Oborẹ Odẹ i Jehova ọ Ghanren te Rẹn i Jesu

1-2. (a) Bọmọke e ki kpe i Jesu hwu me yo ruru uvuẹn ason ọrana? (b) Enọ ego ya na kpahenrhọ uvuẹn urhomu-ẹmro ọnana?

ẸDẸ na i Tọsde Nisan 14, 33 C.E., owuọwọn ọrana ya na rhẹ i Jesu, haye guẹnzọn, brorhiẹn kpe yi, ha oja riẹ, ji kpe yi hwu. Ọye ọrhẹ inyikọ ye i ghwai riẹ emaren oghẹnrensan hin, uvuẹn obuvun rọ ha oberun oghwa owu. Ọke aye a riẹ emaren ọrana hin, Jesu nọ tẹmro urhebro rẹn inyikọ ye bọmọke o ki hwu. Habaye, bọmọke aye i ki nẹ obuvun na, Jesu nọ ha ibiọke nẹrhomo nẹ ẹhẹn rhe. Ọnyikọ John ọ nẹ iyẹnrẹn ẹrhomo ọrana; ọ ha uvuẹn John urhomu-ẹmriẹn 17.

² Me yẹ ẹrhomo i Jesu o djephia kpahen oborẹ o kpokpie ẹhẹn ọke ọrana? Marhẹ ẹrhomo ọrana o ru dje oborẹ ọ mai ghanren rẹn i Jesu uvwrọke rọ ha otọrakpọ na? Ana mẹrẹn ẹkpahenrhọ rẹn enọ erana uvuẹn urhomu-ẹmro ọnana.

“MI DJE ODẸ ỌNỌ RẸN AYE NE”

3. Me yi Jesu ọ ta kpahen odẹ i Jehova, me yo mevirhọ? (John 17:​6, 26)

³ Uvuẹn ẹrhomo ri Jesu ọ nẹren, nọ tare: “Mi dje odọ phia” rẹn aye ne. Itiọrurhomẹmro, ọgbeva yọ tare taghene o dje odẹ i Jehova phia rẹn idibo yi ne. (Se John 17:​6, 26.) Me yo mevirhọ? Nọ haye ta taghene idibo yi e rhe odẹ i Jehova-a? Idibo i Jesu itu i Jew, omarana, aye i rheri taghene odẹ Osolobrugwẹ i Jehova. Odẹ ọrana ọ homaphia ọgbọ buebun uvuẹn Obọrẹ a ha edjadjẹ Hebrew ya uvuẹn i Baibol na. Omarana, Jesu ọ vwọ ta kpahen odẹ Osolobrugwẹ-ẹ; ukpomaran, ọ rionbọrhọ oborẹ odẹ na o mevirhọ. Jesu ọ ha userhumu rẹn idibo yi rhe i Jehova rhọ, omaran ji te ọhọriẹ, iruemruie ọrhẹ irueruo yi uvuẹn izede rẹ ohworho ọrọrọ ọnọ jọ sabu dje kpahen.

4-5. (a) Udje ọgo yọ nọ ha userhumu rẹn ọwan vwẹruọ oborẹ odẹ ohworho ọ ghanren te? (b) Marhẹ idibo i Jesu i ru dabu vwẹruọ oborẹ odẹ i Jehova o mevirhọ?

⁴ Jerẹ udje, gba haye taghene o vwo ọkpako ukoko owu re se David uvuẹn ukoko wu havwọ, ọyẹ jẹ idọkitọ rọ bẹrẹ oma ihworho. Ọkezẹko, o jiri ne wu rhe omizu ọnana. Ọrẹn ẹdẹ owu, emru nọ phia wẹn rọ lẹrheruọ gwọlọ userhumu idọkitọ ogege. Na kpareruọ riẹ ihọsipita rẹ omizu ọrana ọ wian, nọ ha ona idọkitọ ye simi arhọ ọnọ. Ukẹro wa ha ni omizu na bi wu na ji ha nie vwana? Ẹjo! Vwana, David ghwai rhẹ ọkpako ukoko wu rheri bi na-a; ọye yẹ idọkitọ ro simi arhọ.

⁵ Omaran ọ ji havwọ, idibo i Jesu i ghwanriẹn rhe odẹ i Jehova ne. Ọrẹn, aye ni dabu vwẹruọ oborẹ odẹ na o mevirhọ nyoma userhumu i Jesu. Mesoriẹ a ta omaran? Fọkime Jesu o dje uruemru Ọsẹ ye phia ọrẹ i kemru kemru. Omarana, inyikọ ye ni dabu “rhe” i Jehova rhọ nyoma aye a dabu kerhọ oborẹ i Jesu o yono lele, ji djokarhọ oborẹ o ruẹ awọrọ lele.—John 14:9; 17:3.

‘ODỌ ỌNỌ RE WU YẸRE MẸ’

6. Izede ọgo yi Jehova ọ yẹ i Jesu odẹ ye? (John 17:​11, 12)

⁶ Uvuẹn ẹrhomo i Jesu, nọ ta kpahen idibo yi: “Hẹrote aye fọkiẹ odọ wu yẹre mẹ.” (Se John 17:​11, 12.) Ọnana no mevirhọ taghene Jesu yi Jehova? Ẹjo. Djokarhọ taghene uvuẹn ẹrhomo ri Jesu ọ nẹren, ọ tare taghene ‘odẹ ọnọ.’ Omarana, orhiẹ i Jesu yi Jehova-a. Me yi Jesu o mevirhọ ọke rọ ta taghene Osolobrugwẹ ọ yẹriẹ odẹ ye ne? Ọrukaro, Jesu yẹ Ọtẹmro i Jehova ọrhẹ ọro meviẹ riẹn. Nyoma odẹ Ọsẹ ye, nọ sabu wian ewian igbevwunu sansan. (John 5:43; 10:25) Ọreva, odẹ na Jesu o mevirhọ “Jehova yẹ Usimirhọ.” Itiọrurhomẹmro, odẹ i Jesu o surhobọmwu odẹ i Jehova.

7. Dje udje ro djephia taghene kẹmro kẹmro ri Jesu ọ tare i nẹ obẹ i Jehova rhe.

⁷ Jerẹ udje, ohworho ro suẹn ọnọ sabu dje ohworho rọ wian riẹn urhomu no rhiẹ ọtẹmro riẹn. Uvuẹn erhirhiẹ ọnana, ana sabu ta taghene ọro suẹn na yo vwo kẹmro kẹmro rẹ ọtẹmro na ọ tare. Omaran ọ ji havwọ, ana sabu ta taghene kẹmro kẹmro ri Jesu ọ tare i nẹ obẹ i Jehova rhe, fọkime ọye yo djerie.—Matt. 21:9; Luke 13:35.

8. Marhẹ odẹ i Jehova o ru ‘gberẹ’ i Jesu bọmọke ọ ki rhiẹ otọrakpọ na? (Exodus 23:​20, 21)

⁸ Baibol na o se i Jesu Ẹmro na, fọkime Jehova ọ nyoma yen dje urhomu vwe emakashe ọrhẹ ituakpọ ri ha otọrakpọ na. (John 1:​1-3) Ọkezẹko, Jesu yẹ ọmakashe ri Jehova o dje ya hẹrote emọ Israel ọke aye a ha uvuẹn ato. Ọke i Jehova ọ ta rẹn emọ Israel nẹ aye i huvwele ọmakashe ọrana, nọ tare: “Fọkime odẹ mẹ o gberirie.”a (Se Exodus 23:​20, 21.) Odẹ i Jehova ‘o gberẹ’ i Jesu fọkime Jesu yẹ Ọtẹmro i Jehova, habaye, ọye yo tu ruẹ odẹ i Jehova fon ji dje Echu rhẹ ọmọrenfian.

“ỌSẸ, BRỌGHỌ RHẸ ODẸ ỌNỌ”

9. Marhẹ odẹ i Jehova ọ ghanren te rẹn i Jesu? Djeyi fiotọre.

⁹ Jerẹ oborẹ e yono ne, bọmọke i Jesu ọ ki rhiẹ otọrakpọ na dede, odẹ i Jehova yọ mai ghanren riẹn. Ọnana yọ soriẹ i Jesu ọ ha ọhọre i Jehova karo ọke rọ ha otọrakpọ na! Uvwre ehion owian aghwoghwo i Jesu, nọ tare: “Ọsẹ, brọghọ rhẹ odẹ ọnọ.” Ogege, Ọsẹ ye nọ kpahenrhọ nẹ odjuwu rhe rhẹ uvwele gorigori: “Mi brọghọ rhọye ne, mi na ji rharhumu brọghọ rhọye.”—John 12:28.

10-11. (a) Marhẹ i Jesu o ru brọghọ rhẹ odẹ i Jehova? (Ji ni ifoto na.) (b) Mesoriẹ o fo ne ruẹ odẹ i Jehova fon ji dje Echu rhẹ ọmọrenfian?

¹⁰ Jesu dede o ji brọghọ rhẹ odẹ Ọsẹ ye. Izede ọgo? Izede owu yẹ ọrẹ ọ ta rẹn awọrọ kpahen i Jehova ọrhẹ ekwakwa igbevwunu ro ruẹ. Ọrẹn, o ji brọghọ rhẹ odẹ i Jehova uvuẹn izede erọrọ. Jesu ọ gwọlọre nẹ ihworho i rhe taghene odẹ i Jehova ọ fonron, habaye, kemru kemru ro ruẹ ọgbare.b Jesu o dje oborẹ ọnana ọ ghanren te ọke ro yono idibo yi oborẹ a nẹrhomo. Nọ tare: “Ọsẹ ame obẹ idjuwu, jene ruẹ odọ fon.”—Matt. 6:9.

¹¹ Mesoriẹ o fo ne ruẹ odẹ i Jehova fon ji dje Echu rhẹ ọmọrenfian? Fọkime uvuẹn ogba Eden, Echu ọ rhaphiẹ odẹ i Jehova. Echu nọ haye ta taghene Jehova ọmọrenfian ro tiẹ emru orhorhomu nẹ rẹn Adam ọrhẹ Eve. (Gen. 3:​1-5) Echu nọ ji haye ta taghene Jehova o vwo ruẹ oborẹ ọgbare ọke ephia-an. Fọkiẹ efian Echu, ihworho buebun ne roro taghene Jehova orharhere ohworho. Ọke oru, uvuẹn ẹdẹ i Job, Echu nọ tare taghene ihworho a ga i Jehova fọkiẹ oborẹ aye ina sabu mẹrẹn mie yi. Echu nọ habaye taghene ihworho ina dobọ ogame i Jehova ji aye i rha dẹrughwaroghwu ebẹnbẹn. (Job 1:​9-11; 2:4) A gwọlọ ọke na sabu djephia sẹ Echu yẹ ọmọrenfian yanghene Jehova.

“MI HA ARHỌ MẸ KPAHONTỌRE”

12. Omwemẹ ọgo yi Jesu o vwori fọkiẹ ẹgwọlọ ro vwo kpahen odẹ i Jehova?

¹² Fọkiẹ ẹgwọlọ ri Jesu o vwo kpahen i Jehova, no ruẹ odẹ i Jehova fon ji dje Echu rhẹ ọmọrenfian. Jesu nọ tare, “Mi ha arhọ mẹ kpahontọre.” (John 10:​17, 18) Itiọrurhomẹmro, o vwo omwemẹ ro no hwu fọkiẹ odẹ i Jehova.c Adam ọrhẹ Eve ri rhiẹ ituakpọ erukaro ri gbare, i kparehaso i Jehova ji hobọtua Echu. Ọrẹ ovẹnẹ, Jesu o vwo omwemẹ rọ nọ rhiẹ otọrakpọ na ji dje ẹgwọlọ ye phia rẹn i Jehova. Jesu o ruẹ ọnana nyoma rọ huvwele i Jehova ọrẹ i kemru kemru. (Heb. 4:15; 5:​7-10) Ọ sẹrorẹ emevigbanhon ọnẹyen te ẹdẹ ro hwu rhẹ orhan oja na. (Heb. 12:2) Nyoma izede ọnana, nọ sabu djephia taghene o vwo ẹgwọlọ kpahen Jehova ọrhẹ odẹ ye.

13. Mesoriẹ i Jesu o rhiẹ ohworho rọ mai serhọ rọ nọ sabu dje Echu rhiẹ ọmọrenfian? (Ji ni ifoto na.)

¹³ Nyoma oborẹ i Jesu o nyerakpọ ye lele, no djephia taghene Echu ọmọrenfian orhiẹ i Jehova-a! (John 8:44) Usuẹn ituakpọ ephian ri nyerẹn ne, Jesu yọ mai rhe i Jehova. Orhianẹ efian rẹ Echu ọ mọren baren odẹ i Jehova ghini urhomẹmro, manẹ i Jesu o rhe kpahiẹn. Ọrẹn, Jesu o vwo omwemẹ rọ nọ chochọn odẹ i Jehova. Ọke ekwakwa a gbanhon omamọ rẹn i Jesu dede, o vwo omwemẹ ro no hwu ukperẹ ọnọ sẹrerhumuji Ọsẹ ye ro vwo ẹgwọlọ kpahiẹn.—Matt. 27:46.d

“MI WIAN OWIAN WU YẸRE MẸ HIN NE”

14. Marhẹ i Jehova o ru ha ebrurhọ rẹn i Jesu fọkiẹ esegburhomẹmriẹn?

¹⁴ Uvuẹn ẹrhomo ri Jesu ọ nẹren uvuẹn ason o ki hwu, nọ sabu ta: “Mi wian owian wu yẹre mẹ hin ne.” Ọ hẹroso i Jehova taghene ọnọ ha ebrurhọ riẹn fọkiẹ esegburhomẹmriẹn. (John 17:​4, 5) Jehova nọ ghini ha ebrurhọ riẹn. Fọkiẹ ọnana, orho kwe nọ daji uvuẹn usi-in. (Acts 2:​23, 24) Nọ rhọmọ i Jesu nuhwu ji yẹ ye ẹrhẹ ọduado obẹ odjuwu. (Phil. 2:​8, 9) Obẹtaye, Jesu nọ tuẹn usun rhọ ẹrhẹ Orodje ọrẹ Uvie Osolobrugwẹ. Me yẹ Uvie ọrana ono ru rẹn ituakpọ? Obọreva uvuẹn ẹrhomo i Jesu o yono idibo yi, nọ tare: “Jenẹ Uvie ọnọ rhe. Jenẹ [ọhọre i Jehova] te orugba uvuẹn otọrakpọ na jerẹ oborẹ ọ havwọ obẹ odjuwu.”—Matt. 6:10.

15. Me yi Jesu ono ji ru?

¹⁵ Phẹrẹkpẹ, Jesu ono fiuvweri hasuẹ evwreghrẹn Osolobrugwẹ ji ghwọghọ evwọkon na uvuẹn uvweri Armageddon. (Rev. 16:​14, 16; 19:​11-16) Orho ru, no no donron Echu rhẹ “ukpotọ ro vwo vwoba,” ọke ọrana, Echu ọrhọ sabu ruẹ emru owuorowu-u. (Rev. 20:​1-3) Uvwrọke Isuensun Ẹgbukpe Uriusionrin i Jesu, ọnọ rhua ufuoma ọrhẹ erhirhiẹ ọgbagba rẹn ituakpọ. Ọnọ rhọmọ ihworho ri hwuru. Ọnọ dẹrẹ ọsoso akpọ na rhiẹ paradais. Ọke ọrana, ọhọre i Jehova no no te orugba!—Rev. 21:​1-4.

16. Marhẹ akpọ na ono rhirhiẹ uvuẹn obẹta Isuensun Ẹgbukpe Uriusionrin i Jesu?

¹⁶ Marhẹ akpọ na ono rhirhiẹ uvuẹn obẹta Isuensun Ẹgbukpe Uriusionrin i Jesu? Ọdandan ọrhẹ ijẹgba ituakpọ ono nie. Ituakpọ i rha nẹrhomo vwe i Jehova nọ ha edandan aye rhomu aye nyoma izobo otan i Jesu-u; habaye, aye ni na sabu vwo obọdẹn onyerẹnkugbe rhẹ i Jehova vabọ userhumu i Jesu ọrhẹ awan 144,000 na. Ọke ọrana, e “tiẹ uhwu ro rhiẹ ọvwreghrẹn rọ kẹta [ra ha riuku mie Adam] nie” ne. Isin ephian ni ne rhiẹ ifefe, fọkime a rhọmọ ihworho ri hwuru ne. Ihworho ephian uvuẹn otọrakpọ na i rhiẹ ihworho ri gbare ne.—1 Cor. 15:​25, 26.

17-18. (a) Me yọ nọ phia uvuẹn obẹta Isuensun Ẹgbukpe Uriusionrin na? (b) Me yi Jesu ono ruo uvuẹn obẹta isuensun ọnẹyen? (1 Corinthians 15:​24, 28) (Ji ni ifoto na.)

¹⁷ Me yọ nọ ji phia uvuẹn obẹta Isuensun Ẹgbukpe Uriusionrin i Jesu? Ọke ọrana, emru oghẹnrensan owu ọnọ phia. No no mwu ihworho ephian ẹro taghene odẹ i Jehova ọfuanfon, habaye o ji brorhiẹn ọsoso. Izede ọgo? Uvuẹn ogba Eden, Echu ọ tare taghene Jehova ọmọrenfian, o vwo ji sun ituakpọ izede ẹgwọlọ-ọ. Avwọke ọrana rhe, idibo i Jehova buebun i ruẹ odẹ i Jehova fon ọgbọ buebun ne. Ọrẹn, uvuẹn obẹta Isuensun Ẹgbukpe Uriusionrin na, ọke ọrana, e dje Echu rhẹ ọmọrenfian ne. Jehova o ji djephia ne taghene ọye ghini Ọsẹ ro vwo ẹgwọlọ kpahen emọyen.

¹⁸ Phẹrẹkpẹ, ihworho ephian ina mẹrẹnvwrurhe taghene Echu ọmọrenfian. Me yi Jesu ono ruo uvuẹn obẹta isuensun ọnẹyen? Ọnọ hẹrokele udje Echu ji kparehaso i Jehova? Ẹjo! (Se 1 Corinthians 15:​24, 28.) Jesu ọnọ rharhumu ha Uvie na rẹn Ọsẹ ye. Ọnọ homariotọre uvuẹn otọre usun i Jehova. Itiọrurhomẹmro, Jesu ọ vẹnẹ Echu, fọkime o vwo omwemẹ ro no tiobọnẹ ekwakwa ephian fọkiẹ ẹgwọlọ ro vwo kpahen i Jehova.

19. Marhẹ odẹ i Jehova ọ ghanren te rẹn i Jesu?

¹⁹ Ọnana yọ soriẹ i Jehova ọ yẹ i Jesu odẹ ye! Jesu ọ dabu dje aruẹ ohworho rẹ Ọsẹ ye ọ havwọ phia gbagba. Omarana, marhẹ odẹ i Jehova ọ ghanren te rẹn i Jesu? Odẹ na yọ mai ghanren riẹn. O vwo omwemẹ ro no hwu fọkiẹ odẹ ọrana, ji rharhumu tiobọnu i kemru kemru rẹn i Jehova uvuẹn obẹta Isuensun Ẹgbukpe Uriusionrin na. Marhẹ ene ru hẹrokele udje i Jesu? Ana kpahenrhọ onọ ọrana uvuẹn urhomu-ẹmro rọ ha kpahen ọnana.