Enọ Rẹ Otu Re Se Ẹbe Ọwan I Nọren
David o roro taghene ọye o hwuẹ-ẹ, ọke rọ ta taghene ọye ono jiri odẹ Osolobrugwẹ “bẹmẹdẹ” jerẹ oborẹ ọ ha Psalm 61:8?
Ẹjo. Oborẹ i David ọ yare uvuẹn oghwẹmro ọrana o serhọ dẹn ji mwuẹro.
Roro kpahen oborẹ ọ yare uvuẹn oghwẹmro erana ọrhẹ eri họheriẹ: “Ni mi na so ijoro jiri odẹ ọnọ bẹmẹdẹ, re mia nyamwu ive mẹ nẹ ẹdẹ fiẹ ẹdẹ.” “Mie jiruo, O Jehova Osolobrugwẹ, rhẹ ọsoso ọmudu mẹ, mi ne jiri odẹ ọnọ bẹmẹdẹ.” “Mi ne jiri odẹ ọnọ nẹ i bẹmẹdẹ ye ti bẹmẹdẹ.”—Ps. 61:8; 86:12; 145:1, 2.
David o vwo dje ekwakwa vrẹn ovwan yanghene no roro taghene ọye o hwuẹ-ẹ. O rheri taghene Jehova ọ tare taghene ituakpọ ine hwuo fọkiẹ ọdandan, ọye o ji kwe taghene ọye oruọdandan. (Gen. 3:3, 17-19; Ps. 51:4, 5) Ọye o rheri taghene ihworho ri Jehova o vwo ekwerhọ kpahen jerẹ Abraham, Isaac, ọrhẹ Jacob, i ji hwu ne. David ọ kpararo mẹriẹn taghene ọye ono hwuo phẹrẹkpẹ. (Ps. 37:25; 39:4) Ọrẹn, ẹmro i David ra ya rhẹ Psalm 61:8, o dje omwemẹ yen ro no jiri Osolobrugwẹ bẹmẹdẹ, nọyẹ ọke ro no nyerẹn te.—2 Sam. 7:12.
Ezẹko usuẹn eyaya i David uvwre ọke ọrana o sekpahen akpenyerẹn yen, jerẹ oborẹ a mẹrẹn uvuẹn oberun urhomu-ẹmro Psalms 18, 51, ọrhẹ 52. Uvuẹn Psalm 23, David o dje i Jehova rhiẹ osuingegede ro tiobọnu ọkpọvi, omẹrhuọnrhuọn ọrhẹ ẹruete. David osuingegede ro vwo iruemru erana. Ọye ọ guọlọ ha ‘ọsoso akpenyerẹn yen ga Osolobrugwẹ.’—Ps. 23:6.
Karorhọ taghene Jehova yo mwu i David ya eghwẹmro erana. Ọ ya kpahen aruẹmẹrẹn ri sekpahen ekwakwa ri na homaphia obaro na. Jerẹ udje, uvuẹn Psalm 110, David ọ rionbọrhọ ọke Ọrovworie ono “siyẹ obọrhe [Osolobrugwẹ]” obẹ odjuwu, na ji yẹ ye omẹgbanhon rọ doro. Me yọ nọ haye ru? Ọnọ haye ghwọghọ evwreghrẹn Osolobrugwẹ ji ha egbamwa otọrakpọ na “guẹnzọn.” David ọsẹ rode rẹn Messiah na, ro rhiẹ ọro no sun nẹ odjuwu rhe, ji rhiẹ “orherẹn bẹmẹdẹ.” (Ps. 110:1-6) Jesu o djephia taghene aruẹmẹrẹn rọ ha Psalm 110 na, o sekpahiẹn, ono ji te orugba ọke rọ sa na.—Matt. 22:41-45.
Ee, Jehova ọ ha David ya kpahen ọke ọnẹyen ọrhẹ obaro na, uvuẹn ọke ra na rhọmiẹ nuhwu, rọ nọ jeghwai jiri Jehova bẹmẹdẹ. Ọrana ọ ha userhumu rẹn ọwan mẹrẹnvwrurhe taghene Psalm 37:10, 11, 29 o dje kpahen erhirhiẹ rọ homaphia uvuẹn Israel ọke ahwanren ọrhẹ ọrẹ ọnọ homaphia uvuẹn obaro na ọke Osolobrugwẹ ọ ha ive yi te orugba ne.—Se udjoghwẹ 8 uvuẹn urhomu-ẹmro na, “Wu ne Leli mẹ Rhirhiẹ ye Uvuẹn i Paradais” uvuẹn Oghwa Odẹrẹ ọnana.
Psalm 61:8 ọrhẹ eghwẹmro i Baibol erọrọ ri họheriẹ i djephia taghene David ọ guọlọ jiri Jehova uvuẹn Israel ọke ahwanren bọmọke ono ki hwu. Aye e ji dje kpahen oborẹ i David ọnọ sabu ru uvuẹn obaro na ọke i Jehova ọ rhọmeriẹn nuhwu ne.