Oborẹ i Jehova o ru ha Userhumu Rẹn Ọwan Wian Owian Aghwoghwo na

1. Me ya na sabu fiẹrorhọ, imwẹro ọgo ye vwori?

ANA sabu fiẹrorhọ taghene ihworho ezẹko ina kparehaso ọwan uvuẹn owian aghwoghwo na. Ẹkparehaso ọrana ọnọ sabu gbanhonrhọ obaro na. (Dan. 11:44; 2 Tim. 3:12; Rev. 16:21) Ọrẹn, e vwo imwẹro taghene Jehova ọnọ yẹ ọwan userhumu ra guọlọre. Mesoriẹ? Fọkime Jehova ọ ha userhumu rẹn idibo yi wian ewian aye gba​—o toro oborẹ ewian na i gbanhon te-e. Jerẹ udje, jene yono kpahen ekwakwa ezẹko ri phiare uvuẹn akpenyerẹn ọmẹraro Ezekiel, ro ghwoghwo rẹn itu i Jew ri ha erhirhiẹ evrẹn obẹ Babylon.

2. Marhẹ i Jehova o dje okogho rẹ Ezekiel o ghwoghwo rhọ, me ye ne yono kpahen uvuẹn urhomu-ẹmro ọnana? (Ezekiel 2:3-6)

² Aruẹ ihworho ego yẹ Ezekiel o ghwoghwo riẹn? Jehova o djeri aye rhiẹ ihworho ri “gbanhon urhomu,” “eludu,” ọrhẹ “era kparahaso urhi.” Aye i họhọ ivwẹn ọrhẹ ikpakpasumagha ra suẹ ẹkuọn. Ọnana yọ soriẹ i Jehova ọ ta rẹn Ezekiel ọgbọ buebun: “Wu vwa zofẹ-ẹn”! (Se Ezekiel 2:3-6.) Ezekiel ọ sabu wian owian aghwoghwo na gba, fọkime (1) Jehova yo djerie, (2) ẹhẹn ọfuanfon na o rurie gbanhon, ọrhẹ (3) Ẹmro Osolobrugwẹ o ruẹ esegburhomẹmriẹn gbanhon. Marhẹ ekwakwa esa enana i ru ha userhumu rẹn Ezekiel? Marhẹ aye e ru ha userhumu rẹn ọwan inyenana?

JEHOVA YO DJE EZEKIEL

3. Aruẹ ẹmro ego yi ruẹ Ezekiel gbanhon, marhẹ i Jehova o ru yẹ ye imwẹro taghene ọnọ hobọtua ye?

³ Jehova nọ ta rẹn Ezekiel: “Mẹmẹ ye djo nyarhẹn.” (Ezek. 2:3, 4) Ẹmro erana i ruẹ Ezekiel gbanhon. Mesoriẹ? O vwo ẹfro-o, ọ sabu karorhọ taghene Jehova ọ ji ha aruẹ ẹmro erana ruiruo ọke rọ ha owian rẹn Moses ọrhẹ Isaiah, ri rhiẹ emẹraro Enẹyen. (Ex. 3:10; Isa. 6:8) Ezekiel o ji rhe oborẹ i Jehova o ru ha userhumu rẹn emẹraro awanva erana fiẹ ebẹnbẹn kparobọ. Omarana, ọke i Jehova ọ ta rẹn Ezekiel ọgbeva: “Mẹmẹ ye djo nyarhẹn,” o vwo oborẹ ọsoriẹ Ezekiel ọnọ hẹroso obẹhatua i Jehova. Habaye, uvuẹn ọbe Ezekiel, a mẹrẹn aruẹ ẹmro ọnana ọgbọ buebun: “Ẹmro i Jehova no bruru mẹ rhe.” (Ezek. 3:16) Riobarorhọ, ẹmro na, “Ẹmro i Jehova nọ rharhumu bru mẹ rhe,” ọ homaphia ọgbọ buebun. (Ezek. 6:1) Itiọrurhomẹmro, Ezekiel no vwo imwẹro taghene Jehova yo djerie. Habaye, fọkime ọye ọmọ orherẹn, ọkezẹko ọsẹ Ezekiel o yonirien kpahen ikuegbe ri phia vrẹn ne sekpahen oborẹ i Jehova o yẹ emẹraro Enẹyen imwẹro taghene ọnọ hobọtua aye. Jehova ọ ji tẹmro enana harẹn Isaac, Jacob, ọrhẹ Jeremiah: “Mẹmẹ rhẹ owẹwẹ i gba havwiẹ.”​—Gen. 26:24; 28:15; Jer. 1:8.

4. Ẹmro urhebro ego yi bọn Ezekiel gbanhon?

⁴ Marhẹ emọ Israel ephian i kpahenrhọ aghwoghwo Ezekiel lele? Jehova ọrhọ ta: “Oghwa Israel i kwe kerhọ-ọ, fọkime aye a guọlọ kerhọ mẹ-ẹ.” (Ezek. 3:7) Fọkime aye i tiẹn Ezekiel, ihworho na ni ji tiẹn Jehova. Ẹmro erana, i yẹ Ezekiel imwẹro taghene ihworho i rha tiẹn dede, o mevirhọ taghene ọ sabu wian owian ọmẹraro ọnẹyen gba-a. Jehova ọ ji yẹ Ezekiel imwẹro taghene ọke ẹzenguon ro ghwoghwo na i rhe rugba, ihworho na ni ne “ghini rhe taghene ọmẹraro ọ ha uvwre aye.” (Ezek. 2:5; 33:33) O vwo ẹfro-o, ẹmro urhebro erana i bọn Ezekiel gbanhon nọ sabu wian owian aghwoghwo na gba.

JEHOVA YO DJE ỌWAN INYENANA

5. Lele oborẹ ọ ha Isaiah 44:8, me yọ yẹ ọwan omẹgbanhon?

⁵ Ọwan a ji mẹrẹn omẹgbanhon fọkime e rheri taghene Jehova yo djeri ọwan ne ye ghwoghwo. O brọghọ rhẹ ọwan oma nyoma ro se ọwan iseri Enẹyen. (Isa. 43:10) Ọnana ghini uphẹn ọduado! Jerẹ oborẹ i Jehova ọ ta rẹn Ezekiel: “Wu vwa zofẹ-ẹn,” Jehova ọ ji ta rẹn ọwan: “Are i vwe ghweghwe-e.” Mesoriẹ ana ja zofẹn era kparahaso ọwan? Jerẹ Ezekiel, Jehova yo djeri ọwan, ọnọ ji hobọtua ọwan.​—Se Isaiah 44:8.

6. (a) Marhẹ i Jehova o ru yẹ ọwan imwẹro kpahen obẹhatua ọnẹyen? (b) Me yọ nọ sabu yẹ ọwan urhebro ọrhẹ omẹgbanhon?

⁶ Jehova ọ yẹre ọwan imwẹro kpahen obẹhatua ọnẹyen. Jerẹ udje, bọmọke i Jehova ọ ki ta: “Are iseri mẹ,” nọ tare: “Are arha dan ame vrẹn, mẹmẹ rhẹ are ine rhirhiẹ ye, are arha dan urhie na vrẹn, are i dimẹ uvuie-en. Are arha nya erhanren vrẹn, ọ torhẹ are-e, ọ tobọ torhẹ ophianroma are-e.” (Isa. 43:2) Ọke ra wian owian aghwoghwo na, ana sabu mẹrẹn egbanrhọ ezẹko ri họhọ ukude ọrhẹ erhanren. Udabọ erana, nyoma userhumu i Jehova, ene rhe ji ghwoghwo. (Isa. 41:13) Jerẹ oborẹ ọ havwọ uvuẹn ọke Ezekiel, ihworho buebun inyenana, a ji tiẹn iyẹnrẹn esiri na. Ofori na karorhọ taghene fọkime aye i terẹn ọwan, o mevirhọ taghene a dabu wian owian aghwoghwo na te-e. Ana sabu mẹrẹn urhebro ọrhẹ omẹgbanhon ọke re rhe taghene oma ọ merhen i Jehova kpahen owian aghwoghwo na ra fuevwan vwobọrhọ. Ọnyikọ Paul ọrhọ ta: “Owuowọnwan ọnọ mẹrẹn ebrurhọ ọnẹyen sekpahen owian rọ wianren.” (1 Cor. 3:8; 4:1, 2) Omizu ọmase owu ro rhiẹ ọkobaro ọke jijiri ne, ọrhọ ta: “Oma ọ merhen mẹ mie rhe taghene Jehova o vwo ọdaremẹro kpahen omẹdamu ọwan.”

ẸHẸN ỌFUANFON I JEHOVA YO RUẸ EZEKIEL GBANHON

7. Marhẹ oma o ruẹ Ezekiel lele ọke ro roro kpahen emena arudo rọ mẹrẹnren na? (Ni ifoto obaro ọbe na.)

⁷ Ezekiel ọ mẹrẹn oborẹ ẹhẹn ọfuanfon i Jehova ọ gbanhon te. Uvuẹn emena arudo, nọ mẹrẹn oborẹ ẹhẹn ọfuanfon na o ru ha userhumu rẹn emakashe na, ji lẹrhẹ ikoro okalokpọ uvweri rọ doro omamọ na wian. (Ezek. 1:20, 21) Marhẹ Ezekiel ọ kpahenrhọ ye lele? Nọ ya oborẹ ọ phiare. “Ọke mia mẹriẹn, ni mi se gbughwaro rhotọre.” Oborẹ Ezekiel ọ mẹrẹnren ọ lẹrheriẹ se te otọre. (Ezek. 1:28) Ọke oru, Ezekiel o roro kpahen emena arudo igbevwunu ọrana, no vwo omẹgbanhon ọrhẹ imwẹro taghene ẹhẹn ọfuanfon i Jehova, ọnọ ha userhumu riẹn vwo efikparobọ uvuẹn owian aghwoghwo na.

8-9. (a) Me yi Jehova o jurhi rẹn Ezekiel no ru? (b) Marhẹ i Jehova o ru ruẹ Ezekiel gbanhonrhọ uvuẹn okogho eludu ro ghwoghwo na?

⁸ Jehova no jurhi rẹn Ezekiel: “Ọmọ onyakpọ, vẹnrẹn mevi neneyo mi tẹmro wẹn.” Ẹmro erana kugbe ẹhẹn ọfuanfon i Jehova, ni yẹ Ezekiel omẹgbanhon rọ guọlọre nọ sabu vẹnrẹn nẹ otọre na. Ezekiel nọ yare: “Ẹhẹn na nọ ruẹ oma mẹ, ji lẹrhẹ mẹ vẹnrẹn mevi.” (Ezek. 2:1, 2) Ọke oru, uvuẹn ọsoso owian aghwoghwo Ezekiel, “obọ”​—nọyẹ ẹhẹn ọfuanfon i Jehova nọ yo suien. (Ezek. 3:22; 8:1; 33:22; 37:1; 40:1) Ẹhẹn ọfuanfon Osolobrugwẹ o ruẹ Ezekiel gbanhon nọ sabu wian owian ra yẹriẹ, nọyẹ ọrẹ ono ghwoghwo rẹn “ihworho ri gbanhon urhomu ọrhẹ eludu” ri ha uvuẹn okogho ro ghwoghwo. (Ezek. 3:7) Jehova nọ ta rẹn Ezekiel: “Mi ruẹ ughwaruọ gbanhon jerẹ ughwaro aye ne, aruikpẹn ọnọ gbanhon jerẹ aruikpẹn aye ne. Mi ruẹ aruikpẹn ọnọ jerẹ diamond ne, ọ gbanhon ghwẹ atita ọgbogbanhon. Wu vwa zofẹn fọkiẹ aye-e, yanghene ghweghwe fọkiẹ ughwaro aye-e.” (Ezek. 3:8, 9) Ọrẹ imwẹro, Jehova ọ ta rẹn Ezekiel: ‘Wu vwe je erhirhiẹ ọludu ihworho na lẹrhẹ ẹhọn seriotọre-e. Mi ne ruo gbanhon.’

⁹ Ọke oru, ẹhẹn ọfuanfon Osolobrugwẹ nọ kpare Ezekiel lele okogho ro ghwoghwo na. Ezekiel nọ yare: “Obọ i Jehova no ruru me gbanhon.” Ọ ha emrẹ ọkprughwre owu bọmọke ọmẹraro na ọ ki dabu yono, ji vwẹruọ urhomu edje ro no ghwoghwo na. (Ezek. 3:14, 15) Omarana, Jehova nọ ta riẹn no riẹ ekete owu ro seriotọre, ekete rẹ “ẹhẹn ọfuanfon na ọ [ruiẹ] oma.” (Ezek. 3:23, 24) Ezekiel ọ dabu mwuegbe rọ nọ wian owian aghwoghwo na ne.

ẸHẸN ỌFUANFON I JEHOVA YO RUẸ ỌWAN GBANHAN INYENANA

10. Userhumu ọgo ya guọlọre na sabu wian owian aghwoghwo na, mesoriẹ?

¹⁰ Userhumu ọgo ya guọlọre na sabu wian owian aghwoghwo na? Na kpahenrhọ ye, jene roro kpahen oborẹ ọ phia rẹn Ezekiel. Bọmọke ọ ki tuẹn owian aghwoghwo yi rhọ, ẹhẹn ọfuanfon Osolobrugwẹ yọ yẹriẹ omẹgbanhon rọ guọlọre. Inyenana, jerẹ oborẹ erhirhiẹ Ezekiel ọ havwọ, ana sabu wian owian aghwoghwo na nyoma userhumu ẹhẹn ọfuanfon Osolobrugwẹ. Mesoriẹ? Fọkime Echu ọ wọnrọn haso ọwan neneyo a dobọ owian aghwoghwo na ji. (Rev. 12:17) Uvuẹn ukẹro onyakpọ, ọwan i sabu wọnrọn haso Echu-u. Ọrẹn, nyoma owian aghwoghwo na, ọwan na sabu fiekparobọ! (Rev. 12:9-11) Izede ọgo? Erhe vwobọrhọ owian aghwoghwo na, ne djephia taghene a vwa zofẹn ẹkparehaso Echu-u. Kọke kọke erhe ghwoghwo, ne fiẹ Echu kparobọ. Omarana, imwẹro ọgo ye vwori ọke ra mẹrẹnvwrurhe taghene ana sabu rhe ji ghwoghwo udabọ ẹkparehaso? Ana sabu ta taghene ẹhẹn ọfuanfon i Jehova yo ruẹ ọwan gbanhan, habaye e ji vwo ekwerhọ Ọnẹyen.​—Matt. 5:10-12; 1 Pet. 4:14.

11. Me yẹ ẹhẹn ọfuanfon i Jehova ono ru rẹn ọwan, marhẹ ene ru vwo yi?

¹¹ Imwẹro ọrọrọ ọgo ya na sabu vwo ọke re roro kpahen oborẹ i Jehova o ru yẹ Ezekiel omẹgbanhon rọ guọlọre nọ sabu ghwoghwo? Ẹhẹn ọfuanfon i Jehova ọnọ yẹ ọwan omẹgbanhon ra guọlọre na sabu fiẹ ebẹnbẹn kparobọ uvuẹn aghwoghwo na. (2 Cor. 4:7-9) Omarana, me ye ne ruo na sabu rhe vwo ẹhẹn ọfuanfon i Jehova? Ofori na rha nẹrhomo ọke ephian rhẹ imwẹro na taghene Jehova ono rhon ọwan. Jesu o yono idibo yi: “Are i rha nọ, . . . are i rha guọlọ, . . . are i rha ha obọ fomu ighwe.” Ọrẹ ẹkpahenrhọ, Jehova ono “tiobọnu ẹhẹn ọfuanfon na rẹn ihworho ra nekpẹn yen mie yi.”​—Luke 11:9, 13; Acts 1:14; 2:4.

EZEKIEL O RUẸ ESEGBURHOMẸMRIẸN GBANHON NYOMA ẸMRO I JEHOVA

12. Lele oborẹ ọ ha Ezekiel 2:9–3:3, bọgo yẹ ikpitọnbe na o nurhe, me yọ ha uvuien?

¹² Ẹhẹn ọfuanfon i Jehova yo ruẹ Ezekiel gbanhon, Ẹmro Ọnẹyen nọ ji bọn esegburhomẹmriẹn gbanhon. Uvuẹn emena arudo na, Ezekiel nọ mẹrẹn obọ rọ mọrẹn ikpitọnbe. (Se Ezekiel 2:9–3:3.) Bọgo yẹ ikpitọnbe na o nurhe? Me yọ ha uvuien? Marhẹ o ru ruẹ Ezekiel gbanhon? Jene yono kpahiẹn. Ikpitọnbe na o nẹ aga usun i Jehova rhe. Ọkezẹko, Jehova ọ ha owu usuẹn emakashe ẹne rẹ Ezekiel ọ mẹrẹn vrẹn ne na yẹ ye ikpitọnbe na. (Ezek. 1:8; 10:7, 20) Ikpitọnbe na o vwo ẹmro i Jehova​—ro rhiẹ urhomu edje ẹzenguon oseseri rẹ Ezekiel ono ghwoghwo rẹn itu i Jew ri gbanhon urhomu ri ha evrẹn. (Ezek. 2:7) A ya urhomu edje ọrana rhẹ obaro ọrhẹ oberhumu ikpitọnbe na.

13. Me yi Jehova ọ ta rẹn Ezekiel no ru rhẹ ikpitọnbe na, mesoriẹ ọ miẹmiẹ?

¹³ Jehova ọ ta rẹn ọmẹraro na nọ riẹ ikpitọnbe na, nọ ji “vuọn [yen] evwan.” Ọrẹ omeriotọre, Ezekiel nọ riẹ ikpitọnbe na hin. Me yẹ oghọn ọnana uvuẹn emena arudo na o mevirhọ? Ofori nẹ Ezekiel ọ dabu vwẹruọ urhomu edje rọ guọlọ ghwoghwo na. Ọnọ vi riẹnrioma rhọ ye, nọ hobọte iroro enẹyen. Ọke oru, emru igbevwunu nọ phiare. Ezekiel nọ mẹrẹnvwrurhe taghene ikpitọnbe na ọ “miẹmiẹ jerẹ amiahon.” (Ezek. 3:3) Mesoriẹ? Harẹn Ezekiel, uphẹn ro no mevi rẹn Jehova, ọ miẹmiẹ yanghene emru omamerhomẹ. (Ps. 19:8-11) Orhiẹ emru omamerhomẹ riẹn taghene Jehova o vwo ekwerhọ kpahiẹn nọ ga ẹrhẹ ọmẹraro ọnẹyen.

14. Me yọ ha userhumu rẹn Ezekiel mwuegbe rọ nọ wian owian ra yẹriẹ?

¹⁴ Ọke oru, Jehova nọ ta rẹn Ezekiel: “Kpomavi rẹn ẹmro mẹ ne wu ji kerhọ ọsoso oborẹ mia ta wẹn na.” (Ezek. 3:10) Rhẹ ọkpọvi erana, Jehova nọ ta rẹn Ezekiel nọ sẹrorẹ ẹmro ri ha ikpitọnbe na, ji roro kodo kpahen aye. Esegburhomẹmro Ezekiel ọ gbanhonrhọ ọke ro ru te omaran. Habaye, Jehova ọ yẹriẹ urhomu edje ọgbogbanhon ro no ghwoghwo rẹn ihworho na. (Ezek. 3:11) Fọkime ẹmro Osolobrugwẹ ọ ha uvuẹn ẹhẹn yen ọrhẹ evwẹre ugbunie, Ezekiel no mwuegbe rọ nọ wian owian aghwoghwo na gba.​—Haye vwanvwọn Psalm 19:14.

BAIBOL NA O RUẸ ESEGBURHOMẸMRO ỌWAN GBANHAN INYENANA

15. Me yo fori na “kpomavi” riẹn na sabu vwo edirin?

¹⁵ Na sabu vwo edirin uvuẹn owian aghwoghwo na, ene vi rhe ruẹ esegburhomẹmro ọwan gbanhan nyoma i Baibol na. Jerẹ Ezekiel, ofori na “kpomavi” rẹn ọsoso oborẹ i Jehova ọ ta rẹn ọwan. Inyenana, Jehova ọ tẹmro rẹn ọwan nyoma i Baibol na. Marhẹ ono ru mwu ọwan ẹro taghene Baibol na ọ hobọte iroro ọrhẹ irueruo ọwan?

16. Me ya na ha i Baibol na ru, marhẹ ene ru kpomavi riẹn?

¹⁶ Jerẹ oborẹ emaren ọ dabu rhuọnrhuọn ugboma ọwan ọke arha riẹ, omaran i Baibol na ọ dabu ruẹ esegburhomẹmro ọwan gbanhan ọke erhe yonie, ji roro kodo kpahiẹn. Ọwan a karorhọ oborẹ e yono nẹ ikpitọnbe na, ri Jehova ọ guọlọre ne vwo rhẹ ẹhẹn. Ọke re se i Baibol na, Jehova ọ guọlọre nọ “vuọn [ọwan] evwan,” nọyẹ, na dabu vwẹruọ ye. Ana sabu ruẹ omaran nyoma ẹrhomo ẹne, isese, ọrhẹ eroro kodo. Ọrukaro, ọwan a nẹrhomo ne mwuegbe ọmudu ọwan na sabu rhe iroro i Jehova. Orho ru, ne se oghwẹmro i Baibol na. Ọrọ ha kpahiẹn, na domajẹ na dabu roro kodo kpahen oborẹ e seri na. Me yo no nerhumie rhe? Erhe roro kodo rhọ, esegburhomẹmro ọwan nọ gbanhanrhọ.

17. Mesoriẹ ọghanren ne roro kodo kpahen oborẹ e seri uvuẹn i Baibol na?

¹⁷ Mesoriẹ ọghanren ne se i Baibol na, ji roro kodo kpahiẹn? Fọkime erhe ruẹ omaran, ọnọ yẹ ọwan omẹgbanhon ra guọlọre ne ghwoghwo iyẹnrẹn esiri na, ọrhẹ urhomu edje ẹzenguon re ne ghwoghwo phẹrẹkpẹ obaro na. Habaye, erhe ji roro kodo kpahen iruemru irhorhomu eri Jehova, onyerẹnkugbe ọwan rhẹ ọye nọ nọ kpẹnkpẹnrhọ. Obẹtaye, na na riamerhen oborẹ ọ miẹmiẹren, yanghene rọ merhoma, nọyẹ ufuoma ọrhẹ ẹhẹn otemẹ.​—Ps. 119:103.

OMWEMẸ RE NE VWO EDIRIN

18. Me yẹ ihworho ri ha okogho re ghwoghwo ina mẹrẹnvwrurhe, mesoriẹ?

¹⁸ Ọrẹ ovẹnẹ rhẹ Ezekiel, ọwan rhẹ emẹraro-o. Ọrẹn, e vwo omwemẹ re ne ghwoghwo urhomu edje i Jehova rọ ha uvuẹn i Baibol na ọke ephian, bọmọke i Jehova ono fiobarhọ ye. Ọke ẹzenguon na orho te ne, ihworho ri ha okogho re ghwoghwo, i sabu ta taghene aye e rhon orhetio ri Jehova ọ yẹre aye-e, yanghene Jehova o se aye gbe emru-u. (Ezek. 3:19; 18:23) Ukpomaran, aye ina mẹrẹnvwrurhe taghene ẹmro re ghwoghwo rẹn aye, o nẹ obẹ i Jehova rhe.

19. Me yọ nọ yẹ ọwan omẹgbanhon wian owian aghwoghwo na gba?

¹⁹ Me yọ nọ yẹ ọwan omẹgbanhon ra na wian owian aghwoghwo na mwidjẹn? Ekwakwa esa ri ji ruẹ Ezekiel gbanhon na. Ene vi rhe ghwoghwo fọkime e rheri taghene Jehova yo djeri ọwan, ẹhẹn ọfuanfon i Jehova yo ruẹ ọwan gbanhan, habaye Baibol na o ruẹ esegburhomẹmro ọwan gbanhan. Nyoma userhumu i Jehova, e vwo omwemẹ ra na wian owian aghwoghwo na, ji vwo edirin “toba.”​—Matt. 24:13.