URHOMU-ẸMRO UYONO 19
Oborẹ Ọbe i Revelation o Mevirhọ Wẹn Inyenana
“Omamerhomẹ ọ havwiẹ harẹn ohworho ro se . . . ẹmro aruẹmẹrẹn ọnana.”—REV. 1:3.
IJORO 15 Jiri Ọmukaro Osolobrugwẹ!
ẸZẸKOKOa
1-2. Me yẹ iroro owu rọ nọ lẹrhẹ ọwan vwo omamerhomẹ kpahen ọbe i Revelation?
A TA wẹn ne wu ni ifoto sansan ohworho o vwori dẹ ne? Ọke we ni ifoto na, wa mẹrẹn ifoto ihworho buebun wu vwe rhe. Ọrẹn, ifoto owu nọ lẹrheruọ domaji ibiesuọn, ji dabu nieso. Mesoriẹ? Fọkime wu ha uvuẹn ifoto na. Ọke we nie sua, nu wa damoma karorhọ ọke ra ha ifoto na ọrhẹ ekete ra haye. Wu ji damoma wu ne vwrurhe kohworho kohworho rọ ha uvuẹn ifoto ọrana. Ifoto ọrana ọ dabu ghanren wẹn.
2 Ọbe i Revelation ọ họhọ ifoto ọrana. Mesoriẹ? Fọkiẹ iroro eva. Ọrukaro, a ya ọbe i Baibol ọnana rẹn ọwan. Uvuẹn oghwẹmro ọrukaro na, erhe se: “Oghwolophia nyoma i Jesu Kristi, rẹ Osolobrugwẹ ọ yẹriẹ no dje ekwakwa ri na vi phia phẹrẹkpẹ rẹn evrẹn enẹyen.” (Rev. 1:1) Omarana, oborẹ a ya rhẹ ọbe ọnana o sekpahen ọwan ri rhiẹ idibo i Jehova, orhiẹ harẹn ituakpọ ephia-an. Re rhiẹ idibo i Jehova na, o vwo gbe ọwan unu arha mẹrẹnvwrurhe taghene e vwobọrhọ orugba aruẹmẹrẹn sansan ri ha uvuẹn obọdẹn ọbe ọnana-a. Nọyẹ, ọwan i ha uvuẹn “ifoto na.”
3-4. Lele oborẹ ọ ha uvuẹn ọbe i Revelation, ọkiọgo yẹ aruẹmẹrẹn sansan ri havwiẹ ine rugba, marhẹ ọnana ọnọ hobọte owuowọnwan lele?
3 Iroro ọreva o sekpahen ọke aruẹmẹrẹn enana ine rugba. Ọnyikọ John o dje kpahen ọke aye ine rugba, ọke rọ ta: “Nyoma ẹhẹn ọfuanfon na, ni mi mẹrẹn omamẹ uvuẹn ẹdẹ Ọrovwori na.” (Rev. 1:10) Ọke i John ọ ya ẹmro erana uvwre ẹgbukpe 96 C.E., “ẹdẹ Ọrovwori na” ọ ji tonrhọ-ọ. (Matt. 25:14, 19; Luke 19:12) Ọrẹn, sekpahen aruẹmẹrẹn i Baibol, ẹdẹ ọrana ọ tonrhọ uvuẹn ẹgbukpe 1914 ọke ra ha i Jesu mwu no rhiẹ Orodje obẹ odjuwu. Nẹ ẹgbukpe ọrana rhe na, aruẹmẹrẹn ri ha uvuẹn Revelation, ri sekpahen ihworho Osolobrugwẹ ne ruẹgba. Itiọrurhomẹmro, ọwan e nyerẹn uvuẹn “ẹdẹ Ọrovwori na” ne!
4 Fọkime ọwan e nyerẹn uvuẹn ọke ekwakwa buebun a phia, o fori na dabu kpomavi rẹn urhebro ri ha Revelation 1:3: “Omamerhomẹ ọ havwiẹ harẹn ohworho ro se jeghwai rhon ẹmro aruẹmẹrẹn ọnana, kugbe ihworho ra nyalele ekwakwa ra ya rhẹ uvuien, fọkime ọke re verhọ na o ti kẹrẹ ne.” Itiọrurhomẹmro, o fori ne ‘se phia,’ “rhon ẹmro aruẹmẹrẹn ọnana,” ji “nyalele” aye. Me yẹ ẹmro enana ezẹko ro fori na nyalele?
JENẸ O MWUO ẸRO TAGHENE JEHOVA ONO RHIABỌ HA OGAME ỌNỌ
5. Marhẹ ọbe i Revelation o ru kanrunumwu oborẹ ọsoriẹ ọghanren nẹ Jehova o kwerhọ ogame ọwan?
5 Nẹ ọtonrhọ urhomu-ẹmro ọrukaro uvuẹn ọbe i Revelation, e yonorin taghene Jesu ọ dabu rhe kpahen ọsoso oborẹ ọ phia uvuẹn ukoko na. (Rev. 1:12-16, 20; 2:1) Jesu o dje ọrana phia nyoma urhomu edje ro dje vwe ikoko irhiruẹ ri ha uvuẹn Asia Minor. Uvuẹn urhomu edje erana, ọ ha ọkpọvi kirighwo phia ri na ha userhumu rẹn Ilele Kristi erukaro na, ha ogame ri Jehova o vwo ekwerhọ phia. Habaye, oborẹ a tare uvuẹn urhomu edje erana o ji sekpahen idibo i Jehova ephian inyenana. Me ye yonorin? Kristi Jesu ro rhiẹ Ọrovwori ọwan, o rheri sẹ e vwo obọdẹn onyerẹnkugbe rhẹ Jehova. Ọwan i ha obotọre ẹruete i Jesu; ọ mẹrẹn ekwakwa ephian. O rhe oborẹ a guọlọre na sabu rhe vwo ekwerhọ i Jehova. Ọkpọvi ọgo yọ haphia ro fori na nyalele inyenana?
6. (a) Jerẹ oborẹ a hunute uvuẹn Revelation 2:3, 4, obẹnbẹn ọghoghanren ọgo yi Jesu o ghwolo phia uvuẹn urhomu ro dje vwe ukoko rọ ha Ephesus? (b) Me ye yono nẹ ọnana rhe?
6 Se Revelation 2:3, 4. O fo na sẹrerhumuji ẹguọlọ ọrukaro re vwo kpahen Jehova-a. Urhomu ri Jesu o dje vwe imizu ri ha ukoko Ephesus, o djephia taghene aye i vwo edirin, aye e fiobọrhotọre uvuẹn ogame aye a harẹn Jehova udabọ ebẹnbẹn sansa-an. Ọrẹn, aye i sẹrerhumuji ẹguọlọ ọrukaro aye i vwori. O fori nẹ aye i rharhumu ruẹ ẹguọlọ ọrana gbanhon—orhiomara-an, Jehova o vwo ekwerhọ kpahen ogame aye-e. Omaran ọ ji havwọ inyenana, o fori ne ru vrẹn ọrẹ ene vwo edirin. O fori ne vwo edirin fọkiẹ iroro ri serhọ. Jehova o vwo ọdamẹ kpahen oborẹ e ruẹ ọrhẹ oborẹ ọsoriẹ ọwan e ruie. Oborẹ o mwu ọwan ruẹ ekwakwa ọ ghanren riẹn, fọkime ọ guọlọre nẹ ẹguọlọ ọrhẹ ọdaremẹro okokodo no mwu ọwan ha ogame riẹn.—Prov. 16:2; Mark 12:29, 30.
7. (a) Jerẹ oborẹ ọ ha Revelation 3:1-3, obẹnbẹn ọgo yi Jesu ọ mẹrẹnren uvuẹn imizu ri ha Sardis? (b) Me yo fori ne ru?
7 Se Revelation 3:1-3. Ana vi rha dẹrẹ ọke ephian. Imizu ri ha ukoko Sardis i vwo obẹnbẹn ọrọrọ. Dedevwo aye i dabu fiomarhọ ogame i Jehova uvuẹn ọke ri vrẹnren na, aye i vwe rhe ruẹ omaran vwana-a. Omarana, Jesu nọ ta rẹn aye nẹ aye i “rhọmọ.” Me ye yono nẹ orhetio ọrana ra na ha ruiruo? Itiọrurhomẹmro, ewian ra wian rẹn Jehova, i sẹriẹ ero dẹ-ẹ. (Heb. 6:10) Ọrẹn, o fo ne roro taghene fọkime a ga i Jehova ọke ri vrẹnren na, erhe fiomarhọ ogamiẹ vwana-a. Dedevwo ana sabu vwo ebẹnbẹn vrẹn ọke bi, ọrẹn o fori ne fiomarhọ “owian Ọrovwori na,” ji rha dẹrẹ ọke ephian ye toba.—1 Cor. 15:58; Matt. 24:13; Mark 13:33.
8. Lele oborẹ ọ ha Revelation 3:15-17, me ye yono nẹ ẹmro re dje vwe imizu ri ha Laodicea?
8 Se Revelation 3:15-17. Ene vi vwo oruru ji ha ogame ro fiotọre phia. Urhomu ri Jesu o dje vwe imizu ri ha Laodicea, ọ hunute obẹnbẹn ọrọrọ. Aye i havwọ “belọbelọ” uvuẹn ogame aye. Fọkiẹ uruemru aye, Jesu nọ ta rẹn aye taghene aye i havwọ ‘fanfanrhiẹn ri vwe vwo emru owuorowu.’ O fori nẹ aye i dje oruru ọgbogbanhon phia rẹn Jehova ọrhẹ ogamiẹ. (Rev. 3:19) Me ye yonorin? Orhianẹ oruru ọwan o seriotọre ne, o fori ne dje ọdaremẹro okokodo re vwori phia kpahen ekwakwa irhorhomu ra riamerhiẹn nẹ obẹ i Jehova ọrhẹ ukoko yi. (Rev. 3:18) O fo na ha uphẹn rẹn akpẹriọ vwana nọ jaghwẹrhọ ogame ra na harẹn Jehova-a.
9. Jerẹ oborẹ urhomu edje ri Jesu o dje vwe Ilele Kristi ri ha Pergamum ọrhẹ Thyatira o djephia, imwofẹn ọgo yo fori na kẹnoma riẹn?
9 O fori ne vi kẹnoma rẹn iyono inyikọ efian. Jesu ọ ghwọghwu imizu ezẹko uvuẹn Pergamum fọkime aye a suẹ oghalẹ, ji ha ẹko sansan mwuẹ. (Rev. 2:14-16) No jiri imizu ri ha Thyatira ri kẹnoma seseri rẹn “ekwakwa ikokodo Echu,” nọ ji ta rẹn aye nẹ aye i “tanbọmwu” urhomẹmro na. (Rev. 2:24-26) O fori nẹ Ilele Kristi ri vwiẹlẹre uvwre aye re ruẹ lele iyono inyikọ efian, i ghwẹriẹ. Nẹ ọwan inyenana vwo? O fori ne vi tiẹn aruẹ iyono ephian ri kparehaso iroro i Jehova. Inyikọ efian ina sabu ru “jerẹ e ga Osolobrugwẹ,” ọrẹn aye e dje “omẹgbanhon ọnẹyen rhiẹ ofian.” (2 Tim. 3:5) Ọnọ phẹrẹ ra na djokarhọ, ji tiẹn iyono efian ọke erhe gbẹro rhotọre yono i Baibol na.—2 Tim. 3:14-17; Jude 3, 4.
10. Uyono ọrọrọ ọgo ya na ji sabu yono nẹ oborẹ i Jesu ọ ta rẹn ukoko rọ ha Pergamum ọrhẹ Thyatira?
10 E vwe vi vwobọrhọ yanghene kwerhọ aruẹ irueruo ọfanrhiẹn owuorowu-u. O ji vwo obẹnbẹn ọrọrọ uvuẹn ukoko rọ ha Pergamum ọrhẹ Thyatira. Jesu ọ ghwọghwu imizu na ezẹko fọkime aye a tiẹn irueruo ọfanrhiẹ-ẹn. (Rev. 2:14, 20) Me ye yonorin? Ọwan i vwe fiẹrorhọ taghene Jehova ono nẹro rẹn aruẹ irueruo ọfanrhiẹn ephian re vwobọrhọ-ọ, ọrhọ tobọ rhianẹ o jiri ne omamọ ra ga ye, yanghene a riamerhen uphẹn ẹga ezẹko vwana. (1 Sam. 15:22; 1 Pet. 2:16) Jehova ọ guọlọre taghene a sẹrorẹ irhi egbagba enẹyen kpahen ẹfuọn, o toro oborẹ akpọ na o biomu te-e.—Eph. 6:11-13.
11. Me ye yono ne? (Se ekpeti na “Oborẹ Ana Sabu Yono Inyenana.”)
11 Me ye yono nẹ ọtonrhọ urhomu-ẹmro ọnana ne? A mẹrẹnvwrurhe ne taghene o fori nẹ Jehova o vwo ekwerhọ kpahen ogame ọwan. Orhianẹ e ruẹ oborẹ ono lẹrhẹ i Jehova je rhiabọ ha ogame ọwan, o fori na kpare idjaghwẹ ogege ruẹ ekwakwa serhọ. (Rev. 2:5, 16; 3:3, 16) Ọrẹn, Jesu ọ hunute emru ọrọrọ uvuẹn urhomu ro dje vwe ikoko na. Ọrana i me?
MWUEGBE WU NE DIẸN ẸKPAREHASO
Ọke re donron Echu nẹ odjuwu hin, marhẹ o ru kparehaso ihworho i Jehova? (Ni idjaghwẹ 12-16)
12. Me yi Jesu ọ ta rẹn Ilele Kristi ri ha Smyrna ọrhẹ Philadelphia, ro fori ne yono kpahen inyenana? (Revelation 2:10)
12 Jene yono kpahen ẹmro ri Jesu o dje vwe ikoko ri ha Smyrna ọrhẹ Philadelphia. Ọ ta rẹn imizu na taghene aye i vwa zofẹn aye ina rioja ẹkparehaso-o, ra mẹriẹn taghene ana kwosa rẹn aye fọkiẹ atamwu aye. (Se Revelation 2:10; 3:10) Me ye yonorin inyenana? Ene vi fiẹrorhọ ẹkparehaso, ji mwuegbe re ne din aye. (Matt. 24:9, 13; 2 Cor. 12:10) Mesoriẹ okarorhọ ọnana ọghanren?
13-14. Marhẹ ekwakwa ra hunute uvuẹn Revelation urhomu-ẹmriẹn 12 o ru hobọte idibo i Jehova?
13 Ọbe i Revelation ọ ta rẹn ọwan taghene ana kparehaso idibo i Jehova uvuẹn ọke ọwan na, nọyẹ uvuẹn “ẹdẹ Ọrovwori na.” Revelation urhomu-ẹmriẹn 12 ọ ta kpahen uvweri rọ homaphia obẹ odjuwu ogege ra ha i Jesu mwu no rhiẹ Orodje Uvie Osolobrugwẹ. Michael—ro rhiẹ Jesu Kristi ro vwo odidi—ọrhẹ emakashe enẹyen ni wọnrọn haso Echu ọrhẹ ikpodje yi. (Rev. 12:7, 8) Omarana, ne fiẹ evwreghrẹn Osolobrugwẹ kparobọ ji donron aye rhiẹ otọrakpọ na, aye na suẹ ebẹnbẹn ọrhẹ ojẹriọ egbogbanhon rẹn ituakpọ. (Rev. 12:9, 12) Ọrẹn, marhẹ erhirhiẹ ọnana o ru hobọte idibo i Jehova?
14 Revelation ọrhọ ta rẹn ọwan kpahen oborẹ Echu ọ kpahenrhọ ye lele. Orho vwo uphẹn rọ nọ ruẹ odjuwu-u, omarana nọ tuekwẹre kpahen era djẹha re ji nyerẹn uvuẹn otọrakpọ na, re meviẹ rẹn Uvie Osolobrugwẹ, ri ji “vwo owian re se oseri kpahen i Jesu.” (Rev. 12:17; 2 Cor. 5:20; Eph. 6:19, 20) Marhẹ aruẹmẹrẹn ọnana o rugba lele ne?
15. Ayọmo yi mevirhọ “iseri awanva” ra hunute uvuẹn Revelation urhomu-ẹmro 11, me yọ phia rẹn aye?
15 Echu ọ lẹrhẹ evwreghrẹn Osolobrugwẹ kparehaso imizu ra djẹha ra kobaro uvuẹn owian Uvie na. Imizu enana ya ha dje “iseri awanva” ra hunute uvuẹn ọbe i Revelation re kperi na.b (Rev. 11:3, 7-11) Uvuẹn ẹgbukpe 1918, na mọrenfian banren imizu ehworhare awan ẹrẹnren ra kobaro uvuẹn ukoko na, ji ta taghene aye ine rhirhiẹ ekanron ọke jijiri. Ihworho buebun ne roro taghene owian era djẹha na o vwoba ne.
16. Me yẹ ekwakwa re vwe fiẹrorhọ rọ phiare uvuẹn ẹgbukpe 1919, ọrẹn me yẹ Echu o ji ruẹ nẹ ọke ọrana rhe?
16 Aruẹmẹrẹn rọ ha Revelation urhomu-ẹmriẹn 11, ọ ji ta taghene “iseri awanva” na ina rharhumu nyerẹn ibiọke ọrhọ vrẹn hin. Ọrẹ orugba aruẹmẹrẹn ọrana, oborẹ e vwe fiẹrorhọ nọ phiare uvuẹn ẹgbukpe rọ ha kpahiẹn ọke re fiẹ imizu na rhẹ ekanron hin. Uvuẹn ọtonrhọ ẹgbukpe 1919 ne tiobọnu imizu ra djẹha na, aye arha riẹ iborhin ghwomara-an. Ogege, era djẹha na ni tuẹn owian rhọ—owian Uvie na. Ọrẹn, Echu ọ dobọji rọ nọ kparehaso idibo i Jehova-a. Nẹ ọke ọrana rhe, Echu ọ ha “urhie” ẹkparehaso hasuẹ idibo i Jehova ephian. (Rev. 12:15) Itiọrurhomẹmro, “ọnana ye ekete ra guọlọ edirin ọrhẹ esegburhomẹmro” mie owuowọnwan.—Rev. 13:10.
DABU FIOMARHỌ OWIAN RI JEHOVA Ọ YẸRẸ ỌWAN
17. Userhumu ọgo re vwe fiẹrorhọ yẹ idibo i Jehova i mẹrẹn ne, dedevwo Echu ọ kparehaso aye?
17 Revelation urhomu-ẹmriẹn 12, ọ tare taghene ihworho Osolobrugwẹ ina mẹrẹn userhumu nẹ ekete aye i vwe fiẹrorhọ. Ọnọ họhọ taghene “otọrakpọ na” no simi “urhie” ẹkparehaso na rọ. (Rev. 12:16) Ọrana ghwai oborẹ ọ phia ne. Ọkezẹko, eghọn ezẹko uvuẹn akpọ Echu, jerẹ oghwa ẹghware ezẹko sansan, i ha userhumu rẹn idibo i Jehova ne. Ọgbọ buebun, idibo i Jehova i riase uvuẹn ẹghware rọ ha uphẹn rẹn aye vwo ibiẹ ugbomọphẹ ẹga ezẹko. Marhẹ aye i ha ugbomọphẹ ọnana ruiruo lele? Aye i dabu ha kuphẹn kuphẹn aye i vwori wian owian ri Jehova ọ yẹrẹ aye. (1 Cor. 16:9) Me yẹ owian ọnana ọ surhobọmwu?
Irhomu edje eva ọgo yẹ idibo i Jehova e ghwoghwo? (Ni idjaghwẹ 18-19)
18. Mẹ yẹ owian rọ mai ghanren rẹn ọwan uvuẹn ẹdẹ oba na?
18 Jesu ọ mẹraro taghene ihworho yi ine ghwoghwo “iyẹnrẹn esiri Uvie [Osolobrugwẹ]” uvuẹn ọsoso akpọ na bọmọke oba na ọnọ rhe. (Matt. 24:14) Nyoma ọrana, aye na mẹrẹn erere nẹ userhumu ọmakashe yanghene ẹko emakashe, re djeri taghene i vwo “iyẹnrẹn esiri i bẹmẹdẹ rẹ aye ghwoghwo harẹn ere rhirhiẹ akpọ na, harẹn egbamwa na, ọrhẹ uvwiẹ, edjadjẹ, kugbe ihworho ephian.”—Rev. 14:6.
19. Urhomu edje ọrọrọ ọgo yẹ eri vwo ẹguọlọ kpahen Jehova ine vi ghwoghwo?
19 Orhiẹ iyẹnrẹn esiri Uvie na ọvo yẹ idibo i Jehova ine ghwoghwo-o. O fori nẹ aye i hobọtua owian emakashe re dje kpahen uvuẹn Revelation urhomu-ẹmro 8 fiẹ 10. Emakashe enana e ghwoghwo ikpokpogho sansan hasuẹ eri tiẹn Uvie Osolobrugwẹ. Omarana, Iseri Jehova e ghwoghwo iyẹnrẹn ẹzenguon rọ họhọ “oso atita ọrhẹ erhanren,” ro dje kpahen ẹzenguon i Jehova haso eghọn sansan uvuẹn akpọ Echu. (Rev. 8:7, 13) O fori nẹ ihworho i rhe taghene oba na o tikẹrẹ ne omamọ, neneyo aye i sabu ruẹ ewene ra guọlọre ji vabọ ẹdẹ ekwẹre i Jehova. (Zeph. 2:2, 3) Ọrẹn, iyẹnrẹn ọnana o titi-i. A guọlọ uduefigbere na sabu ghwoghwie. Uvwre ukpokpogho rode na, iyẹnrẹn ẹzenguon rọ kẹta ọnọ rhiẹ ọrẹ idandan.—Rev. 16:21.
NYALELE ẸMRO ARUẸMẸRẸN NA
20. Me ye ne yono kpahen uvuẹn irhomu-ẹmro uyono eva ri ha kpahen ọnana?
20 O ghini fo na nyalele “ẹmro aruẹmẹrẹn ọnana,” fọkime ọwan i ha usuẹn orugba oborẹ e seri uvuẹn ọbe i Revelation. (Rev. 1:3) Ọrẹn, marhẹ ene ru fuevwan vwo edirin ẹkparehaso, ji rhe fiudugbere ghwoghwo irhomu edje enana? Ekwakwa eva ina ha userhumu rẹn ọwan: ọrukaro, nyoma oborẹ ọbe i Revelation o djephia kpahen evwreghrẹn i Jehova, ọreva ebrurhọ ra na riamerhiẹn obaro na, orhianẹ a sẹrorẹ atamwu ọwan. Ene yono kpahen eghwẹmro erana uvuẹn irhomu-ẹmro eva ri ha kpahen ọnana.
IJORO 32 Ka Obọrẹ i Jehova!
a Ọwan e nyerẹn uvuẹn ọke ekwakwa sansan a phia! Aruẹmẹrẹn sansan ri ha uvuẹn ọbe i Revelation, e ruẹgba inyenana. Marhẹ aruẹmẹrẹn erana i ru hobọte ọwan inyenana? Urhomu-ẹmro ọnana ọrhẹ irhomu-ẹmro eva ri ha kpahiẹn, ina ta kpahen ihwẹnmro ezẹko ri ha ọbe i Revelation. Aye ine dje rẹn ọwan oborẹ ene ru ha ogame rọ fonron rẹn Jehova, nyoma re ne ru lele ekwakwa ra ya rhẹ ọbe ọrana.
b Se “Enọ rẹ Otu re se Ẹbe Ọwan i Nọren,” rọ ha Oghwa Odẹrẹ ọrẹ November 15, 2014, aruọbe 30.