹgbanhon ọnọ.” (Mark 12:30) Ọwan e djephia taghene e vwo ẹguọlọ kpahen Osolobrugwẹ, nyoma ẹmro ra ta, ọrhẹ oborẹ e ruẹ. Jerẹ oborẹ ọhworhare ọrhẹ ọmase ri vwo ẹguọlọ kpahen omoma aye a rọnmọ, omaran ẹguọlọ re vwo kpahen i Jehova o mwu ọwan homakpahontọre riẹn jeghwai bromarhame.
2. Ebrurhọ ego yi Jehova ọ yẹ Iseri enẹyen ri bromarhame ne?
Wu rhe bromarhame ne, nu we rhiẹ usuẹn ekrun i Jehova ro vwo omamerhomẹ. Wu na riamerhen ẹguọlọ ọnẹyen uvuẹn izede sansan, jeghwai dabu tikẹriẹ rhọ. (Se Malachi 3:16-18.) Haba ọrẹ i Jehova ono rhiẹ Ọsẹ ọnọ, wu ne ji vwo obọdẹn okugbe imizu ọrẹ akpọ ephian, ri vwo ẹguọlọ kpahiẹn ọrhẹ owẹwẹ. (Se Mark 10:29, 30.) Itiọrurhomẹmro, wu na kpare idjaghwẹ kirighwo ezẹko vwẹre, ne wu ki bromarhame. Wu ne yono kpahen i Jehova, vwo ẹguọlọ kpahiẹn, jeghwai vwo esegburhomẹmro kpahen Ọmọyen. Ọrọkẹta, wu na vi homakpahontọre rẹn i Jehova. Wu rha kpare idjaghwẹ erana, jeghwai bromarhame, nọyẹ, wu ha uvuẹn izede rọ nọ lẹrhuọ vwo arhọ i bẹmẹdẹ. Baibol na ọrhọ ta: “Omebrurhame . . . yọ jeghwai simi are vwana.”—1 Peter 3:21.
YONO KODO RHỌ
Yono kpahen oborẹ ọsoriẹ ọ ghanren ne wu homakpahontọre rẹn i Jehova, jeghwai bromarhame.
3. Ọwan ephian ina vi djẹ ohworho ra na ga
Uvuẹn Israel ọke ahwanren, ihworho ezẹko e roro taghene aye ina sabu ga i Jehova ọrhẹ osolobrugwẹ efian re si Baal. Ọrẹn, Jehova no dje ọmẹraro ọnẹyen Elijah bru aye, nọ kpọ iroro ọsọsọ ọrana vi. Se 1 Kings 18:21, orho ru, are i gba kpahenrhọ onọ ọnana:
Orhienbro ọgo yẹ emọ Israel i dẹrughwaroghwu?
Jerẹ emọ Israel, ọwan ina vi djẹ ohworho ra na ga. Se Luke 16:13, orho ru, are i gba kpahenrhọ enọ enana:
Mesoriẹ ọwan ina ja sabu ga i Jehova ọrhẹ ohworho, yanghene emru ọrọrọ?
Marhẹ ene ru djephia rẹn i Jehova taghene ọye ọvo ya na ga?
4. Roro kpahen ẹguọlọ ri Jehova ovwo kpahuọn
Jehova ọ yẹrẹ ọwan ẹghẹlẹ eghoghanren buebun ne. Me ya na sabu yẹ ye? Kporo IVIDIO na.
Izede ego yi Jehova o ru dje ẹguọlọ phia wẹn ne? Se Psalm 104:14, 15 ọrhẹ 1 John 4:9, 10, orho ru, are i gba kpahenrhọ enọ enana:
Ẹghẹlẹ ego usuẹn eri Jehova ọ yẹrẹ ọwan, ye wu mai vwo ọdaremẹro kpahen?
Marhẹ oma o ruo kpahen i Jehova fọkiẹ ẹghẹlẹ erana?
Arha yẹ ọwan ẹghẹlẹ ro ghini je ọwan, a damoma dje ọdaremẹro kpahen ohworho ro tiobọnie rẹn ọwan. Se Deuteronomy 16:17, orho ru, are i gba kpahenrhọ onọ ọnana:
Ọke we roro kpahen oborẹ i Jehova o ru ha wẹn ne, me yẹ ọnana ono mwuo tiobọnu ha riẹn?
5. Omẹhakpahontọre ọ rhua ebrurhọ buebun sa
Ihworho buebun i vwo imwẹro na taghene aye i rhe titi, vwo omamọ iruo, yanghene igho, oma nọ nọ sabu merhen aye. Ọrana urhomẹmro? Kporo IVIDIO na, orho ru, are i gba kpahenrhọ enọ enana.
Dedevwo idama uvuẹn ividio na o vwo ẹguọlọ kpahen ibọru ẹfa omamọ, mesoriẹ ọ nyajevwo?
O brorhiẹn rọ nọ homakpahontọre rẹn i Jehova, ukperẹ ono rhiẹ ibọru ẹfa. Wu rorori taghene o brorhiẹn ro serhọ? Mesoriẹ wa ta omaran?
Bọmọke ọnyikọ i Paul o ki rhiẹ Olele Kristi, ọ ji hatua owian ro titiri. O yono kpahen urhi itu i Jew mie oyono ro titiri. Ọrẹn, nọ nyajẹ ekwakwa erana vwo nọ sabu rhiẹ Olele Kristi. Paul ọ vioja? Se Philippians 3:8, orho ru, are i gba kpahenrhọ enọ enana:
Mesoriẹ i Paul ọ ta taghene oborẹ o ruru bọmọke o ki rhiẹ Olele Kristi, i họhọ “ikweku buebun”?
Erere ego yọ mẹrẹnren?
Me wu na sabu ha vwanvwọn akpọ ọnọ wu na ha ga i Jehova?
Ọke i Paul o rhiẹ Olele Kristi, ọ mẹrẹn ebrurhọ buebun ghwẹ ekwakwa rẹ ọye o tiobọnu
OBORẸ IHWORHO EZẸKO A TA: “O dje ọhọ phia wu na ha akpọ ọnọ kpahontọre rẹn Osolobrugwẹ-ẹ.”
Mesoriẹ we roro taghene o dje ọhọ phia wu na homakpahontọre rẹn i Jehova?
ME WU YONORIN?
Ẹguọlọ o mwu ọwan homakpahontọre rẹn i Jehova, jeghwai bromarhame.
Ẹzẹkoko
Mesoriẹ i Jehova o mwuovwan ẹguọlọ ọrhẹ ẹga ro nẹ ẹhẹn rhe ọrẹ ọwan?
Marhẹ i Jehova o ru kwosa rẹn Iseri enẹyen ri bromarhame?
Wu guọlọ homakpahontọre rẹn i Jehova?
GUỌLỌ IYẸNRẸN ERỌRỌ
Se kpahen oborẹ ọ lẹrhẹ ọmase owu rọ so ijoro bi, ọrhẹ idama owu rọ fa ibọru bi, djẹ odjẹ aye ina homakpahontọre rẹn i Jehova.
Enọ Iphuphẹn a nọ—Me mi na ha Akpenyerẹn mẹ ru?—Ra Karorhọ Oborẹ ọ Phia Vrẹn ne (6:54)
Yono kpahen iroro erọrọ ri na lẹrhuọ homakpahontọre.
“Mesoriẹ o fo ne wu Homakpahontọre Rẹn i Jehova?” (Oghwa Odẹrẹ, January 15, 2010)
Uvuẹn ikpekporo-ividio ọnana, djokarhọ aghọghọ ihworho ri homakpahontọre rẹn i Jehova a riamerhiẹn.
Uvuẹn ikuegbe na, “Ẹgbukpe Buebun yi Mie Roro, ‘Mesoriẹ a Ma Ọwan?’” djokarhọ oborẹ o mwu ọmase owu roro kpahen oborẹ ọ mai ghanren ha riẹn.
“Baibol Na O Wene Akpenyerẹn” (Oghwa Odẹrẹ, November 1, 2012)