Ere Suẹn i ha Orhetio Phia Taghene Armageddon ọ sa Phẹrẹkpẹ—Me yi Baibol na ọ Tare?

Uvuẹn urhiọke i Monday, October 10, 2022, ibọmbu owu ri Russia ọ sare nọ ghwọghọ emwa ezẹko uvuẹn i Ukraine, aye sa ibọmbu na fọkime Ukraine yi kiki ha ibọmbu ghwọghọ ibriji owu ro suẹn nẹ Crimea ruẹ uvuẹn i Russia. Ekwakwa enana ni lẹrhẹ ere suẹn ha orhetio phia taghene ọkezẹko Armageddon ọ sa phẹrẹkpẹ.

• “Armageddon o tikẹrẹ rhọ ne avwọke re gbozighi re seri Cuban Missile Crisis [U.S. President John F.] Kennedy. . . . Mie nie taghene ekwakwa owọnren enana ra ha ruiruo na, ina sabu suẹ Armageddon.”—U.S. President Joe Biden, October 6, 2022.

• Ọke ra nọ ọro suẹn Ukraine Volodymyr Zelensky kpahen oborẹ ekwakwa owọnren ra ha ruiruo ọnọ sabu so, nọ tare, “Mi kwerhọ ye taghene Armageddon ọ sa phẹrẹkpẹ, ọnọ suẹ ofẹn rẹn ọsoso akpọ na.”—BBC News, October 8, 2022.

Ekwakwa owọnren sansan ra ha ruiruo vwana ọnọ sabu lele fiẹ Armageddon? Me yi Baibol na ọ tare?

Ekwakwa owọnren jerẹ ibọmbu yi na suẹ Armageddon?

Ẹjo. Ukwọgbọ ọvo yẹ ẹmro na “Armageddon” ọ homaphia uvuẹn i Baibol na, ọ ha uvuẹn Revelation 16:16. Ọ vwọ rionbọrhọ uvweri uvwre egbamwa sansa-an, ọrẹn uvweri uvwre Osolobrugwẹ ọrhẹ “irodje akpọ na ephian.” (Revelation 16:14) Osolobrugwẹ ọnọ ha uvweri Armageddon fiobarhọ isuensun ituakpọ.—Daniel 2:44.

Wu rha guọlọ yono rhọ kpahen oborẹ Armageddon ọnọ hobọte otọrakpọ na lele, se urhomu-ẹmro na Me yẹ Uvweri Armageddon?

Uvweri ibọmbu ya na ha ghwọghọ otọrakpọ na ọrhẹ ere rhirhiẹ uvuien?

Ẹjo. Dedevwo ituakpọ re suẹn ina sabu ha ekwakwa owọnren sansan ruiruo obaro na, Osolobrugwẹ o kwe na ghwọghọ otọrakpọ na-a. Baibol na ọrhọ ta:

• “Otọrakpọ na ono rhirhiẹ ye bẹmẹdẹ.”—Ecclesiastes 1:4.

• “Evwata na ina ha otọrakpọ na riuku, Aye ine nyerẹn uvuien bẹmẹdẹ.”—Psalm 37:29.

Ọrẹn, aruẹmẹrẹn i Baibol ọrhẹ ekwakwa ra phia vwana, i djephia taghene ewene ọduado ọ samo rhirhiẹ ye rẹn ituakpọ. (Matthew 24:3-7; 2 Timothy 3:1-5) Yono kpahen oborẹ i Baibol na ọ ta kpahen obaro na nyoma uyono i Baibol ọphẹ rẹ ame e tiobọnẹ rẹn ihworho.