UYONO 34
Marhẹ Ene Ru Dje Ẹguọlọ Ọwan Kpahen i Jehova Phia?
Avwọke we yono i Baibol na, wu vwo ẹguọlọ kpahen Osolobrugwẹ rhọ ne? Wu guọlọ ru onyerẹnkugbe ọnọ rhẹ ọye gbanhonrhọ? Orho rhiomaran, karorhọ taghene i Jehova ọrhọ mẹrẹnvwrurhe taghene wu vwo ẹguọlọ okokodo kpahiẹn, no no rho vwo ẹguọlọ kpahuọn rhọ, jeghwai hẹroto. Marhẹ wu ne ru djephia riẹn taghene wu vwo ẹguọlọ kpahiẹn?
1. Marhẹ ọwan ine ru djephia rẹn i Jehova taghene e vwo ẹguọlọ kpahiẹn?
Ọwan e dje ẹguọlọ re vwo kpahen i Jehova phia nyoma ra huvwele yi. (Se 1 John 5:3.) Ọye ọvwọ gba ohworho owuorowu nọ huvwele yi-i. Ukpomaran, ọ yẹrẹ ọwan ephian uphẹn ra na djẹ odjẹ sẹ ana huvwele yi, yanghene ana tiẹn. Mesoriẹ? Jehova ọ guọlọre na “huvwele nẹ ẹhẹn rhe.” (Romans 6:17) Ọnana o mevirhọ taghene ọ guọlọre na huvwele yi, orhiẹ fọkime ene vi ruie-e, ọrẹn, fọkiẹ ẹguọlọ re vwo kpahiẹn. E ru oghọn ọrẹ 3 ọrhẹ ọrẹ 4 uvuẹn ọbe ọnana ni ha userhumu wẹn dje ẹguọlọ wu vwo kpahen i Jehova phia, nyoma we ruẹ oborẹ ọ lẹrhẹ oma merhiẹn, ru wa ji kẹnoma rẹn oborẹ o vwo utuoma kpahen.
2. Mesoriẹ ọ bẹn ọkezẹko re ne dje ẹguọlọ re vwo kpahen i Jehova phia?
“Ukpokpogho ọvwata i havwọ buebun.” (Psalm 34:19) Ọwan ephian e lele ijẹgba ọwan simoma. Ọkezẹko, ọwan a ji dẹrughwaroghwu ebẹnbẹn akpenyerẹn, osehiẹn, ọrhẹ ebẹnbẹn erọrọ. Arha rioja ebẹnbẹn, ọkezẹko, ọvwọ lọhọ re ne ru oborẹ i Jehova ọ ta rẹn ọwa-an. Fọkime ọkezẹko, ọ lọhọ rẹn ọwan ra na tiẹn uvwele i Jehova. Ọrẹn, wu rha dabu fuevwan ru oborẹ i Jehova ọ ta wẹn ne wu ru, nu we djephia riẹn taghene ọye wu mai vwo ẹguọlọ kpahen. Habaye, we ji djephia riẹn taghene wu vwo atamwu kpahiẹn. Ọye nọ nọ jeghwai vwo atamwu kpahuọn. Ọye ọ nyajovwo dẹ-ẹ.—Se Psalm 4:3.
YONO KODO RHỌ
Yono kpahen oborẹ ọsoriẹ oma ọmerhen i Jehova ọke wa huvwele yi, ọrhẹ oborẹ ọnọ ha userhumu wẹn sẹrorẹ atamwu ọnọ kpahiẹn.
3. Ẹmro ro se kpahuọn
Sekpahen oborẹ ọ ha uvuẹn ọbe i Job, Echu ọ kparehaso i Job ọrhẹ ọsoso ihworho ri guọlọ ga i Jehova. Se Job 1:1, 6–2:10, orho ru, are i gba kpahenrhọ enọ enana:
Me yẹ Echu ọ tare taghene yo mwu i Job huvwele i Jehova?—Se Job 1:9-11.
Me yẹ Echu ọ tare kpahen ituakpọ ephian?—Se Job 2:4.
Se Job 27:5b, orho ru, are i gba kpahenrhọ onọ ọnana:
Marhẹ i Job o ru djephia taghene o vwo obọdẹn ẹguọlọ kpahen i Jehova?
Job o dje ẹguọlọ ro vwori kpahen i Jehova phia, nyoma rọ sẹrorẹ atamwu ro vwo kpahiẹn
Ọwan e dje ẹguọlọ re vwo kpahen i Jehova phia nyoma ra sẹrorẹ atamwu ọwan kpahiẹn
4. Lẹrhẹ ọmudu i Jehova ghọghọ
Se Proverbs 27:11, orho ru, are i gba kpahenrhọ enọ enana:
Marhẹ oma o ru i Jehova, wu rhe vwo ẹghwanren jeghwai huvwele yi? Mesoriẹ?
5. Wu na sabu vwo atamwu kpahen i Jehova
Ẹguọlọ re vwo kpahen i Jehova, o mwu ọwan ta rẹn awọrọ kpahiẹn. Atamwu re vwo kpahiẹn o mwu ọwan ru omaran, ọrhọ tobọ rhianẹ ọ lọhọ dede-e. Kporo IVIDIO na, orho ru, are i gba kpahenrhọ enọ enana.
Ọ bẹn ha wẹn wu na ta rẹn awọrọ kpahen i Jehova?
Uvuẹn ividio na, me yọ ha userhumu rẹn i Grayson fi ofẹn kparobọ?
Ọ lọhọre ra na sẹrorẹ atamwu ọwan kpahen i Jehova, erhe vwo ẹguọlọ kpahen oborẹ o vwo ẹguọlọ kpahen, jeghwai vwo utuoma kpahen oborẹ o vwo utuoma kpahen. Se Psalm 97:10, orho ru, are i gba kpahenrhọ enọ enana:
Sekpahen oborẹ wu yono ne, me yẹ ekwakwa ezẹko ri Jehova o vwo ẹguọlọ kpahen? Ekwakwa ezẹko ego yo vwo utuoma kpahen?
Marhẹ wu ne ru yono oborẹ wu ne ru vwo ẹguọlọ kpahen oborẹ orhomurun, jeghwai vwo utuoma kpahen oborẹ obiomurun?
6. A mẹrẹn erere, arha huvwele i Jehova
Orhomurun omamọ na rha huvwele i Jehova. Se Isaiah 48:17, 18, orho ru, are i gba kpahenrhọ enọ enana:
Wu rorori taghene ana sabu hẹroso i Jehova taghene o rhe oborẹ ọ mai rhomu rẹn ọwan ọke ephian? Mesoriẹ?
Erere ego wu mẹrẹn ne uvuẹn uyono i Baibol ọnọ, ọrhẹ Osolobrugwẹ urhomẹmro na Jehova re wu rhe ne?
OBORẸ IHWORHO EZẸKO A TA: “Osolobrugwẹ ọvwọ damerhọ irueruo mẹ-ẹ.”
Ekete i Baibol ọgo ye wu na sabu dje rẹn ohworho taghene irueruo ọwan ọ hobọte i Jehova?
ME WU YONORIN?
Wu na sabu dje ẹguọlọ wu vwo kpahen i Jehova phia nyoma wa huvwele yi, jeghwai sẹrorẹ atamwu ọnọ kpahiẹn udabọ ebẹnbẹn.
Ẹzẹkoko
Me wu yonorin nẹ udje i Job?
Marhẹ wu ne ru dje ẹguọlọ wu vwo kpahen i Jehova phia?
Me yọ nọ ha userhumu wẹn sẹrorẹ atamwu ọnọ kpahen i Jehova?
GUỌLỌ IYẸNRẸN ERỌRỌ
Guọlọ izede wu ne ru dje atamwu ọnọ kpahen i Jehova ọrhẹ ukoko na phia.
Yono riarorhọ kpahen oborẹ Echu ọ tare haso ituakpọ.
“Job ọ Sẹrorẹ Emevigbanhon Ọnẹyen” (The Bible—What Is Its Message? oghọn ọrẹ 6)
Yono kpahen oborẹ emọvwerhe dede ine ru dje ẹguọlọ phia kpahen i Jehova.
Marhẹ uphuphẹn rọ dẹrughwaroghwu ọhiẹn otuẹdẹre ono ru sabu sẹrorẹ atamwu ọnẹyen kpahen i Jehova?