Mi Guọlọ Hwu—Baibol na Ọnọ Sabu ha Userhumu mẹ mi Rhe Vwo Iroro mi ne Kpe Omamẹ?

Ẹkpahenrhọ i Baibol na

Ee! “Osolobrugwẹ rọ ha urhebro rẹn ihworho rẹ ẹhẹn aye o seriotọre,” yọ yẹrẹ ọwan i Baibol na. (2 Corinthians 7:6) Dedevwo Baibol na orhiẹ ọbe ro sekpahen iroro onyakpọ-ọ, ọrẹn, ọ ha userhumu rẹn ihworho buebun kẹnoma rẹn ẹhẹn aye ine kpe oma aye ne. Ọnọ ji sabu ha userhumu wẹn.

• Urhebro i Baibol ego ye wu na sabu ha ruiruo?

• Baibol na ọ ta rẹn ọwan kpahen ihworho ri vwo ẹhẹn rẹ aye ine hwu?

• Eghwẹmro ego uvuẹn i Baibol na yi na sabu ha userhumu wẹn kẹnoma rẹn iroro wu ne kpe oma?

• Me wu ne ruo, ugbehian ọnọ ọrhọ ta wẹn taghene, “Mi guọlọ hwu”?

• Me mi ne ruo, orhianẹ mi vwo ẹhẹn mi ne kpe oma mẹ ọke rọ vrẹnren?

Urhebro i Baibol ego ye wu na sabu ha ruiruo?

• ● Ta rẹn awọrọ kpahen oborẹ we roro.

  Oborẹ i Baibol na ọ tare: “Obọdẹn ugbehian o dje ẹguọlọ phia ọke ephian, ọye jeghwai omizu re vwiẹre uvuẹn ọke ebẹnbẹn.”—Proverbs 17:17.

  Oborẹ o mevirhọ: Ọwan i guọlọ userhumu awọrọ orhianẹ ẹhẹn ọwan o seriotọre.

  Wa rha ta rẹn awọrọ kpahen oborẹ we roro-o, iroro enọ ina sabu kpo fughwẹ. Ọrẹn wu rha ta rẹn aye kpahiẹn, ọnọ lẹrhẹ aye rhe kpahen erhirhiẹ na jeghwai guọlọ oborẹ aye ine ru hobọtua.

  

  Damu ọnana: Ta rẹn ohworho kpahiẹn inyenana, ọkezẹko ohworho ekrun ọnọ yanghene ugbehian wu hẹroso.a Wu na ji sabu ya oborẹ we roro rhotọre.

• ● Ya mẹrẹn idọkitọ.

  Oborẹ i Baibol na ọ tare: “Ihworho ri vwo omọkpokpọ a guọlọ ohworho ro no simi aye-e, ọrẹn, ihworho re kpomẹ yi guọleriẹ.”—Matthew 9:12.

  Oborẹ o mevirhọ: O fori na ya mẹrẹn idọkitọ erhe kpomẹ.

  Iroro re ne kpe oma ọwan ọnọ sabu homaphia fọkiẹ emiamo rọ hobọte iroro yanghene aphẹrhiẹn na. O fo nẹ ofa ọ ruẹ ọwan ra na ta taghene e vwo emiamo ọnana-a. Ana sabu simi emiamo rọ hobọte iroro ọrhẹ aphẹrhiẹn na.

  Damu ọnana: Ya mẹrẹn idọkitọ ro mwuovwan nọ ha userhumu wẹn ogege.

• ● Karorhọ taghene Osolobrugwẹ o vwo ọdamẹ kpahuọn.

  Oborẹ i Baibol na ọ tare: “A rhẹ ighwe isionrin uchunu isele eva ri vwe fiemru, rhomaran? Ọrẹn o vwo owu usuẹn aye rọ sẹrẹ Osolobrugwẹ ẹro-o. . . . Are i vwa zofẹ-ẹn, are i ghanren ghwẹ ighwe buebun.”—Luke 12:6, 7.

  Oborẹ o mevirhọ: Wu ghanranren rẹn Osolobrugwẹ.

  Wu na sabu rhe roro taghene wẹwẹ ọvo yi havwiẹ, ọrẹn Osolobrugwẹ o rhe oborẹ wa dẹrughwaroghwẹ. O vwo ọdamẹ kpahuọn, ọrhọ tobọ rhianẹ we roro taghene orho fo ne wu nyerẹn ghwomara-an. Psalm 51:17 ọ tare taghene “ẹhẹn ro seriotọre rọ ghwọghọre, O Osolobrugwẹ, wu tiẹ-ẹn”. Osolobrugwẹ ọ guọlọre taghene wu nyerẹn fọkime o vwo ẹguọlọ kpahuọn.

  Damu ọnana: Dabu vwo oniso kpahen iroro ri djephia taghene Osolobrugwẹ o vwo ẹguọlọ kpahuọn. Jerẹ udje, wu na sabu se urhomu-ẹmro ọresa uvuẹn ọbe na Me yi Baibol na Ọnọ Sabu Yono Ọwan?

• ● Nẹrhomo vwe Osolobrugwẹ.

  Oborẹ i Baibol na ọ tare: “Are i ha ọfiamu are ephian dọn yen, fọkime ọ hẹrote are.”—1 Peter 5:7.

  Oborẹ o mevirhọ: Osolobrugwẹ ọ ha use wẹn ne wu ta riẹn kpahen kemru kemru rọ ha uvuẹn ẹhẹn ọnọ.

  Osolobrugwẹ ọnọ sabu yọ ufuoma ọrẹ ẹhẹn ọrhẹ omẹgbanhon wu na sabu din erhirhiẹ na. (Philippians 4:6, 7, 13) Nyoma izede ọnana, ọ hẹrote ihworho ra nẹrhomo vwe yi ri hẹrosuiẹ.—Psalm 55:22.

  

  Damu ọnana: Nẹrhomo vwe Osolobrugwẹ inyenana. Se odẹ ye, Jehova, jeghwai ta riẹn oborẹ ọ ha ẹhọn. (Psalm 83:18) Ta riẹn nọ yọ omẹgbanhon wu na sabu ha din erhirhiẹ na.

• ●Roro kpahen oborẹ i Baibol na ọ ta kpahen obaro na.

  Oborẹ i Baibol na ọ tare: “Ọwan i vwo ifiẹrorhọ ọnana, rọ họhọ ọtan harẹn arhọ ọwan, ro mwẹro jeghwai gbanhon.”—Hebrews 6:19, ekete ra djokarhọ.

  Oborẹ o mevirhọ: Iroro ọnọ ọnọ sabu rhe wene ọgbọ buebun jerẹ ọkuna rẹ ogiribo o zuẹ sa zuẹ rie, ọrẹn ifiẹrorhọ rọ ha uvuẹn i Baibol na ọnọ sabu lẹrhuọ mevigbanhon.

  Ifiẹrorhọ ọnana orhiẹ imwẹro ghemeghe-e, ọrẹn a bọnriẹn kpahen ive Osolobrugwẹ ro no tiẹ oborẹ ọ suẹ emiamiamo ọwan nie.—Revelation 21:4.

  Damu ọnana: Yono riarorhọ kpahen oborẹ i Baibol na o yonorin kpahen obaro na, uvuẹn urhomu-ẹmro 5 uvuẹn ibroshọ na Iyẹnrẹn Esiri ro nẹ Obẹ Osolobrugwẹ Rhe!

• ● Ru oborẹ ọ merhuọn oma.

  Oborẹ i Baibol na ọ tare: “Ọmudu rọ ghọghọ omamọ umwu.”—Proverbs 17:22.

  Oborẹ o mevirhọ: Ọwan erhe vwobọrhọ oborẹ ọ yẹ ọwan aghọghọ, nọ ha userhumu rẹn ọwan vwo iroro ọrhẹ aphẹrhiẹn rọ gbare.

  

  Damu ọnana: Ru oborẹ ọ merhuọn oma omamọ. Jerẹ udje, kerhọ ijoro rọ lẹrhẹ ẹhọn sasa, se ẹbe ra yọ uduẹharhaghwẹ, ọrhẹ ekwakwa erọrọ. Wu na sabu mẹrẹn omamerhomẹ rhọ, orhianẹ wu ha userhumu rẹn awọrọ izede ri kamurun dede.—Acts 20:35.

• ● Rha hẹrote omọkpokpọ ọnọ.

  Oborẹ i Baibol na ọ tare: “Omẹsasa oborẹ orhomurun.”—1 Timothy 4:8.

  Oborẹ o mevirhọ: Ọwan a mẹrẹn erere ọke ra sasoma, ọke ra dabu merhẹn jeghwai riẹ omamọ emaren.

  Damu ọnana: Ya sasoma nyoma onya omẹ iminiti 15.

• ● Karorhọ taghene iroro ọrhẹ ekwakwa erọrọ uvuẹn akpenyerẹn a sabu wene.

  Oborẹ i Baibol na ọ tare: “Are e rhe oborẹ akpọ are ono rhirhiẹ odẹ rọ sa na-a.”—James 4:14.

  Oborẹ o mevirhọ: Ebẹnbẹn ri tobọ gbanhon omamọ, ru we roro taghene o vwo oborẹ ana sabu ru kpahe-en, i vwe jirẹ aye e ki nie-e.

  O vwo oborẹ erhirhiẹ ọnọ ọ gbanhon te-e, ọnọ sabu wene orho ru, ọrẹn wu rhe kpe oma wu sabu wene erhirhiẹ na-a. Omarana, guọlọ oborẹ wu ne ru sabu din ebẹnbẹn na. (2 Corinthians 4:8) Erhirhiẹ na ọnọ sabu wene orho ru, ọrẹn wu rhe kpe oma wu sabu wenie-e.

  Damu ọnana: Se iyẹnrẹn i Baibol ri sekpahen ihworho ẹhẹn aye o seriotọre ri guọlọ hwu dede, ne wu mẹrẹn oborẹ akpenyerẹn aye o ru rhomurhọ izede aye e vwe roro rhọ, roro kpahen idje ezẹko. Roro kpahen idje ezẹko.

Baibol na ọ ta rẹn ọwan kpahen ihworho ri vwo ẹhẹn aye ine hwu?

Ee. Baibol na ọ ta rẹn ọwan kpahen ihworho ezẹko, ri tare, “Mi guọlọ hwu.” Osolobrugwẹ ọ ghwọghwu aye-e, ukpomaran nọ ha userhumu rẹn aye. Ọnọ sabu ha userhumu wẹn dede.

Elijah

• ● Ọrọmo yẹ Elijah? Ọye ọmẹraro ro vwo uduefigbere. Ọrẹn, o ji vwo ọke rẹ ẹhẹn yen o seriotọre. James 5:17 ọ tare taghene, “Elijah ọhworhare ro vwo iroro ri họhọ erẹ ọwan.”

• ● Mesoriẹ o vwo ẹhẹn ro no hwu? Uvwrọke owu, Elijah no roro taghene ọye ọvo yọ havwiẹ, ofẹn no mwuie, no ji roro taghene o fiemru-u. Omarana nọ rẹ: “Jehova, ha arhọ mẹ.”—1 Kings 19:4.

• ● Me yọ sariẹ erhumu? Elijah nọ ta rẹn Osolobrugwẹ oborẹ o roro. Marhẹ Osolobrugwẹ o ru ha udu rhọye aghwẹ? Osolobrugwẹ nọ lẹrheriẹ rhe taghene o vwo ọdamẹ kpahiẹn, o ji dje omẹgbanhon ọnẹyen riẹn. Ọ yẹ Elijah imwẹro na taghene ọghanranren ha riẹn, nọ ji yẹ ye ohworho rọ nọ hẹrote yi jeghwai sa ye erhumu.

• ▸ Se kpahen Elijah: 1 Kings 19:2-18.

Job

• ● Ọrọmo yi Job? Ọye ọdafe ro vwo ekrun ọduado, ọye ọhworhare rọ fuevwan ga Osolobrugwẹ.

• ● Mesoriẹ o vwo ẹhẹn ro no hwu? Job o rhiẹromẹrẹn ekwakwa ibiobiomu ro vwo fiẹrorhọ. Ọsoso enyerẹn yen i variẹ obọ. Emọyen ephian ni hwuru. Emiamo ọgbogbanhon no mwurien. Obẹtaye, na ta riẹn taghene ọye yọ soriẹ ebẹnbẹn na a homaphia riẹn. Job nọ tare: “Mi vwo utuoma kpahen arhọ mẹ; mia guọlọ nyerẹn ghwomara-an.”—Job 7:16.

• ● Me yọ sariẹ erhumu? Job ọ nẹrhomo vwe Osolobrugwẹ, jeghwai ta rẹn awọrọ kpahen ebẹnbẹn na. (Job 10:1-3) Elihu ro rhiẹ obọdẹn ugbehian yen nọ ha udu rhọye aghwẹ, ji sa ye erhumu roro kpahen erhirhiẹ na izede ro serhọ. Obẹtaye, Job no rhiabọ dede urhebro ọrhẹ userhumu Osolobrugwẹ ọ yẹriẹ.

• ▸ Se kpahen i Job: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moses

• ● Ọrọmo yi Moses? Ọye yo suẹn agbamwa Israel ọke ahwanren, ọye ji ọmẹraro rọ fuevwan.

• ● Mesoriẹ o vwo ẹhẹn ro no hwu? Moses o vwo owian ọgbogbanhon, a ji kparehasuiẹ omamọ, nọ lẹrhẹ oma ghwọghiẹ. Omarana, nọ viẹ phia rẹn Osolobrugwẹ: “Biko kpe mẹ hwu ogege.”—Numbers 11:11, 15.

• ● Me yọ sariẹ erhumu? Moses ọ ta rẹn Osolobrugwẹ kpahen oborẹ o roro. Osolobrugwẹ ọ sa i Moses erhumu ruẹ ewian yen lọhọ, neneyo oma ọ jọ rhọ ghwọghiẹ.

• ▸ Se kpahen i Moses: Numbers 11:4-6, 10-17.