UYONO 26

Mesoriẹ Oborẹ Obiomurun ọ Phia, Mesoriẹ Ihworho a Rioja?

Ọre Fomẹ Phia

Emru obiobiomu ọrhọ phia, ihworho buebun na ta, “Mesoriẹ ọnana ọ phia?” Ọmerhoma re rhe taghene i Baibol na ọ kpahenrhọ onọ ọrana!

1. Me yẹ Echu o ruru rọ lẹrhẹ ọkon tonrhọ uvuẹn akpọ na?

Echu ro rhiẹ i Dẹbolo na, ọ kparehaso Osolobrugwẹ. Echu ọ guọlọ sun awọrọ, omarana, nọ ha ọdo rhurhu ituakpọ erukaro na, nọyẹ, Adam ọrhẹ Eve, aye ni kwomakugbe yi kparehaso Osolobrugwẹ. Echu o ruẹ ọnana nyoma rọ phiẹ Eve rhọ. (Genesis 3:1-5) Nọ lẹrhẹ Eve roro taghene o vwo emru orhorhomu ri Jehova o ti nu hariẹn. Nọ haye ta taghene oma ọnọ dabu merhen ituakpọ orhianẹ aye i vwa huvwele Osolobrugwẹ-ẹ. Echu ọ mọronfian ọrukaro nyoma rọ ta rẹn Eve taghene o hwuẹ-ẹ. Omarana, Baibol na no se Echu “ọmọrenfian ọrhẹ ọsẹ efian.”—John 8:44.

2. Me yẹ Adam ọrhẹ Eve i brorhiẹn yen?

Jehova o tiobọnu ghwologhwolo rẹn Adam ọrhẹ Eve. Ọ ta rẹn aye taghene aye ina sabu re nẹ ọsoso erhan ri ha uvuẹn ogba Eden, jokpanẹ owu ọvo. (Genesis 2:15-17) Ọrẹn, aye ni brorhiẹn rẹ aye ina re nẹ orhan ọrana. Eve “nọ kọrọ omamọ orhan na, nọ re riẹ.” Ọke oru, Adam “nọ ji riẹ.” (Genesis 3:6) Aye ni tiẹn uvwele Osolobrugwẹ. Fọkime Adam ọrhẹ Eve ihworho ri gbare, orhiẹ oborẹ ọ bẹnren rẹ aye ine ruẹ oborẹ ọgbare-e. Ọrẹn, aye ni ha arudo tiẹn uvwele Osolobrugwẹ, aye ni ruẹ ọdandan jeghwai tiẹn usuon ọnẹyen. Orhienbro ọrana, nọ lẹrherẹ aye rioja omamọ.—Genesis 3:16-19.

3. Marhẹ orhienbro Adam ọrhẹ Eve o ru hobọte ọwan?

Ọke Adam ọrhẹ Eve e ruẹ ọdandan, aye ni rhiẹ ihworho ri vwa gba, omarana, emọ aye ni ha ọdandan riuku mie aye. Sekpahen Adam, Baibol na nọ tare: “Nyoma ọhworhare owu yẹ ọdandan ọ ruẹ akpọ na, uhwu no nẹ ọdandan rhe, omarana, uhwu no kerabọ lele ituakpọ ephian.”—Romans 5:12.

O vwo ekwakwa buebun ra lẹrhẹ ọwan rioja. Ana sabu rioja fọkiẹ orhienbro ọsọsọ re bruru. Ọkezẹko, a rioja fọkiẹ orhienbro ọsọsọ rẹ awọrọ i bruru. A ji rioja ọkezẹko arha ha uvuẹn ekete uvuẹn ọke ro vwo serhọ.—Se Ecclesiastes 9:11.

YONO KODO RHỌ

Yono kpahen oborẹ ọsoriẹ o vwo fo ne kperi Osolobrugwẹ fọkiẹ ọkon ọrhẹ ojẹriọ rọ ha uvuẹn akpọ na inyenana, ọrhẹ oborẹ oma o ruie ọke ra rioja.

4. Ohworho rọ lẹrhẹ ọwan rioja

Ihworho buebun i vwo imwẹro na taghene Osolobrugwẹ yo suẹn ọsoso akpọ na. Ọrẹn, ọrana urhomẹmro? Kporo IVIDIO na.

IVIDIO: Ọrọmo yo Suẹn Akpọ na? (1:24)

Se James 1:13 ọrhẹ 1 John 5:19, orho ru, are i gba kpahenrhọ onọ ọnana:

Osolobrugwẹ yọ suẹ ọkon ọrhẹ ojẹriọ?

5. Oborẹ usuon Echu ọ haphia ne

Kporo IVIDIO na.

IVIDIO: Mesoriẹ Osolobrugwẹ Ọ Ha Uphẹn Rẹn Ojẹriọ?—Ekete ezẹko vwọye (3:07)

Se Genesis 3:1-6, orho ru, are i gba kpahenrhọ enọ enana:

Ofian ọgo yẹ Echu ọ mọrọnren?—Se eghwẹmro ọrẹ 4 ọrhẹ 5.
Me yẹ Echu ọ haye ta, ọke rọ ta taghene Osolobrugwẹ o tiẹ ekwakwa irhorhomu nuẹ rẹn ituakpọ?
Lele oborẹ Echu ọ tare, ituakpọ i guọlọ i Jehova no rhiẹ Osuinsuensun aye nẹ oma ọ ki merhen aye?

Se Ecclesiastes 8:9, orho ru, are i gba kpahenrhọ onọ ọnana:

Avwọke i Jehova o vwo rhiẹ Osuinsuensun ọrẹ akpọ na, me yọ phia ne?

Ifoto: Ifoto re dje oborẹ akpọ na ọ havwọ nẹ ọke emama ye te oborẹ ono rhirhiẹ uvuẹn i Paradais obaro na. A. Paradais rọ ha uvuẹn otọrakpọ na rọ vuọnren rhẹ ewawọ. B. Usuon ituakpọ ẹgbukpe buebun ne, rọ vuọnren rhẹ ẹga efian, otighri, uvweri, ọrhẹ akpọ na re biomurun. Ifoto igọmẹti akpọ ezẹko ri vwo omẹgbanhon jerẹ Egypt, China, Greece, Rome, Great Britain, ọrhẹ United States. C. Ihworho re rhirhiẹ i Paradais ro no rhirhiẹ otọrakpọ na obaro na.

Adam ọrhẹ Eve ihworho ri gbare re rhirhiẹ uvuẹn i Paradais. Ọrẹn, aye ni kerhọ Echu, jeghwai kparehaso i Jehova
Ọke ẹkparehaso ọrana ọ phia hin, akpọ na nọ vuọnren rhẹ ọdandan, ojẹriọ, ọrhẹ uhwu
Jehova ono fiobarhọ ọdandan, ojẹriọ ọrhẹ uhwu. Ọgbọrọrọ, ituakpọ ine rhiẹ ihworho ri gbare ri ne rhirhiẹ i Paradais

6. Jehova ono ru emru kpahen ojẹriọ ọwan

Jehova ọ damerhọ ọwan ọke ra rioja? Roro kpahen oborẹ Orodje David ọrhẹ ọnyikọ Peter i yare. Se Psalm 31:7 ọrhẹ 1 Peter 5:7, orho ru, are i gba kpahenrhọ onọ ọnana:

Marhẹ oma o ruo ru we rhe taghene i Jehova ọ mẹrẹn ojẹriọ ọwan, ono ji ru emru kpahiẹn?

7. Osolobrugwẹ ono fiobarhọ ọsoso ojẹriọ ituakpọ

Se Isaiah 65:17 ọrhẹ Revelation 21:3, 4, orho ru, are i gba kpahenrhọ onọ ọnana:

Mesoriẹ oma ọ merhuọn taghene i Jehova, ono ti ọsoso ekwakwa ibiobiomu rẹ ituakpọ e rhiẹromẹrẹn nie?

Wu rheri?

Ọke Echu ọ mọronfian ọrukaro na, nọ rhaphiẹ i Jehova. Nọyẹ, o biomu omamọ odẹ i Jehova taghene ọye orhiẹ omamọ Osuinsuensun ro vwo ẹguọlọ-ọ. Jehova orho ti ọsoso ojẹriọ ituakpọ nie obaro na, orho vwo oborẹ ono biomu odẹ ye-e. Ne dje yi izede ọrọrọ, Jehova ono djephia taghene usuon ọnẹyen yọ mai rhomu kparobọ. Odẹ i Jehova re ne ru fon, yẹ oborẹ ọ mai ghanren obẹ odjuwu ọrhẹ otọrakpọ na.—Matthew 6:9, 10.

OBORẸ IHWORHO EZẸKO A TA: “Ojẹriọ ọ ha usuẹn ọhọre Osolobrugwẹ harẹn ọwan.”