Zakkaariyaas

3 Innis Iyyaasuu luba ol aanaa isa maleekaa Yihowaa dura dhaabbatee jiru natti argisiise;+ Seexanni immoo+ isa mormuuf karaa harka mirgaa isaatiin dhaabbatee ture. 2 Achiis maleekaan Yihowaa sun Seexanaan akkana jedhe: “Seexana nana,+ Yihowaan si haa ifatu, eeyyee, Yihowaan inni Yerusaalemiin filate+ si haa ifatu! Inni kun muka ibidda keessaa butamee baʼe mitii?”

3 Yeroo kanatti Iyyaasuun uffata xuraaʼaa uffatee maleekaa sana dura dhaabbatee ture. 4 Maleekaan sunis warra isa dura dhaabbatanii jiraniin, “Uffata isaa isa xuraaʼaa irraa baasaa” jedhe. Achiis, “Ilaa, ani balleessaan* kee akka si irraa fagaatu godheera, atis uffata gaarii* ni uffatta”+ isaan jedhe.

5 Kanaafuu ani, “Maratni mataa qulqulluun mataa isaa irra haa kaaʼamu”+ nan jedhe. Isaanis marata mataa qulqulluu mataa isaa irra ni kaaʼan, uffatas isatti ni uwwisan; maleekaan Yihowaas achi dhaabbatee ture. 6 Achiis maleekaan Yihowaa sun Iyyaasuudhaan akkana jedhe: 7 “Yihowaan Gooftaan Raayyaa akkana jedha: ‘Ati daandii koo irra yoo deddeebitee fi itti gaafatamummaa na duratti qabdu yoo raawwatte, mana koo keessatti abbaa murtii taatee ni tajaajilta;+ mooraa koos ni kunuunsita;* ani warra as dhaabbatan gidduu deddeebiʼuuf mirga akka qabaattu nan godha.’

8 “‘Yaa Iyyaasuu Luba Ol Aanaa, maaloo dhagaʼi, michoonni kee warri si dura taaʼanis haa dhagaʼan; sababiin isaas, namoonni kun akka mallattootti tajaajilu; kunoo, ani Latii+ isa tajaajilaa koo taʼe nan fida!+ 9 Dhagaa ani Iyyaasuu dura kaaʼe kana ilaalaa! Dhagaa tokko irra ija torbatu jira; ani barreeffama tokko isa irratti nan boca; balleessaa biyya sanaas guyyaa tokkotti irraa nan fuudha’ jedha Yihowaan Gooftaan Raayyaa.+

10 “‘Guyyaa sanatti, tokkoon tokkoon keessan muka wayinii fi muka harbuu keessan jalatti ollaa keessan ni affeertu’ jedha Yihowaan Gooftaan Raayyaa.”+