Mesoriẹ Usun Oseghe ọ Suẹ Oghalẹ Omamọ?—Me yi Baibol na ọ Tare?

Usun oseghe, ọ ghalẹ ihworho buebun ne uvuẹn ọsoso akpọ na. Lele iyẹnrẹn ọrẹ 2022 ri Pew Research Center ọ haphia, “imirẹghwa ri vrẹn 65 usuẹn awan 100 re rhonmie uvuẹn ẹkwotọre 19, i tare taghene oborẹ ọ mai suẹ ẹghwọ ọgbogbanhon uvwre ihworho uvuẹn ẹkwotọre aye, yẹ ẹmro usun oseghe.”

Wu djokarhọ ye ne taghene oghalẹ rẹ usun oseghe ọ sua uvuẹn ekete we rhirhiẹ, no biomẹrhọ biomẹrhọ? Mesoriẹ o rhiẹ omaran? O vwo oborẹ ana sabu ru kpahiẹn? Djokarhọ oborẹ i Baibol na ọ tare.

Iruemru ra suẹ oghalẹ

Baibol na ọ mẹraro taghene uvuẹn ọke ọwan na, ro rhiẹ “ẹdẹ ri koba na,” ihworho buebun ine vwo iruemru rọ nọ lẹrhiẹ bẹn re ne vwo okugbe.

• ‘Uvuẹn ẹdẹ ri koba na, ọke egbogbanhon ra bẹn enyerẹn ine rhirhiẹ ye. Fọkime, ituakpọ ine vwo ẹguọlọ oma aye ọvo, . . . aye i nyamwu ẹmro aye-e.’—2 Timothy 3:1-3.

Udabọ omẹdamu ihworho buebun re suẹn, isuensuon ituakpọ o vwo rhomẹrhọ-ọ. Ihworho ri vwo iroro ri vẹnẹren, i vwe kwe lele ere suẹn wian kugbe na kwaphiẹ ebẹnbẹn rhọ-ọ. Ọnana o dje oborẹ i Baibol ọ tare ọke jijiri ne, rhiẹ urhomẹmro.

• “Onyakpọ o sun onyakpọ riẹ ẹkuọn ye.”—Ecclesiastes 8:9.

Ọrẹn, Baibol na ọ ta kpahen oborẹ ọnọ sabu kwaphiẹ erhirhiẹ na rhọ, nọyẹ igọmẹti rẹ ohworho ro vwo omẹgbanhon ro no tiẹ ebẹnbẹn ituakpọ nie, o suẹn.

Osun ro mwuovwan, rọ ji damerhọ awọrọ

Baibol na ọ ta kpahen osun owu ro mwuovwan ro no suẹn ituakpọ: Jesu Kristi. Jesu o vwo omẹgbanhon ọrhẹ omwemẹ rọ nọ yẹ ihworho ephian okugbe ọrhẹ ufuoma.

• “Uvuẹn ẹdẹ ọnẹyen, evwata na ine buon omamọ, ufuoma no no gbephe.”—Psalm 72:7.

• “Egbamwa na ephian, ina ha ẹga riẹn.”—Psalm 72:11.

Jesu obọdẹn orodje, fọkime o vwo ọdamẹ okokodo kpahen ihworho, ọ ji guọlọ ha userhumu rẹn aye, maido ihworho re sehiẹn ne.

• “Fọkime ono simi ivwiegbere ra nekpẹn userhumu, omaran ji te ihworho dẹndẹn ọrhẹ eri vwe vwo userhumu. Ono gbe arodọmẹ rẹn ihworho dẹndẹn ọrhẹ ivwiegbere na, ono simi arhọ ivwiegbere na. Ono simi aye nẹ abọ osehiẹn ọrhẹ ozighi.”—Psalm 72:12-14.

Yono rhọ kpahen Uvie Osolobrugwẹ, ro rhiẹ igọmẹti ra ha mwu obẹ odjuwu, ri Jesu o suẹn. Yono kpahen oborẹ wu ne ru mẹrẹn erere nie rhe, jeghwai hobọtua ye.

• Ni ividio na Me Yẹ Uvie Osolobrugwẹ?

• Se urhomu-ẹmro na, “God’s Kingdom—A Government With No Corruption.”