Ame i ha Ọsoso Akpenyerẹn Ame Yono Iyono Eghoghanren Mie Oyono Rọmaido na

UDJE ERI VWIẸRE MẸ

Uvwre ehion ẹgbukpe 1950, eri vwiẹre mẹ ni kwa nẹ Italy riẹ Kindersley, uvuẹn Saskatchewan rọ ha Canada. O jiri-i, aye ni yono urhomẹmro na, no mo rhiẹ oborẹ ọ mai ghanranren uvuẹn akpenyerẹn ame. Mi karorhọ ọrana ọke mia ji ha ọmọvwerhe, mia ghwọghọ ọke buebun uvuẹn owian aghwoghwo na rhẹ ekrun mẹ, ọrẹn ọke mia ha ẹgbukpe ẹrẹnren, ọkezẹko ni mia ha iruẹn ta taghene mẹmẹ “ọkobaro ibiọke”!

Eri vwiẹre mẹ ivwiegbere; udabọ ọrana, aye i dje omamọ udje nyoma aye a ha ogame i Jehova karo. Jerẹ udje, uvuẹn ẹgbukpe 1963, aye ni rhẹ enyerẹn aye buebun nẹ aye i sabu mẹrẹn igho aye ine riẹ omẹvwa akpọ ephian re ruru uvuẹn Pasadena, California, U.S.A. Uvuẹn ẹgbukpe 1972, ame ni nya ugbo nya ro seri te iroko 620 (ikilomita 1,000) riẹ Trail, British Columbia, Canada, ya ha userhumu rẹn ihworho ra djẹ edjadjẹ Italy uvuẹn ekogho ọrana. Ọsẹ mẹ ọ wian owian ọdẹrotọre. Ọ tiẹn uphẹn sansan rọ nọ mẹrẹn igho obuebun, nọ sabu fiomarhọ ogame i Jehova.

Oma ọ merhenren mẹ omamọ fọkiẹ udje eri vwiẹre mẹ i dje rhotọre ha mẹ ọrhẹ imizu mẹ awansa. Udje aye yẹ ọtonrhọ uyono mi mẹrẹnren uvuẹn ogame i Jehova, aye i ji yoni mẹ emru ọnana: Mi rha ha Uvie na karo, Jehova ọnọ hẹrote mẹ.—Matt. 6:33.

MI TUẸN OWIAN ỌKOBARO RHỌ

Uvuẹn ẹgbukpe 1980, ni mi rọnmọ ane mẹ Debbie ro vwo erhumu omamọ, ro ji fiomarhọ ogame i Jehova. Ame i gwọlọ tuẹn owian ọkobaro rhọ, omarana, ane mẹ Debbie nọ tuẹn owian ọkobaro rhọ ibiamo esa a vrẹn ọke ame a rọnmọ hin. Ọke ame a rọnmọ te ẹgbukpe owu, ame ni riẹ ukoko ọkokamu owu ra gwọlọ userhumu, ni mi homaba ane mẹ uvuẹn owian ọkobaro na.

Uvwrọke owu, ẹhẹn ame no seriotọre, ame ni brorhiẹn ame ine nẹ avwaye. Ame ni kiki lele oniruo okinhariẹ ame ta kpahiẹn. Nọ nyoma izede ẹgwọlọ ta rẹn ame: “Are i ha usuẹn oborẹ ọ suẹ obẹnbẹn na. Are a tẹnroviẹ ebẹnbẹn are ọvo. Are i rha tẹnrovi ekwakwa irhorhomu are i vwori, erhirhiẹ are ono rhomurhọ.” Ọrana yẹ urhebro ame i vi gwọlọ ọke ọrana. (Ps. 141:5) Ogege, ame ni ha urhebro na ruiruo, ji mẹrẹnvwrurhe taghene ame i vwo ekwakwa irhorhomu buebun. Ihworho buebun ri ha ukoko na i gwọlọ fiomarhọ ogame i Jehova, usuẹn aye yẹ iphuphẹn ọrhẹ ezẹko rẹ esa yanghene ane aye i vwa ga i Jehova. Ọrana obọdẹn uyono rẹn ame. Ame i yono kpahen oborẹ ame ine ru tẹnrovi ekwakwa irhorhomu ame i vwori, ji hẹrhẹ i Jehova no ruẹ ekwakwa serhọ. (Mic. 7:7) Ame ni rharhumu vwo aghọghọ, ekwakwa ni ji serhọ rẹn ame.

Uvuẹn isukuru ekobaro ame i tu nya, iyono ame i gare uvuẹn ẹkwotọre erọrọ dẹ ne. Ọke aye e dje ifoto aye rẹn ame, ji ta kpahen ebẹnbẹn ọrhẹ ebrurhọ aye i mẹrẹnren, ọnana no mwurun ame vwo oruru ame ina wian owian imishọnari. Omarana, ame ni brorhiẹn taghene ame ine vwobọrhọ owian ọnana.

Nẹ ame i sabu nyamwu ẹkẹ ọrana, uvuẹn ẹgbukpe 1984, ame ni riẹ ekete ra djẹ edjadjẹ i French uvuẹn Quebec, ekete na ọ ha iroko 2,485 (ikilomita 4,000) seri nẹ British Columbia. Ọnana no mevirhọ taghene ame ina riẹnrioma rhẹ irueruo amwa ọrhẹ edjadjẹ ọkpokpọ. Ebẹnbẹn ọrọrọ ame i ji dẹrughwaroghwu yẹ igho ame i vwa ghwai vwo. Ọke owu, na ta rẹn ame nẹ ame i ye gbugbon uvuẹn ikebi owu ra wọ i potato rhọ. Debbie nọ dabu ha i potato na sere aruẹ emaren sansan! Udabọ ebẹnbẹn enana, ame i damoma din erhirhiẹ na rhẹ aghọghọ. Itiọrurhomẹmro, ame ni mẹrẹnvwrurhe taghene Jehova ọ hẹrote ame.—Ps. 64:10.

Ẹdẹ owu, ne sere ame use owu uvuẹn ifonu rẹ ame i vwe fiẹrorhọ. Use na o sekpahen ọrẹ ame ina ya ga uvuẹn Oghọn Ukoko rọ ha i Canada. Ame i ghwanreriẹn fiobọrhọ ifọmu ame ine riẹ Isukuru i Gilead ne, omarana oma ọ ghwai merhen ame phan kpahen use na-a. Ọrẹn, ame ni rhiabọ dede use na ghele. Ọke ame e te avwaye, ame ni nọ Omizu Kenneth Little rọ ha usuẹn Umẹ rọ Hẹrote Oghọn Ukoko na, “Me yẹ ame ine ruo arha ha use rẹn ame riẹ Isukuru i Gilead?” Nọ ta rẹn ame, “Ọke ọrana orho te ana mẹrẹn oborẹ ene ruo.”

Ọkprughwre owu ọ vrẹn, na ha use mẹ ọrhẹ ane mẹ Debbie riẹ Isukuru i Gilead. Omarana, ame ine brorhiẹn kpahen oborẹ ame ine ruo. Omizu Little nọ ta rẹn ame: “O toro oborẹ are i djẹre vwana-a, are ina sabu ji roro ọkezẹko taghene are i rheri bi manẹ are a djẹ ọrẹ are i nyajovwo na. Orhiẹ ọrẹ are i djẹre vwana yọ nọ mai rhomu-u; ọrẹn, Jehova yọ nọ ha ebrurhọ rẹn are.” Ame ni rhiabọ dede use na, uvwre ẹgbukpe buebun rhe na ame i mẹrẹn orugba ẹmro Omizu Little ne. Ọgbọ buebun ame a ji ha ẹmro erana ha urhebro rẹn awọrọ re roro kpahen uphẹn ẹga aye ine vwobọrhọ uvuẹn ogame i Jehova.

AKPENYERẸN AME UVUẸN OWIAN IMISHỌNARI

Oma ọ merhenren ame taghene ame i ha usuẹn emọ Isukuru i Gilead ri te awan 24, iklasi ọrẹ 83, re ruru uvuẹn Brooklyn, New York uvuẹn April 1987. Omizu Ulysses Glass ọrhẹ Jack Redford yi mai yono ame ọke ọrana. Ọke ibiamo isionrin a vrẹn, ame ni ruotọre nẹ Isukuru i Gilead uvuẹn September 6, 1987. Ne djerẹ ame ọrhẹ John kugbe Marie Goode riẹ Haiti.

Nẹ ẹgbukpe 1962 rhe, avwọke re le imishọnari nẹ Haiti, e ji dje imishọnari erọrọ riẹ ẹkwotọre na-a. Ikprughwre esa a vrẹn nẹ ọke ame a ruotọre, ne djerẹ ame ya ga uvuẹn ukoko ọkokamu owu uvuẹn Haiti, ro vwo ighwoghwẹmro 35. Ọke ọrana ame a ghwai tona-a, habaye ame ọvo ye rhirhiẹ oghwa ra kwaphiẹrhọ rẹn imishọnari uvuẹn amwa na. Ihworho na ivwiegbere, habaye, buebun aye e rhe oborẹ e se-e. Uvwrọke ọrana, ame i rhiẹromẹrẹn ozighi, ogiribo ọgbogbanhon, e fi erhanren rhẹ ekwakwa ra ha gberi izede, ihworho a ji kparahasuẹ igọmẹti.

Ame i yono ekwakwa buebun mie imizu ri ha Haiti fọkiẹ esegburhomẹmro aye. Dedevwo imizu na a dẹrughwaroghwẹ akpọ ọgbogbanhon, aye i vwo ẹgwọlọ kpahen i Jehova ọrhẹ owian aghwoghwo na. Omizu ọmase owu rọ kpako ne ọ vwọ sabu se-e; ọrẹn o rhe ekete i Baibol ri te emrẹ 150 rhẹ urhomu. Fọkiẹ ebẹnbẹn erana ra phia na, nọ lẹrhẹ ame vwo oruru rhọ rẹ ame ine ghwoghwo kpahen Uvie Osolobrugwẹ, taghene ọye ọvo yọ nọ sabu kwaphiẹ ebẹnbẹn ituakpọ rhọ. Oma ọ merhenren ame ọke ihworho ame i tu ha i Baibol yono e rhiẹ ọkobaro ọke ephian, ọkobaro oghẹnrensan, ọrhẹ ekpako ukoko.

Ọke ame a ji ha Haiti, ni mi mẹrẹn idama owu re se i Trevor ro rhiẹ imishọnari uvuẹn ishọshi owu, ame rhẹ ọye i ta kpahen i Baibol ọgbọ buebun. Ẹgbukpe buebun a vrẹn, nọ ya ileta mi vwe fiẹrorhọ vwe mẹ. Nọ tare: “Mi ne bromarhame uvuẹn omẹvwa rọ sa na! Mi gwọlọ rharhumu ghwẹrioma riẹ Haiti ya ga ẹrhẹ ọkobaro oghẹnrensan, uvuẹn ekete mie rhiẹ imishọnari ishọshi bi.” Ọye ọrhẹ aniẹ ni ghini ruẹ omaran ẹgbukpe buebun.

AME I RIẸ EUROPE—ỌKE ORU AME NI RIẸ AFRICA

Ne djerẹ ame ya ga uvuẹn ekete ezẹko uvuẹn Europe rẹ ẹkparehaso owian Uvie na o riotọre. Uvuẹn ẹgbukpe 1992 ame ni riẹ Ljubljana, Slovenia, rọ kẹrẹ ekete eri vwiẹre mẹ a ghwanren, bọmọke aye i ki kwa riẹ Italy. Uvwrọke ọrana, e ji fiuvweri uvuẹn ekete re se Yugoslavia bi. Oghọn ukoko rọ ha Vienna, Austria, ọrhẹ ọfisi ri ha Zagreb, Croatia, kugbe Belgrade, Serbia, ya hẹrote owian aghwoghwo na uvuẹn uvwrakpọ ọrana. Vwana, ẹkwotọre owuowu ono vwo Oghọn Ukoko ọnẹyen.

Ọnana no mevirhọ taghene ame ina rharhumu riẹnrioma rhẹ irueruo amwa ọrhẹ edjadjẹ ọkpokpọ. Ihworho amwa na a tẹmro ọnana, “Jezik je težek,” ro mevirhọ taghene “Edjadjẹ na ọ gbanhonron omamọ.” Ọrana ghini urhomẹmro! Atamwu ri imizu na i djephia ọrhẹ uruemru aye e rhiabọ dede ewene ekpokpọ rẹ ukoko na o tiobọnu, kugbe oborẹ aye e ru djokarhọ oborẹ i Jehova o ru ha ebrurhọ rẹn aye ne, o jerẹ ame omamọ. Ọgbọrọrọ, ame ni mẹrẹn oborẹ i Jehova o ru kpọ ekwakwa vi uvuẹn ọke ro serhọ fọkiẹ ẹgwọlọ ọnẹyen. Ame i yono iyono eghoghanren ọke ame a ha Slovenia, ame i rhe kpahen iyono enana buebun bi ne, ọrẹn aye i ha userhumu rẹn ame vwo edirin uvuẹn ọke ebẹnbẹn.

Ọrẹn, ewene ekpokpọ ni homaphia obaro. Uvuẹn ẹgbukpe 2000, ne djerẹ ame riẹ Côte d’Ivoire, rọ ha West Africa. Uvuẹn November 2002, ame ni kwa riẹ Sierra Leone fọkiẹ uvweri. Ọke ọrana, uvweri re firi te ẹgbukpe 11 ọ ghwai toba obọ. Ọ lọhọ rẹ ohworho ono nẹ Côte d’Ivoire kpregede-e. Ọrẹn oborẹ ame i yono ne, i ha userhumu rẹn ame sẹrorẹ aghọghọ ame.

Ame i tẹnrovi ihworho ri gwọlọ yono kpahen urhomẹmro na uvuẹn okogho na, ọrhẹ imizu ọwan ri vwo edirin ẹgbukpe buebun ne udabọ uvweri. Dedevwo aye ivwiegbere, ọrẹn aye i ji gwọlọ tiobọnu rẹn awọrọ. Omizu ọmase owu ọ yẹ ane mẹ Debbie ewun ezẹko. Ọke i Debbie o ruẹ sikẹnsikẹn rọ nọ haye, omizu ọmase na nọ tare: “Uvwrọke uvweri na, imizu ri ha ẹkwotọre erọrọ i hobọtua ame. Vwana yẹ ọke ame ina ha userhumu phia.” Ame ni bru ẹkẹ te oma ame ina hẹrokele udje aye.

Ame ni rharhumu ghwẹrioma riẹ Côte d’Ivoire, ọrẹn ozighi nọ rharhumu homaphia fọkiẹ usuon oseghe. Omarana, uvuẹn November 2004, na ha ẹlikọpta kpare ame nẹ avwaye, ẹkpa owuowu ọvo rọ ghwa te ikilo 10- (22-lb), yẹ ame i sabu kpare. Ason ọrana, ame i merhẹn otọroghwa rọ ha ọko isodja ra djẹ edjadjẹ i French, ẹdẹ ọreva ye, na kparerẹ ame riẹ Switzerland. Ọke ame e te oghọn ukoko emrẹ erhẹrhẹ ason, Umẹ rọ Hẹrote Oghọn Ukoko ọrhẹ era ha uyono phia uvuẹn Ministerial Training School kugbe ene aye, ni dabu dede ame sasasa, gbalọ ame, yẹ ame emaren ọdjodjẹrẹ, ọrhẹ oborẹ e se Swiss chocolate. Ọnana ọ lẹrhẹ oma merhen ame omamọ.

Ne djerẹ ame riẹ i Ghana ibiọke, ọke oru, na rharhumu dje ame riẹ Côte d’Ivoire ọke uvweri na o riotọre ne. Uruemru esiri imizu na ọ ha userhumu rẹn ame sabu din ebẹnbẹn na, uvwrọke ame a kwa ọrhẹ uvwrọke ame a wian ibiọke. Dedevwo ukoko i Jehova o dje ẹgwọlọ phia ọke ephian, ọrẹn mẹmẹ ọrhẹ Debbie ni brorhiẹn ame ina ha ukẹro ọghoghanren ni ẹgwọlọ rọ ha ukoko na. Itiọrurhomẹmro, ame ni mẹrẹnvwrurhe taghene uvuẹn ọke egbogbanhon erana, ame i yono iyono eghoghanren.

AME I RIẸ MIDDLE EAST

Uvuẹn ẹgbukpe 2006, esiri ukoko ni ya ileta vwe ame taghene ame i riẹ Middle East. Ọnana no mevirhọ taghene ame ina rharhumu riẹnrioma rhẹ irueruo ọrhẹ edjadjẹ erọrọ, ji rhiẹromẹrẹn ewene erọrọ. O vwo ekwakwa buebun rẹ ame ine yono kpahen, fọkiẹ irueruo usuon oseghe ọrhẹ ẹga erọrọ rọ vuọn uvwre na. Ame i vwo ẹgwọlọ kpahen edjadjẹ sansan ọrhẹ okugbe ri ha uvuẹn ikoko na, fọkime aye a nyalele ọkpọvi rẹ ukoko na o tiobọnẹ. Oma ọ merhẹn ame kpahen uduefigbere imizu na, udabọ ẹkparehaso rẹ aye a mẹrẹn nẹ ekrun, ihworho isukuru aye, ekete aye a wian, ọrhẹ ihworho re rhirhiẹ kẹrẹ aye.

Uvuẹn ẹgbukpe 2012, ame ni riẹ omẹvwa oghẹnrensan re ruru uvuẹn Tel Aviv, rọ ha uvuẹn Israel. Ọnana yẹ omẹvwa ọrukaro rọ ji maido kparobọ rẹ ihworho i Jehova re rhirhiẹ uvwre avwaye i ru ne avwẹ Pentecost 33 C.E. Omẹvwa na ọ sẹrẹ ame ẹro dẹ-ẹ!

Uvwre ẹgbukpe erana, ne djerẹ ame riẹ ẹkwotọre owu ra dobọ owian ọwan ji. Ame i kpare ẹbe ukoko na ezẹko, riẹ aghwoghwo, ji riẹ omẹvwa ekokamu re ruru. Isodja ri kpare ekwakwa owọnren i vuọn ekete ephian, ame ọrhẹ ighwoghwẹmro ezẹko i ha ẹghwanren ruiruo ọke ame a nya, ọnana nọ lẹrhẹ ame vwo ufuoma.

AME I RHARHUMU RIẸ AFRICA

Uvuẹn ẹgbukpe 2013 na yẹrẹ ame owian ọkpokpọ—nọyẹ ọrẹ ame ina ya ga uvuẹn oghọn ukoko rọ ha Kinshasa Congo, ro rhiẹ ẹkwotọre ọduado, ro ji vwo erhumu, aye ivwiegbere ri ji fiuvweri buebun ne. Ọke ukaro ame ni tare, “Ame i rhe Africa; ame ina nya.” Ọrẹn, o ji vwo ekwakwa buebun ame ine yono, maido kpahen oborẹ ame ine ru riẹ ekete ri vwa ghwai rhie ọrhẹ ekete ri vwe vwo izede. Ọrẹn, o vwo ekwakwa irhorhomu buebun rẹ ame i tẹnrovi, nọyẹ edirin, aghọghọ imizu na i djephia, ẹgwọlọ kpahen owian aghwoghwo na, ọrhẹ ọdamẹ aye ine riẹ iyono ukoko ọrhẹ emẹvwa sansan udabọ akpọ ọgbogbanhon. Ame i mẹrẹn oborẹ ihworho buebun i ru rhiabọ dede owian aghwoghwo na, fọkiẹ userhumu ọrhẹ ebrurhọ i Jehova. Ẹgbukpe buebun rẹ ame a ga uvuẹn Congo, ọ lẹrherẹ ame yono iyono eghoghanren ji vwo igbehian ri họhọ ekrun rẹn ame.

Uvuẹn ehion egbukpe 2017, na yẹrẹ ame owian ọrọrọ—nọyẹ ọrẹ ame ina ya ga uvuẹn i South Africa. Ọnana yẹ oghọn ukoko rọ maido kparobọ rẹ ame a ga ne, na yẹrẹ ame owian ame i vwa ji wian dẹ. O vwo ekwakwa buebun rẹ ame ine yono, ọrẹn oborẹ ame i yono vrẹn ne i ha userhumu rẹn ame. Ame i vwo ẹgwọlọ kpahen imizu na ri vwo edirin ẹgbukpe buebun ne. Oma ọ merhenren ame, rẹ ame a mẹrẹn okugbe rọ ha uvwre imizu ra ga uvuẹn Oghọn Ukoko na, udabọ ekete sansan aye i nurhe ọrhẹ irueruo amwa aye rọ vẹnẹren. Ọnana ọ sabu phia fọkiẹ ebrurhọ i Jehova, fọkime ihworho yi e kuẹ ewun ọkpokpọ na rhọ ji ha iruemru-urhi Baibol na ruiruo.

Uvwre ẹgbukpe erana, mẹmẹ ọrhẹ Debbie i rhiabọ dede ewian sansan, riẹnrioma lele irueruo emwa sansan, ji yono edjadjẹ ekpokpọ. Ọnana ọ ghwai lọhọ-ọ, ọrẹn Jehova ọ nyoma ukoko yi ọrhẹ imizu ukoko na dje ẹgwọlọ atamwu phia rẹn ame. (Ps. 144:2) Fọkime ame i fiomarhọ owian Uvie na vuọnvuọn, ọnana nọ lẹrherẹ ame rhiẹ emamọ ihworho rẹn i Jehova.

Oma ọ merhenren mẹ kpahen iyono eri vwiẹre mẹ i tiobọnu mẹ; obẹhatua ane mẹ ọghoghanren Debbie; ọrhẹ emamọ idje imizu akpọ ephian e djephia. Rẹ ame a tẹnrovi obaro na, ame i brorhiẹn ame ine yono iyono eghoghanren mie Oyono Rọmaido na ọke ephian.