UYONO 13
Oborẹ Ẹga Efian o ru Biomu Odẹ Osolobrugwẹ
Osolobrugwẹ yẹ ẹguọlọ. Ọrẹn, ẹga buebun re djephia taghene aye a ga Osolobrugwẹ, e vwobọrhọ irueruo ri sọre. Itiọrurhomẹmro, enana ẹga efian; aye e dje Osolobrugwẹ rhẹ oborẹ ọ vwọ havwọ. Marhẹ aye e ru biomu odẹ ye? Marhẹ oma o ru Osolobrugwẹ kpahiẹn? Me yo no ru kpahiẹn?
1. Marhẹ iyono ẹga efian o ru dje Osolobrugwẹ rhẹ oborẹ ọ vwọ havwọ?
Ẹga efian “i ha efian wene urhomẹmro ọrẹ Osolobrugwẹ.” (Romans 1:25) Jerẹ udje, ẹga buebun i vwe yono ihworho aye odẹ Osolobrugwẹ-ẹ. Ọrẹn, Baibol na ọ tare taghene ana vi ha odẹ Osolobrugwẹ ruiruo. (Romans 10:13, 14) Ilori ẹga ezẹko a ta taghene emru obiobiomu ọrhọ phia, ọhọre Osolobrugwẹ. Ọrẹn, ọrana ofian. Orhiẹ Osolobrugwẹ yọ suẹ ekwakwa ibiobiomu ra phia-a. (Se James 1:13.) Ọrẹ omemwurhọ, ẹga efian a lẹrhẹ ihworho je vwo ẹguọlọ kpahen Osolobrugwẹ.
2. Marhẹ irueruo ẹga efian o ru dje Osolobrugwẹ rhẹ oborẹ ọ vwọ havwọ?
Ẹga efian i vwe dje ọdamẹ rẹn ihworho jerẹ oborẹ i Jehova o ruẹ-ẹ. Baibol na ọ tare taghene edandan ẹga efian “i bunrun omamọ ne, aye i tobọ te odjuwu ne.” (Revelation 18:5) Ẹgbukpe buebun ne yẹ ẹga efian e vwobọrhọ usuon oseghe, hobọtua ivweri, jeghwai suẹ uhwu ro kpe ihworho buebun, yanghene kwe ne vi kpe ihworho. Ilori ẹga ezẹko e nyerakpọ gegerege, aye a ji nekpẹn igho mie ere riẹ ẹga aye. Irueruo enana i djephia taghene aye e rhe Osolobrugwẹ-ẹ, omarana, aye i sabu djephia taghene aye a ha ẹga riẹ-ẹn.—Se 1 John 4:8.
3. Ukẹro ọgo yẹ Osolobrugwẹ ọ ha ni ẹga efian?
Orhianẹ oborẹ ẹga efian e ruẹ ọ lẹrhuọ tuekwẹre, ukẹro ọgo wu rorori taghene i Jehova ọ ha nie? Jehova o vwo ẹguọlọ kpahen ihworho, ọrẹn, ọ tuekwẹre kpahen ilori ẹga efian re dje yi rhẹ oborẹ ọ vwọ havwọ, re ji ruẹ ere riẹ ẹga aye gbalogbalo. O veri taghene ẹga efian ono notọre phẹlẹphẹlẹ, “a vwa samọ mẹriẹn ghwomara-an.” (Revelation 18:21) Phẹrẹkpẹ, Osolobrugwẹ ọnọ ghwọghọ ẹga efian ephian.—Revelation 18:8.
YONO KODO RHỌ
Yono riarorhọ kpahen ukẹro Osolobrugwẹ ọ ha ni ẹga efian. Yono riarorhọ kpahen oborẹ ẹga efian i ru ne, habaye, yono oborẹ ọsoriẹ o fo no jo rho lo eyono kpahen i Jehova.
4. Osolobrugwẹ o vwo ekwerhọ kpahen ẹga ephia-an
Ihworho buebun i vwo imwẹro na taghene ẹga ọ họhọ izede sansan, re suẹn ihworho vwe Osolobrugwẹ. Ọrẹn, ọrana urhomẹmro? Se Matthew 7:13, 14, orho ru, are i gba kpahenrhọ onọ ọnana:
Me yi Baibol na ọ ta kpahen izede ro suẹn riẹ arhọ?
Kporo IVIDIO na, orho ru, are i gba kpahenrhọ onọ ọnana.
Baibol na ọ tare taghene ẹga buebun ye ruẹ oborẹ ọ merhen Osolobrugwẹ oma?
5. Ẹga efian o vwo dje ẹguọlọ Osolobrugwẹ phia-a
O vwo izede buebun rẹ ẹga efian o dje Osolobrugwẹ rhẹ oborẹ ọ vwọ havwọ. Izede owu ro biomurun omamọ yẹ ọrẹ aye e vwobọrhọ uvweri. Ne wu mẹrẹn udje owu, kporo IVIDIO na. Orho ru, are i gba kpahenrhọ enọ enana.
Marhẹ ishọshi buebun i ru vwobọrhọ Uvweri Akpọ Ephian Ọreva?
Ukẹro ọgo wu ha ni oborẹ aye i ruru na?
Se John 13:34, 35 ọrhẹ 17:16. Orho ru, are i gba kpahenrhọ enọ enana:
Marhẹ oma o ruẹ i Jehova ọke ẹga e vwobọrhọ uvweri?
Ẹga efian ya suẹ ekwakwa ibiobiomu buebun ra phia. Izede ego wu mẹrẹn ne rẹ ẹga efian e vwe dje ẹguọlọ Osolobrugwẹ phia?
Ẹga efian i vwe dje ẹguọlọ Osolobrugwẹ phia-a
6. Osolobrugwẹ ọ guọlọ ha userhumu rẹn ihworho nẹ aye i tiomanẹ ẹga efian
Se Revelation 18:4,a orho ru, are i gba kpahenrhọ onọ ọnana:
Marhẹ oma o ruo ru we rhe taghene Osolobrugwẹ ọ guọlọ ha userhumu rẹn ihworho rẹ ẹga efian o sun beghe?
7. Rhe yono kpahen Osolobrugwẹ urhomẹmro na
O fori nẹ irueruo ẹga efian ọ hobọte ukẹro wa ha ni Osolobrugwẹ? Roro kpahen idama rọ ten ọkpọvi ẹghwanren rẹ ọsẹ ye ọ yẹ riẹ. Idama na nọ kwa nẹ oghwa, jeghwai ye vwobọrhọ irueruo ri sọre. Oma ọ vwọ merhen ọsẹ na kpahen idjaghwẹ ọmọyen ọ kparare-e. Mesoriẹ ovwo fo ne kperi ọsẹ na fọkiẹ enyerakpọ ọmọyen?
Ọgbare re ne kperi Jehova, ji dobọ oborẹ e yono kpahiẹn ji fọkiẹ irueruo ẹga efian?
OBORẸ IHWORHO EZẸKO A TA: “Mie vwo omamerhomẹ kpahen Osolobrugwẹ-ẹ, fọkime ẹga ya suẹ ebẹnbẹn buebun ri havwiẹ.”
Omaran we ji rorie?
Mesoriẹ o vwo fo na lẹrhẹ irueruo ẹga efian hobọte ẹga ra na ha rẹn i Jehova?
ME WU YONORIN?
Ẹga efian o dje Osolobrugwẹ rhẹ oborẹ ọ vwọ havwọ nyoma iyono ọrhẹ irueruo esọsọ aye. Osolobrugwẹ ọnọ ghwọghọ ẹga efian.
Ẹzẹkoko
Me wu rorori kpahen oborẹ ẹga efian e yono ọrhẹ oborẹ aye e vwobọrhọ?
Ukẹro ọgo Osolobrugwẹ ọ ha ni ẹga efian?
Me yẹ Osolobrugwẹ ono ru ẹga efian?
GUỌLỌ IYẸNRẸN ERỌRỌ
Yono kpahen izede eva rẹ ẹga buebun a lẹrhẹ Osolobrugwẹ tuekwẹre.
“Ẹga Ephian Owu? Aye Ephian ye Suẹn Ohworho Bru Osolobrugwẹ?” (Urhomu-ẹmro rọ ha uvuẹn itanẹti)
Mesoriẹ i Jehova ọ guọlọ ne kwomakugbe awọrọ ha ẹga riẹn?
“O Fori na Homaba Ukoko Ẹga Owu?” (Urhomu-ẹmro rọ ha uvuẹn itanẹti)
Orherẹn owu o brudu kpahen ẹga ye, ọrẹn, ọnana ọ lẹrhiẹ je yono urhomẹmro na kpahen Osolobrugwẹ-ẹ.
“Oborẹ Ọsoriẹ Orherẹn Owu o nẹ Ishọshi Ọnẹyen” (Awake!, February 2015)
Ẹgbukpe buebun ne yẹ ẹga efian a mọrenfian baren Osolobrugwẹ, rọ lẹrhẹ ihworho roro taghene ọye ọvwọkon. Yono urhomẹmro na kpahen efian esa usuẹn aye.
“Efian re Dje Osolobrugwẹ Jerẹ Ohworho ro Vwo Vwo Eguọlọ” (Oghwa Odẹrẹ, November 1, 2013)
a Ne wu sabu rhe oborẹ ọsoriẹ ọbe i Revelation o dje ẹga efian jerẹ ọmase re se i Babylon Rode, se Iyẹnrẹn ra habaye 1.