Ileta Ro Nẹ Obẹ Ugboma Usuon na rhe

“Are i fo ihworho ri ne rhiẹ iyono ne.” (Heb. 5:12) Rorie! Jehovah—ro rhiẹ Oyono Rode na ọ ha use rẹn ọwan ne yono awọrọ kpahiẹn. Ghini uphẹn ọduado re ne yono awọrọ urhomẹmro na kpahen i Jehova uvuẹn ekrun ọwan, ukoko na, yanghene uvuẹn aghwoghwo, omarana no fori na ha ukẹro ọghoghanren ni kowian kowian ri Jehova ọ yẹre ọwan. Marhẹ ene ru fikparobọ?

Ana sabu mẹrẹn ẹkpahenrhọ na uvuẹn ileta rẹ ọnyikọ Paul ọ ya vwe i Timothy, rọ ta: “Rhe fioma rhẹ isese afiede, rha ha urhebro phia, jeghwai rhe yono.” Paul nọ habaye: Fọkime “nyoma enana, wu ne simi oma ọrhẹ ihworho ri kerhọ owẹwẹ.” (1 Tim. 4:​13, 16) Are i vwo owian rẹ are ine ghwoghwo urhomu rọ nọ sabu simi arhọ ihworho. Omarana, o fori nẹ are i rha wian kpahen isese ọrhẹ uyono are rhọ. Ibroshọ ọnana ọnọ ha userhunu rẹn are ru ọnana. Jenẹ a tẹmro kpahen ekwakwa ezẹko uvuien.

Ekete i Baibol ri rhiẹ iruemru-urhi re ha aruọbe owuowu o surhobọmwu ihwẹnmro ri ha ekete we se na yanghene udje rọ tẹmro kpahen oborẹ wa guọlọ ha ruiruo

Jehova yẹ Oyono Rode na. (Isa. 30:20) Dedevwo ibroshọ ọnana ọnọ ha userhumu wẹn tẹn ona isese ọrhẹ uyono, ọrẹn rha karhorhọ taghene i Jehova yẹ Esiri urhomu re ghwoghwo na, habaye o ji tiẹ ihworho kẹrẹ oma. (John 6:44) Omarana, nẹrhomo nọ yọ ẹhẹn ọfuanfon na ọke ephian. Rha ha i Baibol na ruiruo vuọnvuọn. Tẹnrovi Jehova, o vwo rhiẹ oma ọnọ-ọ. Damoma ne wu ha userhumu rẹn ihworho ra kerhọ vwo ẹguọlọ okokodo kpahen i Jehova.

A ha use wẹn ne wu yono ituakpọ urhumu rọ mai ghanren. O mwurun ame ẹro taghene are i rha hẹroso omẹgbanhon rẹ Osolobrugwẹ o tiobọnẹ, are ine fikparobọ.—1 Pet. 4:11.

Ame iyono jerẹ are,

Ugboma Usuon ọrẹ Iseri Jehova