UYONO 05
Baibol na Iyẹnrẹn rẹ Osolobrugwẹ ọ Yẹrẹ Ọwan
Baibol na obọdẹn ẹghẹlẹ ri Jehova o tiobọnu rẹn ọwan, ovwo ẹbe ekokamu 66 uvuien. Ọrẹn, wu na sabu rhe roro: ‘Marhẹ i Baibol na o ru te ọwan obọ? Ọrọmo yo vworie?’ Na kpahenrhọ enọ enana, jene yono kpahen oborẹ iyẹnrẹn Osolobrugwẹ rọ ha uvuẹn i Baibol na o ru te ọwan obọ.
1. Rẹ ituakpọ a ya i Baibol na, marhẹ o ru rhiẹ ọrẹ Osolobrugwẹ?
Ihworho awan 40 yi ya i Baibol na, uvwre ẹgbukpe 1,600, nẹ ẹgbukpe 1513 B.C.E. ye te uvwre ẹgbukpe 98 C.E. Eri ya i Baibol na i nẹ ekete sansan rhe. Udabọ ọrana, iyẹnrẹn ri ha uvuẹn i Baibol na, a kparehaso owuowuọwa-an. Marhẹ o ru rhiẹ omaran? Fọkime Osolobrugwẹ yo vwo i Baibol na. (Se 1 Thessalonians 2:13.) Eri ya i Baibol na, a ya ẹmro aye rhotọre-e. Ukpomaran, aye i “tẹmro ro nẹ obẹ Osolobrugwẹ rhe ọke ẹhẹn ọfuanfon na ọ ha aye ruiruo.”a (2 Peter 1:21) Osolobrugwẹ ọ ha ẹhẹn ọfuanfon ọnẹyen mwu ehworhare ya ẹmro enẹyen rhotọre.—2 Timothy 3:16.
2. Ihworho ephian ina sabu mẹrẹn erere nẹ i Baibol na?
“Egbamwa na, ọrhẹ uvwiẹ, edjadjẹ, kugbe ihworho ephian” ina sabu mẹrẹn erere nẹ iyẹnrẹn esiri ri ha uvuẹn i Baibol na. (Se Revelation 14:6.) Osolobrugwẹ o rurie ne vwo i Baibol na uvuẹn edjadjẹ buebun ghwẹ ẹbe erọrọ inyenana. Joma ihworho ephian inyenana yi vwo uphẹn rẹ aye ine se i Baibol na. Omarana, aye ina sabu vwo yi udabọ ekete aye e rhirhiẹ yanghene edjadjẹ rẹ aye a djẹ.
3. Imwofẹn ego yi Baibol na ọ mẹrẹnren, marhẹ i Jehova o ru sẹroriẹ?
A ya i Baibol na rhẹ ekwakwa ra vwa tọ jijiri, jerẹ ophiẹn ọrhẹ ọbe re ru nẹ owawọ re se papyrus. Ọrẹn, ehworhare ri vwo ẹguọlọ kpahen i Baibol na ni jomarhotọre ha obọ ya ye rhẹ ẹbe erọrọ. Dedevwo ere suẹn ọrhẹ ilori ẹga i damoma rẹ aye ina ghwọghọ i Baibol na, ihworho ezẹko i fi arhọ aye rhẹ erhirhiẹ imwofẹn na sabu sẹroriẹ. Jehova o kwe nẹ ohworho yanghene emru owuorowu ọ da ye obọ ji nọ jọ tẹmro rẹn ọwa-an. Baibol na ọrhọ ta: “Ẹmro Osolobrugwẹ ọwan ono rhirhiẹ ye bẹmẹdẹ.”—Isaiah 40:8.
YONO KODO RHỌ
Yono kpahen oborẹ Osolobrugwẹ o ru mwu ehworhare ya i Baibol na, oborẹ o ru sẹroriẹ, ọrhẹ oborẹ o rurie lele nọ sabu te ituakpọ obọ.
4. Baibol na ọ ta rẹn ọwan kpahen Ohworho ro vworie
Kporo IVIDIO na. Orho ru, gbe se 2 Timothy 3:16, nẹ are i kpahenrhọ enọ enana.
Orhianẹ ituakpọ yi ya i Baibol na, mesoriẹ e se yi Ẹmro Osolobrugwẹ?
Wu rorori taghene emru ẹghwanren, re ne vwo imwẹro taghene Osolobrugwẹ ọ nyoma ituakpọ ya Ẹmro ọnẹyen rhotọre?
Ohworho ọnọ sabu ta rẹn ọyẹbe ọnẹyen no lelie ya ileta, ọrẹn, orhiẹ ọyẹbe na yo vwo ileta na-a. Omaran ọ ji havwọ, ituakpọ yi ya i Baibol na, ọrẹn, Osolobrugwẹ yo vwo iyẹnrẹn na
5. A sabu ghwọghọ i Baibol na-a
Ra mẹriẹn taghene Osolobrugwẹ yo vwo i Baibol na, e vwo imwẹro na taghene ọnọ sẹroriẹ. Nẹ ọke ahwanren rhe, ere suẹn i damoma rẹ aye ina ghwọghọ i Baibol na. Ilori ẹga i damoma rẹ aye ine tienu. Dedevwo a kparehaso ihworho buebun jeghwai djofẹn mwu aye taghene ene kpe aye hwu, aye i ji fi arhọ aye rhẹ erhirhiẹ imwofẹn na sabu sẹrorẹ i Baibol na. Ne wu yono kpahen ọhworhare owu usuẹn aye, kporo IVIDIO na, orho ru, are i gba kpahenrhọ enọ enana.
Ru we rhe taghene e ru ekwakwa buebun na sabu sẹrorẹ i Baibol na, ọnana ọ lẹrheruọ vwo ẹhẹn wu ne se yi? Mesoriẹ?
Se Psalm 119:97, orho ru, are i gba kpahenrhọ onọ ọnana:
Me yo mwu ihworho buebun fi arhọ aye rhẹ erhirhiẹ imwofẹn nẹ aye i sabu rhian i Baibol na, jeghwai ruie nẹ ihworho i vwo yi?
6. Ọbe harẹn ihworho ephian
Baibol na yẹ ọbe ra mai rhian, ri ihworho buebun i ji vwo ne. Se Acts 10:34, 35, orho ru, are i gba kpahenrhọ enọ enana:
Mesoriẹ Osolobrugwẹ ọ guọlọ taghene a rhian Ẹmro ọnẹyen, ji lẹrhẹ ihworho buebun vwo yi?
Me yọ merhuọn oma kpahen i Baibol na?
Joma
ọsoso
ihworho ri ha uvuẹn otọrakpọ na
yi vwo uphẹn rẹ aye ine se i Baibol na uvuẹn edjadjẹ rẹ aye e vwẹruọ ye
Ọ havwiẹ uvuẹn edjadjẹ ri vrẹn
3,000
ọsosuiẹ yanghene
ekete ezẹko vwọye
Uchunu i Baibol re fomu phia ne i vrẹn
5,000,000,000
ọnana ọ lẹrheriẹ bun ghwẹ ẹbe erọrọ
OBORẸ IHWORHO EZẸKO A TA: “Baibol na ọbe ahwanren rẹ ituakpọ i yare.”
Me wu rorori?
Me yo djerie phia taghene i Baibol na Ẹmro Osolobrugwẹ?
ME WU YONORIN?
Baibol na Ẹmro Osolobrugwẹ, no ji ruie nẹ ituakpọ ephian i sabu vwo yi.
Ẹzẹkoko
Me yo mevirhọ arha ta taghene Osolobrugwẹ ọ ha ẹhẹn ọfuanfon mwu ehworhare ya i Baibol na?
Me yọ merhenruọn oma kpahen i Baibol na rọ vabọ oghwọghọ, oborẹ a rhianriẹn lele, ọrhẹ ọrẹ ihworho buebun e vwo yi?
Marhẹ oma o ruo kpahen Osolobrugwẹ vwana, ru we rhe taghene o ru ẹkwaphiẹrhotọre neneyo ọ sabu tẹmro wẹn?
GUỌLỌ IYẸNRẸN ERỌRỌ
Se kpahen ikuegbe i Baibol nẹ ọke ahwanren rhe, nẹ imanuskripti ra tu ya, me te erhianrhian ọke ọwan na.
Yono kpahen imwofẹn esa ri Baibol na ọ dẹrughwaroghwu, ọrẹn, a sabu ghwọghiẹ-ẹ.
“Ikuegbe Oborẹ i Baibol na o ru Vabọ Oghwọghọ” (Oghwa Odẹrẹ Ikekele 4 2016)
Ni oborẹ ihworho i ru fiẹ arhọ aye rhẹ erhirhiẹ imwofẹn nẹ aye i sabu rhian i Baibol na.
A rharhumu ha obọ ya i Baibol na, ji rhian ye riẹ edjadjẹ buebun ne. Marhẹ ono ru mwuẹro taghene ẹmro ri ha uvuẹn i Baibol na e ji wene-e?
“E Wene i Baibol na ne, Gbinẹ Orusọ ọ ha Uvuien?” (Urhomu-ẹmro rọ ha uvuẹn itanẹti)