Mesoriẹ e se i Jesu Ọmọ Osolobrugwẹ?

Ẹkpahenrhọ i Baibol na

Baibol na o se i Jesu “Ọmọ Osolobrugwẹ” ọgbọ buebun. (John 1:49) Ẹmro na “Ọmọ Osolobrugwẹ,” o djephia taghene Osolobrugwẹ yẹ Ọmemama na, ọye yi ji Esiri arhọ ephian, omaran ji te arhọ i Jesu. (Psalm 36:9; Revelation 4:11) Baibol na o yono ọwan taghene Osolobrugwẹ ọsẹ ro vwiẹ ọmọ jerẹ oborẹ ituakpọ e vwiẹ emọ-ọ.

Baibol na o ji se emakashe na “Emọ Osolobrugwẹ urhomẹmro na.” (Job 1:6) Baibol na ọ tare taghene onyakpọ ọrukaro na, Adam, “ọmọ Osolobrugwẹ.” (Luke 3:38) Ọrẹn, nime Jesu yi Jehova ọ kiki ma, Baibol na no djerie rhiẹ Ọmọ owu ọvo rẹ Osolobrugwẹ o vwori.

• Jesu o nyerẹnren obẹ odjuwu e ki vwiẹ ye uvuẹn otọrakpọ na?

• Me yi Jesu o ruru obẹ odjuwu ọ ki rhiẹ otọrakpọ na?

Jesu o nyerẹnren obẹ odjuwu e ki vwiẹ ye uvuẹn otọrakpọ na?

Ee. Jesu ọmakashe obẹ odjuwu e ki vwiẹ ye jerẹ onyakpọ uvuẹn otọrakpọ na. Jesu nọ tare: “Mi nẹ obẹ odjuwu rhe.”—John 6:38; 8:23.

Osolobrugwẹ ọ ma i Jesu vwẹre ọ ki ma ekwakwa erọrọ. Sekpahen i Jesu, Baibol na ọrhọ ta:

• “Ọye yẹ . . . ọmọ ọkpako emama ephian.”—Colossians 1:15.

• Ọye yẹ “ọtonrhọ emama ọrẹ Osolobrugwẹ.”—Revelation 3:14.

Jesu ọ ha aruẹmẹrẹn ro sekpahen ohworho “rẹ ọtonrhọ ye, o rhiẹ nẹ ọke ahwanren rhe” te orugba.—Micah 5:2; Matthew 2:4-6.

Me yi Jesu o ruru obẹ odjuwu ọ ki rhiẹ otọrakpọ na?

O vwo ẹrhẹ ọduado obẹ odjuwu. Jesu ọ ta kpahen ẹrhẹ ọnana ọke rọ nẹrhomo vwe Ọsẹ ye: “Ọsẹ, brọghọ rhọ mẹ oma . . . rhẹ ọghọ mi vwori rhẹ owẹwẹ bọmọke a ki ma akpọ na.”—John 17:5.

Ọ ha userhumu rẹn Ọsẹ ye ma ekwakwa erọrọ. Jesu ọ wianren rhẹ Osolobrugwẹ “jerẹ ọwena owian.” (Proverbs 8:30) Sekpahen i Jesu, Baibol na ọrhọ ta: “Nyoma yen rhe ya ma ekwakwa eri hẹrhẹre ephian obẹ idjuwu ọrhẹ akpọ na.”—Colossians 1:16.

Osolobrugwẹ ọ nyoma i Jesu ma ekwakwa erọrọ. Owian emama ọnana ọ ji rionbọrhọ emakashe ọrhẹ otọrakpọ na. (Revelation 5:11) Riobarorhọ, ana sabu ha onyerẹnkugbe Osolobrugwẹ ọrhẹ ọrẹ i Jesu vwanvwọn ọrẹ ohworho ro sin oborẹ a bọn oghwa lele ọrhẹ ọrọ bọn oghwa. Ọwena na yọ ha ona ra na bọn oghwa na phia; ohworho rọ ten ona oghwa ẹbọn nọ yọ ha oborẹ o sin phia na ruiruo.

Ọye yẹ Ẹmro na. Baibol na ọrhọ ta kpahen akpenyerẹn i Jesu o ki rhiẹ onyakpọ, no se i Jesu “Ẹmro na.” (John 1:1) Omarana, ọnana o mevirhọ taghene Osolobrugwẹ ọ ha Ọmọyen dje iyẹnrẹn ọrhẹ ọkpọvi vwe emakashe erọrọ.

Jesu ọ ji wian jerẹ Ọtẹmro Osolobrugwẹ rẹn ituakpọ uvuẹn akpọ na. Ọkezẹko Osolobrugwẹ ọ nyoma i Jesu ro rhiẹ Ẹmro na ha ọkpọvi rẹn Adam ọrhẹ Eve uvuẹn ogba Eden. (Genesis 2:16, 17) Ọkezẹko i Jesu yẹ ọmakashe ro suẹn agbamwa Israel ọke ahwanren uvuẹn ato na, ro rhiẹ ohworho emọ Israel ina huvwele yi.—Exodus 23:20-23.a