Me yi Baibol na ọ ta Kpahen Emẹgọ?

Lele oborẹ otu i Catholic i ghwoghwori uvwrọke aye a riorẹ owu obẹ St. Peter’s Basilica uvuẹn March 25, 2022, Pope Francis no mevi obaro oma i Mary “no rhurhu ukẹro, gburhomu rhotọre, ji nẹrhomo odjahen.” Nọ “rẹ i Mary” nọ yẹ ye ufuoma. Iyẹnrẹn i Vatican owu nọ habaye taghene “Pope na ọ nẹrhomo vwe i Mary nọ ha Ebrurhọ rẹn ituakpọ, maido ere rhirhiẹ Russia ọrhẹ Ukraine.”

Me wu rorori? O serhọ na nẹrhomo obaro ema yanghene ha aye ba ogame ọwan? Roro kpahen eghwẹmro i Baibol enana:

• “Are i vwa vi jare oma harẹn oma are-e, yanghene emru rọ họhọ ekwakwa ri ha obẹ idjuwu na yanghene otọrakpọ na yanghene uvuẹn ame rọ ha uvuẹn otọrakpọ na-a. Are i vwe vi gburhomu rhotọre harẹn aye yanghene a vwa riẹriẹ are ga aye-e, fọkime mẹmẹ yi Jehova Osolobrugwẹ are, mẹmẹ Osolobrugwẹ rọ guọlọ ẹga ro fiotọre.”—Exodus 20:4, 5.a

• “Ema aye idọlọ efuanfon ọrhẹ oro, aye ewian abọ ituakpọ. Aye i vwo unu, ọrẹn aye i vwa sabu tẹmro-o; aye i vwo ikẹro ọrẹn aye i vwa sabu mẹrẹn ude-e; aye i vwo erhọ, ọrẹn aye i vwa sabu rho-on; aye i vwo irhuen, ọrẹn aye i vwa sabu se ọrhe-en; aye i vwo abọ, ọrẹn aye i vwa sabu haye ruiruo-o; aye i vwo aghwẹ, ọrẹn aye i vwa sabu nya-a; aye i vwa sabu ha uvwele aye ruẹ edon owuorowu-u. Ihworho ri ruru aye ni na họhọ aye, omaran ji te ihworho ra hẹrosuẹ aye.”—Psalm 115:4-8.

• “Mẹmẹ yi Jehova. Ọrana yẹ odẹ mẹ; Mi ha odidi mẹ rẹn ohworho owuorowu-u, yanghene ha ujiri mẹ rẹn ema ra jarare-e.”—Isaiah 42:8, ekete ra djokarhọ.

• “Are i kẹnoma rẹn emẹgọ.”—1 Corinthians 10:14.

• “Are i kẹnoma rẹn ema.”—1 John 5:21.

Wu rha guọlọ rhe iyẹnrẹn erọrọ kpahen oborẹ i Baibol na ọ ta kpahen ema ra haba ogame, se urhomu-ẹmro na “The Bible’s Viewpoint—Images” yanghene ni ividio na Osolobrugwẹ o Kweri na Nyoma Ema ha Ẹga Riẹn?

Ọkezẹko wu ne ji vwo omamerhomẹ kpahen oborẹ i Baibol na ọ ta kpahen irhomu-ẹmro enana:

• “The Virgin Mary—What Does the Bible Say About Her?”

• “Should You Pray to the Virgin Mary?”

• “Miracles and Apparitions—Signs From God?”

• “Peace on Earth—How Will It Come?”

Photo credit: Vincenzo Pinto/AFP via Getty Images