Me yẹ Uvweri Armageddon?

Ẹkpahenrhọ i Baibol na

Uvweri Armageddon yẹ uvweri rọ kẹta rọ nọ homaphia uvwre isuensuon ituakpọ ọrhẹ usun Osolobrugwẹ. Isuensuon enana ọrhẹ era hobọtua aye, a kparahasuẹ Osolobrugwẹ vwana, nime aye i vwa hobọtua usun ọnẹye-en. (Psalm 2:2) Uvweri Armageddon ọnọ ha isuensuon ituakpọ ephian toba.—Daniel 2:44.

Ukwọgbọ yẹ ẹmro na “Armageddon” ọ homaphia uvuẹn i Baibol na, ọ ha uvuẹn Revelation 16:16. Izede aruẹmẹrẹn, ọbe i Revelation o djephia taghene uvuẹn “ekete ra ha edjadjẹ Hebrew se Armageddon,” “irodje akpọ na ephian” ni ne koko “hẹrhẹ uvweri ẹdẹ rode Osolobrugwẹ Ọrọmaigbanhon na.”—Revelation 16:14.

Ayọmo yi ne fiuvweri Armageddon? Jesu Kristi ono suẹn emakashe buebun fiẹ evwreghrẹn Osolobrugwẹ kparobọ. (Revelation 19:11-16, 19-21) Evwreghrẹn enana yẹ ihworho ri kparehasuẹ omẹgbanhon usun Osolobrugwẹ, ra ji ha ukẹro sakamu ni Osolobrugwẹ.—Ezekiel 39:7.

Uvuẹn Asia ọrhẹ ekete ezẹko uvuẹn Africa ọvo ye ne fiuvweri Armageddon? Ẹjo. Ukpomaran, ene fiuvweri Armageddon uvuẹn ọsoso akpọ na.—Jeremiah 25:32-34; Ezekiel 39:17-20.

Odẹ ọrọrọ re ji se Armageddon yẹ “Har–Magedon” (Edjadjẹ i Hebrew Har Meghiddohnʹ), o mevirhọ “Ugbenu i Megiddo.” Megiddo amwa owu rọ ha uvuẹn ẹkwotọre Israel ọke ahwanren. Iyẹnrẹn o djephia taghene e fiuvweri buebun avwaye, tobọ te ezẹko ri Baibol na ọ nẹ iyẹnrẹn kpahen. (Judges 5:19, 20; 2 Kings 9:27; 23:29) Ọrẹn, Armageddon ọ sabu rhiẹ ekete re rhiẹromẹrẹn rọ kẹrẹ i Megiddo ọke ahwanre-en. O vwo ugbenu ọduado owuorowu avwaye-e, habaye, ọsoso Otọre rọ Phẹnren ọrẹ Jezreel ọ sabu gba ihworho ri ne fiuvweri hasuẹ Osolobrugwẹ na-a. Ukpomaran, Armageddon o mevirhọ erhirhiẹ rẹ agbamwa na ephian, ine koko jeghwai kparehasuẹ usun Osolobrugwẹ.

Marhẹ erhirhiẹ akpọ na ọnọ havwọ ọke re ne fiuvweri Armageddon? Dedevwo ọwan e rhe oborẹ Osolobrugwẹ ono ha omẹgbanhon ọnẹyen ruiruo lele-e, ọrẹn ọnọ ha ekwakwa rọ ha ruiruo bi ne wian, jerẹ oso atita, otọre ekpogho, oso rọ suẹ ukude, erhanren ọrhẹ isọnren, aruọke rọ braro, ọrhẹ emiamo. (Job 38:22, 23; Ezekiel 38:19, 22; Habakkuk 3:10, 11; Zechariah 14:12) Fọkiẹ ẹhẹn otighri, evwreghrẹn Osolobrugwẹ ezẹko ina sabu kpe oma aye, aye ni na mẹrẹnvwrurhe taghene Osolobrugwẹ yọ wọnrọn hasuẹ aye.—Ezekiel 38:21, 23; Zechariah 14:13.

Armageddon ono fiobarhọ akpọ na? Ẹjo, o fiobarhọ akpọ na-a, nime a ma otọrakpọ na nẹ ituakpọ i rhirhiẹ ye bẹmẹdẹ. (Psalm 37:29; 96:10; Ecclesiastes 1:4) Armageddon ọ ghwọghọ ituakpọ ephia-an, nime “otu gbidigbidi” buebun ri rhiẹ idibo Osolobrugwẹ ine simirhọ.—Revelation 7:9, 14; Psalm 37:34.

Ọkezẹko, Baibol na ọrhọ hunute “akpọ” na, ọnọ ji sabu mevirhọ evwọkon ri ha uvuien ra kparahasuẹ Osolobrugwẹ, ukperẹ ono rhiẹ otọrakpọ na ephian. (1 John 2:15-17) Ọnana yọ soriẹ a ta taghene Armageddon ọnọ ghwọghọ “akpọ na.”—Matthew 24:3, King James Version.

Ọkiọgo yẹ Armageddon ọnọ rhe? Ọke i Jesu ọ ta kpahen “ukpokpogho rode” ro no lele fi uvweri Armageddon, nọ tare: “Sekpahen ẹdẹ ọrhẹ unọke ọrana, o vwo ohworho ro rherie-e, emakashe ri ha obẹ odjuwu na yanghene Ọmọ na e rhe-e, jokpanẹ Ọsẹ na ọvo.” (Matthew 24:21, 36) Ọrẹn, Baibol na o djephia taghene ọnọ rhiọ uvwrọke omẹhaphia i Jesu, ro tonrhọ avwẹ ẹgbukpe 1914 ne.—Matthew 24:37-39.